‘આઈ લવ મોહમ્મદ’ લખેલી રંગોળી બનાવ્યા બાદ બબાલ : મહારાષ્ટ્રના અહિલ્યાનગરની ઘટના : પોલીસે કર્યો લાઠીચાર્જ
ઉત્તરપ્રદેશમાં આઈ લવ મોહમ્મદ લખેલા પોસ્ટરનો વિખવાદ અને ઘમાસાણ ચાલી જ રહ્યા છે અને તેની આગ હવે મહારાષ્ટ્ર સુધી પહોંચી ગઈ છે. મહારાષ્ટ્રના અહિલ્યાનગરમાં “આઈ લવ મોહમ્મદ” ના નારાને લઈને હોબાળો મચી ગયો છે. પોલીસના જણાવ્યા અનુસાર, “કેટલાક અજાણ્યા લોકોએ ‘આઈ લવ મોહમ્મદ’ શબ્દોવાળી રંગોળી બનાવી હતી. મુસ્લિમ સમુદાયના સભ્યોએ આને પયગંબર મુહમ્મદનું અપમાન માન્યું અને પોલીસ સ્ટેશનની બહાર વિરોધ કરવા માટે મોટી સંખ્યામાં એકઠા થઇ ગયા હતા. આ ટોળાને વિખેરવા માટે પોલીસે લાઠીચાર્જ કરવો પડ્યો હતો.
પોલીસે જણાવ્યું હતું કે, “ઘટનાની નોંધ લેતા, રંગોળી બનાવનારા લોકોની ઓળખ કરવામાં આવી હતી અને પરિસ્થિતિને કાબૂમાં લેવા માટે બે લોકો સામે કેસ નોંધવામાં આવ્યો હતો. એક આરોપી પોલીસ કસ્ટડીમાં છે. ભીડને કાબૂમાં લેવા માટે પોલીસે કેટલીક જગ્યાએ હળવો બળપ્રયોગ કરવો પડ્યો હતો.”
પોલીસના જણાવ્યા અનુસાર, શહેરમાં સુરક્ષા વધારી દેવામાં આવી છે અને લોકોને કોઈપણ અફવાઓ પર વિશ્વાસ ન કરવાની સલાહ આપવામાં આવી છે. પોલીસે અત્યાર સુધીમાં 30 લોકોની અટકાયત કરી છે. પ્રાથમિક માહિતી અનુસાર, મહારાષ્ટ્રના અહિલ્યાનગરમાં એક રસ્તા પર કેટલાક અજાણ્યા વ્યક્તિઓએ “આઈ લવ મોહમ્મદ” શબ્દો લખ્યા હતા. આ કૃત્ય ધાર્મિક લાગણીઓને ઠેસ પહોંચાડે છે, જેના કારણે સેંકડો ગુસ્સે ભરાયેલા મુસ્લિમ સમુદાયના સભ્યોએ શહેરના કોતવાલી પોલીસ સ્ટેશન સામે વિરોધ પ્રદર્શન કર્યું.
