ત્રણ બાળકોએ આઠ વર્ષની બાળકી પર સામૂહિક દુષ્કર્મ આચરી હત્યા કરી

હે ભગવાન! આ તે કેવા દિવસો આવ્યા?

આંધ્રપ્રદેશમાં બની આઘાતજનક ઘટના:બે આરોપી 12 વર્ષના,ત્રીજાની ઉંમર 13 વર્ષ

આંધ્ર પ્રદેશના નાંડયલા જિલ્લાના મુચૂમારી ગામમાં ત્રણ બાળકોએ આઠ વર્ષની માસૂમ બાળકી ઉપર સામૂહિક દુષ્કર્મ આચરી બાદમાં તેની હત્યા કરી નાખી હતી.

સમાજને સ્તબ્ધ કરી દે તેવી આ ઘટનાની પ્રાપ્ત વિગતો અનુસાર ત્રીજા ધોરણમાં અભ્યાસ કરતી આ બાળકી રવિવારથી ગુમ થઈ ગયા બાદ પરિવારજનોની ફરિયાદને પગલે પોલીસે સઘન શોધખોળ હાથ ધરી હતી.જો કે તેમાં સફળતા ન મળતા ડોગ સ્કોવડનો ઉપયોગ કરાયો હતો અને એ ડોગ પોલીસને ત્રણ બાળકો સુધી દોરી ગયો હતો.

પોલીસના જણાવ્યા અનુસાર એ ત્રણે બાળકો ભોગ બનેલી બાળકીની શાળાના જ વિદ્યાર્થી છે.તે પૈકીના 12 વર્ષના બે બાળકો છઠ્ઠા ધોરણમાં અને 13 વર્ષનો બાળક સાતમા ધોરણમાં અભ્યાસ કરે છે.

પોલીસે કરેલી પૂછપરછમાં આ ત્રણેયએ ગુનો કબુલી લીધો હતો. તેમણે જણાવ્યા અનુસાર એ બાળકી બગીચામાં રમતી હતી ત્યારે તેઓ તેની સાથે રમવા લાગ્યા હતા અને પછી મૂચૂમારી ડેમ નજીક આવેલા અવાવરૂ સ્થળે લઈ જઈ ત્રણેય એ તેની ઉપર દુષ્કર્મ ગુજાર્યું હતું. બાદમાં જો બાળકી જીવતી રહે તો ભાંડો ફૂટી જવાના ડરથી તેની હત્યા કરી લાશને નહેરમાં ફેંકી દીધી હતી. તેમની આ કબુલાત બાદ પોલીસે લાશ ની શોધખોળ હાથ ધરી છે.