રાજકોટ પોલીસ આવી એકશન મોડમાં : નામચીન મહિલાના પતિના મકાન પર ફેરવ્યું બૂલડોઝર, રૈયાધાર સહિતના વિસ્તારોમાં પણ ઓપરેશન
- ડ્રગ્સ, જુગાર સહિતના કાળાધંધામાં પોલીસ ચોપડે ચડેલી રમા સંધીના પતિના જંગલેશ્વર સહિત ગેરકાયદે
- બાંધકામ DCP, PI મોટા કાફલા સાથે પહોંચી તોડી પાડયું: રૈયાધાર સહિતના વિસ્તારોમાં પણ ઓપરેશન
રાજ્યભરમાં અસામાજિક તત્વો ગુનેગારો પર ૧૦૦ કલાકના અલ્ટિમેટમ સાથે તૂટી પડવાના ડીજીપીના આદેશને પગલે રાજકોટ શહેર પોલીસ પણ એક્શન મોડમાં આવી છે. આજે સમીસાંજ બાદ રાજકોટની કૂખ્યાત મહિલા રમા સંધીના પતિના ગેરકાયદે બાંધકામ પર બુલડોઝર ફેરવીને પોલીસ ધારે તો શું ન કરી શકે ? તે ધાક પ્રસ્થાપિત કરવા માટેનો આરંભ કર્યો છે. જંગલેશ્વર વિસ્તારમાં બુલડોઝરની ધણધણાટી બોલતા અન્ય ગુનેગારોમાં પણ પોલીસનો ફફડાટ દેખાયો છે. બર્પોર બાદ શહેર પોલીસની અલગ-અલગ ટીમો ગુનાઈત પ્રવૃત્તિ ધરાવતા વિસ્તારોમાં પહોંચી હતી અને ચેકિંગ હાથ ધરી વીજ કનેકશનોથી લઈ અન્ય કોઈ ગેરકાયદે કૃત્યો થઈ રહ્યા છે કે કેમ ? તેની ચકાસણી કરી હતી.
રાજકોટ શહેર પોલીસે ૭૫૬ અસામાજિક તત્વોની યાદી જાહેર કરી અને ૧૦૦ કલાક પૂર્વે જ અલ્ટિમેટમનું શુભમુહૂત કરવા માટે આજે ભક્તિનગર પોલીસ મથક વિસ્તારમાં આવેલા જંગલેશ્વરમાં રહેતી અને ડ્રગ્સ સપ્લાય, જુગાર જૈવીતી ડેરી ફાર્મ સહિતના ગુનાઓમાં પોલીસ ચોપડે ચડી ચૂકેલી રમા સંધીના પતિ જાવેદ જુસબભાઈ જુણેજાના જંગલેશ્વર શેરી નં.૬માં આવેલા બે મજલાના ગેરકાયદે મકાનને તોડી પાડવા માટે બુલડોઝર લઈને પોલીસ પહોંચી હતી.
જાવેદ થોડા વખત પહેલા જ ગાંજાના જથ્થા સાથે પકડાયો હતો. સંવેદનશીલ ગણાતા વિસ્તારમાં ઓપરેશન બુલડોઝર સમયે કોઈ અનિચ્છનીય ઘટના ન બને તે માટે ડીસીપી ક્રાઈમ ડો.પાર્થરાજસિંહ ગોહિલ, ડીસીપી ઝોન-૧ સજ્જનસિંહ પરમાર, ભક્તિનગર પીઆઈ એમ.એમ. સરવૈયા, એસઓજી પીઆઈ એસ.એમ.જાડેજા અને અન્ય અધિકારીઓ પોલીસના ધાડા સાથે પહોંચ્યા હતા. મકાન તોડી પાડવાની કામગીરી કરાઈ હતી.
જંગલેશ્વર વિસ્તારમાં અન્ય પણ આવા કેટલાક બાંધકામો હોવાની ઓપરેશન સમયે પોલીસમાં ચર્ચા ચાલતી હતી અને કદાચ આવનારા સમયમાં આવા બાંધકામો પણ નિશાના પર આવી શકે. ક્રાઈમ બ્રાન્ચ યુનિવર્સિટી પોલીસ શહેરની અન્ય પોલીસ દ્વારા તેમના વિસ્તારમાં ગુનાઈત પ્રવૃત્તિ ધરાવતા અસામાજિક તત્વોના રહેણાંકો અને તેમના વિસ્તારોમાં સાંજે ચેકિંગ હાથ ધરાયું હતું અને ઘણી ખરી જગ્યાએ ગેરકાયદે પ્રવૃત્તિ મળતા આવા ઇસમો સામે રાત સુધીમાં કાયદાકીય કાર્યવાહી થઈ શકે તેવી સંભાવના છે.
