વિરાટ કોહલીએ સેમ કોન્સ્ટાસને ધક્કો માર્યાનો મામલો : ICCએ 5 કલાકની અંદર જ કોહલીને ફટકારી સજા

ટીમ ઈન્ડિયાના દિગ્ગજ ખેલાડી વિરાટ કોહલી તેના આક્રમક સ્વભાવ માટે જાણીતો છે અને આજે ફરી કોહલીના આ સ્વભાવનો બધાને પરિચય મળ્યો હતો.ભારતીય ક્રિકેટ ટીમ ઓસ્ટ્રેલિયાના પ્રવાસ પર છે, જ્યાં તે યજમાન ટીમ સામે 5 મેચની ટેસ્ટ સીરિઝમાં વ્યસ્ત છે. ત્યારે આજે ટેસ્ટના પ્રારંભે કોહલીએ પોતાના પરનો કાબૂ ગુમાવી દીધો અને ઓસ્ટ્રેલિયાના 19 વર્ષીય બેટર અને ડેબ્યૂટન્ટ સેમ કોન્સ્ટાસને ધક્કો માર્યો હતો. ત્યારે ICCએ કોહલીને સજા ફટકારી છે. ICCએ 5 કલાકમાં જ વિરાટ કોહલી વિરુદ્ધ કડક કાર્યવાહી કરીને મેચ ફીના 20% દંડ અને એક ડિમેરિટ પોઈન્ટ આપવામાં આવ્યો છે.

ઓસ્ટ્રેલિયાની ઇનિંગ્સની 10મી ઓવર મોહમ્મદ સિરાજે ફેંકી હતી અને છેલ્લા બોલ પર એક રન આવ્યો હતો. આ પછી, કોન્સ્ટાસ બીજી બાજુ જઈ રહ્યો હતો ત્યારે સામેથી વિરાટ કોહલી સામે આવી ગયો હતો અને યુવા ખેલાડીને ધક્કો મારી દીધો હતો. જવાબમાં કોન્સ્ટાસે કોહલીને કંઈક કહ્યું અને કોહલીએ પણ તેને કાંઇક જવાબ આપ્યો..બંને વચ્ચે ચર્ચા વધુ આગળ વધે તે પહેલાં ઉસ્માન ખ્વાજા અને ઓન-ફીલ્ડ અમ્પાયર માઈકલ ગોફે મામલો શાંત પાડ્યો હતો.

"Have a look where Virat walks. Virat's walked one whole pitch over to his right and instigated that confrontation. No doubt in my mind whatsoever."

– Ricky Ponting #AUSvIND pic.twitter.com/zm4rjG4X9A
— 7Cricket (@7Cricket) December 26, 2024

કોહલી સસ્પેન્શનમાંથી બચી ગયો !

એટલે કે આ નિર્ણયને કારણે વિરાટ કોહલી સસ્પેન્શનમાંથી બચી ગયો. ICC એ લગભગ પાંચ કલાકમાં કોહલી વિરુદ્ધ કાર્યવાહી કરી છે, જેના કારણે ચાહકો આશ્ચર્યચકિત છે. ICCએ આ નિર્ણય ટેસ્ટ મેચના પહેલા જ દિવસે આપ્યો છે. મોટા ભાગના કિસ્સાઓમાં, ખેલાડી સામેની કાર્યવાહી ટેસ્ટ મેચની સમાપ્તિ પછી જાહેર કરવામાં આવે છે. વિરાટ-કોન્સ્ટસ કેસમાં આ નિર્ણય દુર્લભ ગણી શકાય.

વિરાટ કોહલીને ICC આચાર સંહિતા (CoC)ની કલમ 2.12 માટે દોષિત ઠેરવવામાં આવ્યો છે. આ અંતર્ગત ક્રિકેટમાં કોઈપણ પ્રકારના અયોગ્ય શારીરિક સંપર્ક પર પ્રતિબંધ છે. જો કોઈ ખેલાડી ઈરાદાપૂર્વક/બેદરકારીપૂર્વક અન્ય ખેલાડી અથવા અમ્પાયર સાથે અથવા ખભા સાથે અથડાય છે, તો તેને દંડ અથવા સસ્પેન્ડ થઈ શકે છે.

વિરાટ કોહલીને 2019 પછી પહેલીવાર ડીમેરિટ પોઈન્ટ મળ્યા

વિરાટ કોહલીને 2019 પછી પહેલીવાર કોઈ ડીમેરિટ પોઈન્ટ મળ્યા છે. ડીમેરિટ પોઈન્ટ્સ ખેલાડીના રેકોર્ડ પર બે વર્ષ સુધી રહે છે. 19 વર્ષીય કોન્સ્ટાસે પોતાની ડેબ્યૂ ટેસ્ટ રમીને બેટથી પ્રભાવિત કર્યા હતા. કોસ્ટાસે ઓસ્ટ્રેલિયાના પ્રથમ દાવમાં 65 બોલમાં 60 રન બનાવ્યા જેમાં 6 ચોગ્ગા અને બે છગ્ગાનો સમાવેશ થાય છે.

પોન્ટિંગ-શાસ્ત્રી કોહલીથી નારાજ

ઓસ્ટ્રેલિયાના પૂર્વ કેપ્ટન રિકી પોન્ટિંગે વિરાટ કોહલી પર સવાલ ઉઠાવ્યા હતા. પોન્ટિંગે કોમેન્ટ્રી દરમિયાન કહ્યું હતું કે, ‘મને કોઈ શંકા નથી કે અમ્પાયર અને રેફરી આના પર ચાંપતી નજર રાખશે. તે સમયે ફિલ્ડરોએ બેટ્સમેનની નજીક ન હોવું જોઈએ. મેદાન પર હાજર દરેક ફિલ્ડર જાણે છે કે બેટ્સમેન ક્યાં ભેગા થશે અને એકસાથે મળશે. મને એવું લાગતું હતું કે કોન્સ્ટાસે લાંબા સમય સુધી જોયું અને તેને ખ્યાલ પણ ન આવ્યો કે તેની સામે કોઈ છે. કોહલીએ કદાચ કેટલાક સવાલોના જવાબ આપવા પડશે.

ભારતીય ક્રિકેટ ટીમના ભૂતપૂર્વ કોચ રવિ શાસ્ત્રીએ પણ કોહલીના આ પગલાને યોગ્ય ન માન્યું અને કહ્યું કે તે બિનજરૂરી છે. શાસ્ત્રીએ કહ્યું, ‘એક મર્યાદા છે અને તમે તે મર્યાદાને ઓળંગવા માંગતા નથી.’

ભારતીય ક્રિકેટ કંટ્રોલ બોર્ડ (BCCI) એ આ વર્ષે માર્ચમાં તેના ટેસ્ટ રમતા ખેલાડીઓની મેચ ફી વધારવાની જાહેરાત કરી હતી. સિઝનની 75% મેચો રમનારા ખેલાડીઓને એક ટેસ્ટ રમવા માટે 45 લાખ રૂપિયા મળશે, જ્યારે 50% થી 74% મેચ રમનારા ખેલાડીઓને 30 લાખ રૂપિયા મળશે. આ મેચ ફી કેન્દ્રીય કરાર ઉપરાંત આપવામાં આવશે.

MCG ટેસ્ટ માટે ઓસ્ટ્રેલિયાની પ્લેઈંગ ઈલેવન: ઉસ્માન ખ્વાજા, સેમ કોન્સ્ટન્સ, માર્નસ લાબુશેન, સ્ટીવ સ્મિથ, ટ્રેવિસ હેડ, મિશેલ માર્શ, એલેક્સ કેરી (વિકેટકીપર), પેટ કમિન્સ (કેપ્ટન), મિચેલ સ્ટાર્ક, નાથન લિયોન, સ્કોટ બોલેન્ડ.

MCG ટેસ્ટ માટે ભારતના પ્લેઈંગ-11: યશસ્વી જયસ્વાલ, રોહિત શર્મા (કેપ્ટન), કેએલ રાહુલ, વિરાટ કોહલી, ઋષભ પંત (વિકેટકીપર), નીતિશ કુમાર રેડ્ડી, રવિન્દ્ર જાડેજા, વોશિંગ્ટન સુંદર, આકાશ દીપ, જસપ્રિત બુમરાહ અને મોહમ્મદ સિરાજ.