ભાજપના ઉમેદવાર જાહેર થનાર પવનકુમારે શું કર્યું ? જુઓ
ચુંટણી લડવા અંગે શું જાહેરાત કરી ?
લોકસભાની ચુંટણી માટે ભાજપ દ્વારા શનિવારે 195 ઉમેદવારોની યાદી જાહેર કરાઇ હતી અને ઉમેદવારોના ટેકેદારોએ ઉજવણી કરી હતી. પરંતુ બંગાળમાં ભાજપના એક ઉમેદવારે કોથળામાંથી બિલાડું કાઢીને ચુંટણી લડવાનો જ ઇનકાર કરી દીધો હતો. ભોજપુરી ફિલ્મ ઈન્ડસ્ટ્રીના સ્ટાર પવન સિંહે આસનસોલ લોકસભા બેઠક પરથી ચૂંટણી લડવાની ના પાડી દીધી હતી. આ બાબતએ ભારે ચર્ચા શરૂ થઈ હતી. હવે અહીં ભાજપે નવા ચેહરાની જાહેરાત કરવી પડશે. આસનસોલમાં પવનકુમારની ટક્કર ટીએમસીના ઉમેદવાર શત્રુઘ્ન સિંહા સામે થવાની હતી.
પવન કુમારે સોશિયલ મીડિયા પ્લેટફોર્મ ‘X’ પર આ અંગે માહિતી આપી હતી અને કહ્યું હતું કે ‘હું ભારતીય જનતા પાર્ટીના ટોચના નેતૃત્વનો હૃદયપૂર્વક આભાર વ્યક્ત કરું છું. પાર્ટીએ મારા પર વિશ્વાસ કર્યો અને મને આસનસોલથી ઉમેદવાર જાહેર કર્યો, પરંતુ કેટલાક કારણોસર હું આસનસોલથી ચૂંટણી લડી શકીશ નહીં.’
ભાજપની યાદી જાહેર થયા પહેલા જ પવન સિંહ લોકસભા ચૂંટણી લડશે તેવી અટકળો ચાલી રહી હતી. બિહારની આરા બેઠક પરથી પણ તેમને ઉમેદવાર બનાવવાની અટકળો ચાલી રહી હતી. ભાજપે તેમને બિહારને બદલે પશ્ચિમ બંગાળમાંથી મેદાનમાં ઉતાર્યા હતા. આસનસોલ લોકસભા ક્ષેત્ર ઝારખંડને અડીને આવેલું છે અને અહીં બિહારી મતદારોની સંખ્યા વધુ છે. પવન સિંહ અહીં ભાજપ માટે મોટું પરિબળ સાબિત થઈ શકે છે. હવે તેમણે ઉમેદવાર બનવાની ના પાડી દીધી હોવાથી ભાજપે નવા ઉમેદવારની જાહેરાત કરવી પડશે.
ભાજપનો સેલ્ફ-ગોલ: ટીએમસીનો ટોણો
પવનકુમારે ચુંટણી લડવાનો ઇનકાર કર્યાની જાહેરાત કર્યા બાદ ભાજપના કટ્ટર હરીફ બનેલા ટીએમસીના નેતાઓએ ભાજપને ટોણો મારતા નિવેદનો પોસ્ટ કર્યા હતા. ટીએમસીના મહાસચિવ અભિષેક બેનરજીએ સોશ્યલ મીડિયા પર લખ્યું હતું કે આ ભાજપનો સેલ્ફ ગોલ છે. એમણે વધુમાં એમ લખ્યું હતું કે આ જ છે બંગાળના લોકોની શક્તિ અને એકતા ભાવ. અન્ય નેતાઓએ પણ એક રીતે ખુશાલી વ્યક્ત કરી હતી.
