દેશમાં નોકરી સર્જનમાં શું આવ્યા સારા સમાચાર ? જુઓ

ભારતીય અર્થવ્યવસ્થાને હાલમાં ચારે બાજુથી સારા સમાચાર મળી રહ્યા છે. પાછલા નાણાકીય વર્ષમાં 8.2 ટકાનો મજબૂત વૃદ્ધિ દર હાંસલ કર્યા પછી, વેપાર ક્ષેત્રની વૃદ્ધિ અને નોકરીના મોરચે પણ સારા સમાચાર મળ્યા છે. એચએસબીસી ઈન્ડિયાએ શુક્રવારે જાહેર કરેલા એક અહેવાલમાં જણાવ્યું હતું કે મે મહિનામાં ભારતની વ્યાપાર પ્રવૃત્તિ ઝડપથી આગળ વધી છે અને બિઝનેસમાં આવેલી તેજીને કારણે જોબ મોરચે પણ વધારો થયો છે. સ્થિતિ એ છે કે દેશમાં રોજગારીનું સર્જન 18 વર્ષમાં સૌથી ઊંચા સ્તરે પહોંચ્યું છે.

પરચેઝિંગ મેનેજર્સ ઈન્ડેક્સ અનુસાર, મે મહિનામાં ભારતનો બિઝનેસ એક્ટિવિટી ઈન્ડેક્સ 60.9 હતો, જે એક મહિના અગાઉ એટલે કે એપ્રિલમાં 60.5 હતો. આ આંકડો દર્શાવે છે કે છેલ્લા 3 વર્ષમાં ભારતની વ્યાપારી પ્રવૃત્તિઓમાં વૃદ્ધિ થઈ છે, કારણ કે આ સમયગાળા દરમિયાન ઈન્ડેક્સ 50થી નીચે નથી આવ્યો.

ઉત્પાદન અને સેવા બંને ક્ષેત્રોમાં તેજી
ભારતનો સંયુક્ત પીએમઆઈ જૂનમાં પણ વધી રહ્યો છે. મતલબ કે ઉત્પાદન અને સેવા બંને ક્ષેત્રોમાં વૃદ્ધિ જોવા મળી હતી. મે મહિનામાં મેન્યુફેક્ચરિંગ સેક્ટર ઇન્ડેક્સ 57.5 થી વધીને 58.5 થયો હતો, જ્યારે સર્વિસ સેક્ટર ઇન્ડેક્સ 60.2 થી વધીને 60.4 થયો હતો. તેની સરખામણીમાં વિશ્વની અર્થવ્યવસ્થા એકદમ ધીમી છે.

નિકાસમાં તેજી
બંને પીએમઆઈ સૂચકાંકો મજબૂત થવા સાથે, આ સતત 22મો મહિનો છે જ્યારે નિકાસ ઓર્ડરમાં પણ વધારો થયો છે. ભારતમાં ઝડપથી નવા ઓર્ડર મળી રહ્યા છે, જેના કારણે વ્યાપારી પ્રવૃત્તિઓ પણ વધી રહી છે. આનો અર્થ એ છે કે કંપનીઓ તેમના ઉત્પાદનમાં વધારો કરી રહી છે અને આ માટે વધુ મેનપાવરની પણ જરૂર છે, જેનાથી નોકરીઓ વધે છે.

2006 પછી નોકરીઓની સૌથી વધુ સંખ્યા
વ્યવસાયિક ગતિવિધિઓમાં વધારો થવાને કારણે રોજગારીનું સર્જન પણ વધી રહ્યું છે. જો આંકડાઓ પર નજર કરીએ તો સ્પષ્ટ થાય છે કે એપ્રિલ 2006 પછી મે 2024માં એટલે કે 18 વર્ષ પછી સૌથી વધુ રોજગાર સર્જન થયું છે. સૌથી આશ્ચર્યજનક વાત એ છે કે આ વખતે નોકરીઓનું સર્જન સેવા ક્ષેત્ર કરતાં ઉત્પાદન ક્ષેત્રે વધુ થયું છે. હાલમાં જ રોયટર્સ દ્વારા કરવામાં આવેલા એક સર્વેમાં સામે આવ્યું છે કે મોદી સરકારના ત્રીજા કાર્યકાળ માટે નોકરીઓ સૌથી મોટો પડકાર હશે, પરંતુ આ સમાચાર હાલ માટે રાહતના છે.