આઈએમએફના એમડી ગીતાએ ભારત વિષે શું કહ્યું ? જુઓ
આઈએમએફના ડેપ્યુટી એમડી ગીતા ગોપીનાથે શનિવારે નાણામંત્રી નિર્મલા સીતારમણ સાથે મુલાકાત કરી હતી. તેમણે આર્થિક નીતિઓમાં સતત સુધારા કરવા માટે નાણામંત્રીની પ્રશંસા કરી હતી. નિર્મલા સીતારમણે કહ્યું કે ભારત આઈએમએફ સાથે સહયોગ વધારવા માટે નવા રસ્તાઓ શોધશે. આ પહેલા ગીતા ગોપીનાથે કહ્યું હતું કે ભારતે 2030 સુધીમાં 6 થી 14 કરોડ નોકરીઓ ઉભી કરવી પડશે. દેશમાં દર વર્ષે ઓછામાં ઓછી 1 કરોડ નોકરીઓ ઉભી થવી જોઈએ. સાથે ભારત 2027 સુધી દુનિયાની ત્રીજી સૌથી મોટી અર્થવ્યવસ્થા બની શકે છે તેમ પણ કહ્યું હતું.
ગોપીનાથે દેશના રાજ્યોની કામગીરીની નોંધ લઈને કહ્યું હતું કે દેશમાં અત્યારે ગુજરાત અને તામિલનાડુ વિદેશી રોકાણ લાવવામાં સૌથી સારું કામ કરી રહ્યા છે અને બધા જ રાજ્યોએ એમની જેમ જ પ્રયાસ કરવા જોઈએ.
1 કરોડથી વધુ નોકરીઓનું સર્જન
ગોપીનાથે ઈન્ડિયન એક્સપ્રેસને આપેલા ઈન્ટરવ્યુમાં કહ્યું કે જો ભારત દર વર્ષે 1 કરોડથી 24 મિલિયન નોકરીઓનું સર્જન કરશે તો તેની આર્થિક ગતિ તેજ રહેશે. તેમણે કહ્યું કે મોંઘવારી એક મોટો પડકાર છે. જો કે, ઘણા દેશોમાં તે ધીમો પડવા લાગ્યો છે. જો કે, જોબ મોરચે પરિસ્થિતિ હજુ એટલી સુધરી નથી. ઘણા દેશોમાં સંઘર્ષને કારણે ખાદ્ય ચીજવસ્તુઓના ભાવમાં વધારો થયો છે. તેલના ભાવમાં પણ વધારો થવાની સંભાવના છે. આ વર્ષે ઘણા દેશોમાં ચૂંટણીને કારણે અનિશ્ચિતતા છે. ભારતમાં મોંઘવારી દર હાલમાં નિયંત્રણમાં છે.
ગીતા ગોપીનાથે વધુમાં કહ્યું કે ભારતનો આર્થિક વિકાસ દર સંતોષજનક છે. ભારત વિશ્વમાં સૌથી ઝડપથી વિકસતું અર્થતંત્ર છે. અમારો અંદાજ છે કે ભારતનો જીડીપી 6.5 ટકાની આસપાસ રહેશે. ભારતે ઘણા સુધારા કર્યા છે. પરંતુ જો આર્થિક ગતિ જાળવી રાખવી હોય તો વધુ કરવાની જરૂર છે. જો જીડીપી આ રીતે વધતો રહેશે તો માથાદીઠ આવક પણ વધશે. આ માટે ભારતે દર વર્ષે કરોડો નોકરીઓ ઉભી કરવી પડશે. માત્ર એક કે બે ક્ષેત્રો પર ધ્યાન કેન્દ્રિત કરીને આ લક્ષ્ય હાંસલ કરી શકાતું નથી. સરકારે તમામ ક્ષેત્રોને આગળ લઈ જવાનો પ્રયાસ કરવો પડશે.
ગુજરાત અને તમિલનાડુ આગળ
ગોપીનાથે કહ્યું કે ભારતે કોર્પોરેટ રોકાણ વધારવું પડશે. ગુજરાત અને તમિલનાડુ જેવા રાજ્યો વિદેશી રોકાણ લાવવામાં સારું કામ કરી રહ્યા છે. અન્ય રાજ્યોએ પણ આ કરવું પડશે. આપણે લોકોના કૌશલ્ય વિકાસ પર વધુ ધ્યાન આપવું પડશે. આ ઉપરાંત કૃષિ ઉત્પાદકતા વધારવા પર પણ ધ્યાન આપવું પડશે. જમીન સુધારણા પણ ઝડપી કરવી પડશે. તેમણે કહ્યું કે આપણે AI થી ડરવું જોઈએ નહીં પરંતુ તેનો ઉપયોગ આપણા ફાયદા માટે કરવો પડશે.
