સ્કૂલ ચલે હમ: દિવાળી વેકેશન પૂરું, આજથી શાળાઓ શરૂ ; 135 દિવસનું હશે બીજું શૈક્ષણિક સત્ર
નવેમ્બર અને ડિસેમ્બરમાં વિવિધ સ્કૂલોમાં રમતોત્સવ, પ્રવાસના આયોજનો: મિશનરી સ્કૂલમાં
નાતાલની ઉજવણી: 135 દિવસનું બીજું શૈક્ષણિક સત્ર
સ્કૂલ ચલે હમ…. આજથી દિવાળી વેકેશન પૂરું થતાં બાળકોથી શાળાઓ ગુંજી ઉઠશે. રાજકોટની સરકારી, ગ્રાન્ટેડ બિન ગ્રાન્ટેડ અને ખાનગી સ્કૂલોમાં આજથી દિવાળી વેકેશન પૂરું થયું છે. રજાની મજા માણ્યા બાદ વિદ્યાર્થીઓ ફરીથી સ્કૂલબેગ અને પુસ્તકો વચ્ચે વ્યસ્ત થઈ જશે.
આ વર્ષે અમુક ખાનગી શાળાઓમાં દિવાળી વેકેશન એક અઠવાડિયા અગાઉ ટૂંકાવી દેવામાં આવ્યું હતું ત્યારે વિદ્યાર્થી સંસ્થાઓ દ્વારા જેનો વિરોધ કરવામાં આવ્યો હતો. આવી વાત વચ્ચે પણ ઘણી શાળાઓ ચાલુ રહી હતી.
દિવાળી વેકેશન પૂરું થતાં બીજું શૈક્ષણિક સત્ર શરૂ થઈ જશે. આગામી ડિસેમ્બર મહિનામાં શાળાઓમાં રમતોત્સવ અને મિશનરી શાળાઓમાં વાર્ષિક ઉત્સવની ઉજવણીની તૈયારીઓ શરૂ થઈ જશે. આ ઉપરાંત શાળાઓમાં પ્રવાસ માટેની શિક્ષણ વિભાગ દ્વારા છૂટ આપવામાં આવતા મોટાભાગની શાળાઓ દ્વારા નવેમ્બર ડિસેમ્બરમાં પ્રવાસના આયોજનો થતા હોય છે જેની તૈયારીઓ થઈ રહી છે.
શિક્ષણ વિભાગે 27 ઓક્ટોબર થી 17 નવેમ્બર સુધી તમામ શાળાઓમાં વેકેશન જાહેર કર્યું હતું. હવે આ વેકેશન પૂરું થતાં બીજા સત્રનો પ્રારંભ થયો છે જે 135 દિવસનો રહેશે. આ દરમિયાન ફેબ્રુઆરી થી માર્ચ મહિનામાં બોર્ડની પરીક્ષા લેવાશે ત્યારબાદ ચાર મે ના રોજ ધોરણ એક થી લઇ ધોરણ 11 નું બીજું સત્ર પૂરું થશે. મોટું એટલે કે ઉનાળુ વેકેશન તારીખ 5 મેથી આઠ જૂન દરમિયાન પડશે.
