રાજકોટ : 17 વર્ષનો સગીર, 14 વર્ષની બાળકી; સ્નેપચેટમાં બે દિ’ વાત કરી, ત્રીજા દિવસે ગુજાર્યું દુષ્કર્મ !!

• સોશ્યલ મીડિયા કેટલી હદે નુકસાનકારક છે, કેવું પરિણામ આપે છે તેનું જીવંત ઉદાહરણ
• એડવોકેટનો પુત્ર મિત્ર પાસેથી કાર લઈ આવ્યો, તેમાં બે મિત્ર અને ૧૪ વર્ષની સગીરાને બેસાડી રૈયા રોડ પર આલાપ ગ્રીન સિટી પાસે લઈ ગયો, મિત્રને બહાર મોકલ્યા’ને પછી દેહ અભડાવ્યો
• કથિત પત્રકારની આગલા ઘરની પુત્રી તેની નાની બહેનને રમાડવા બગીચામાં લઈ જતી હોય ત્યાંથી બન્ને વચ્ચે થયો’તો સંપર્ક: સગીરની ધરપકડ

અત્યારે નાનું બાળક હોય કે મોટેરા હોય દરેકના હાથમાં મોબાઈલ ન જોવા મળે તો જ અચરજ પામવા જેવું રહે છે. ખાસ કરીને બાળક તેમજ સગીર કે જેમને મૂછનો દોરો પણ ફૂટ્યો ન હોય તેઓ સોશ્યલ મીડિયા પર તરેહ તરેહની એપ્લીકેશનના રવાડે ચડી જતા હોય તેનો ફાયદો તો બિલકુલ થતો નથી પરંતુ ગેરફાયદો જરૂર થાય છે. રાજકોટમાં આવો જ એક ચોંકાવનારો કિસ્સો પ્રકાશમાં આવ્યો છે જે સગીર હોય કે સગીરા તેમને મોબાઈલ અને સોશ્યલ મીડિયાનો ઉપયોગ કરવા દેવામાં આવે તો કેવું નુકસાનદાયક પરિણામ આપે છે તેની ગવાહી પૂરી રહ્યો છે. ૧૭ વર્ષ ૬ મહિનાની ઉંમરના સગીરે ૧૪ વર્ષની બાળકી ઉપર કારની અંદર દુષ્કર્મ ગુજારતાં સનસનાટી મચી જવા પામી હતી.

આ અંગે પોલીસ સૂત્રો પાસેથી જાણવા મળેલી વિગતો મુજબ દુષ્કર્મને અંજામ આપનાર ૧૭ વર્ષ ૬ મહિનાના સગીરના પિતા એડવોકેટ છે જ્યારે ભોગ બનનાર ૧૪ વર્ષીય સગીરાના પિતા કથિત પત્રકાર હોવાનું ધ્યાન પર આવ્યું છે. જો કે આ બાળકી કથિત પત્રકારની આગલા ઘરની બાળકી હોવાનું પણ ખુલ્યું છે.

૧૪ વર્ષીય સગીરા તેની નાની બહેનને બગીચામાં રમવા માટે લઈ જતી હોય સગીર પણ ત્યાં નિયમિત અવર-જવર કરતો હતો. આ પછી બન્ને વચ્ચે ગત ૧૨ ફેબ્રુઆરીએ મુલાકાત થતાં એકબીજાના સ્નેપચેટ આઈડીની આપ-લે કર્યા બાદ વાતચીત કરવા લાગ્યા હતા. બન્નેએ બે દિવસ સુધી વાત કર્યા બાદ મળવાનું નક્કી કરવામાં આવ્યું હતું. ત્યારબાદ સગીરા કે જે ધો.૯માં અભ્યાસ કરે છે તે મહેંદી મુકાવવા તેની બહેનપણીના ઘેર ગઈ હતી ત્યાંથી મતલબ કે કનૈયા ચોકમાંથી કાળા કલરની કાળા કાચવાળી વર્ના કારમાં બેસાડીને રૈયા રોડ પર આલાપ ગ્રીન સિટીની બાજુમાં નાયરાના પેટ્રોલપંપની પાછળના ભાગે લઈ ગયો હતો. આ વેળાએ કારમાં સગીર-સગીરા તેમજ સગીરના બે મીત્રો પણ હાજર હતા પરંતુ તે બન્નેને નાસ્તો લેવા માટે બહાર મોકલીને સગીરે સગીરા ઉપર કારની પાછળની સીટ પર દુષ્કર્મ ગુજાર્યું હતું. સગીરે આ દુષ્કર્મ બપોરે ત્રણથી સાડા ચાર વાગ્યા દરમિયાન ગુજાર્યું હોવાનું પણ પોલીસ તપાસમાં સામે આવ્યું છે. પોતાની પુત્રી તેની બહેનપણીના ઘેર ન હોવાનું જાણવા મળતાં જ વાલીએ તેને ફોન કર્યો હતો પરંતુ ત્યારે તે ખોટું બોલી હતી અને કહ્યું હતું કે તે તેની બહેનપણીના ઘરે છે. આ પછી સગીર આરોપી તેને ફટાફટ બહેનપણીના ઘેર મુકી ગયો હતો જ્યાં અગાઉથી જ સગીરાના વાલીઓ હાજર હોય સમગ્ર મામલો ઉજાગર થવા પામ્યો હતો.

સગીરાની માતાની ફરિયાદના આધારે ગાંધીગ્રામ પોલીસ મથકના પીઆઈ એસ.આર.મેઘાણીના માર્ગદર્શન હેઠળ ટીમે સગીરની ધરપકડ કરી આગળની કાર્યવાહી હાથ ધરી હતી.

માત્ર ૧૭ વર્ષની ઉંમરે ગાડી ચલાવતાં પણ શીખી ગયો, સ્નેપચેટ પણ બરાબર આવડવા લાગ્યું !

મોબાઈલની ઘેલછા કેવી માઠી અસર કરે છે તેનો ખ્યાલ ઉપરોક્ત બનાવ પરથી આવી જાય છે. આશ્ચર્યની વાત તો એ છે કે ૧૭ વર્ષની ઉંમરે સગીરને કાર ચલાવતાં પણ આવડી ગયું હતું. વળી, તેને સરળતાથી કાર પણ મળી જતાં તે ચલાવીને જ સગીરા સુધી પહોંચ્યો હતો અને ત્યાંથી તેને કારમાં બેસાડી કાર પણ ચલાવી હતી. સગીર હોવાથી સ્વાભાવિક રીતે લાયસન્સ ન હોવા છતાં તેણે ડ્રાઈવિંગ કર્યું હતું આમ છતાં સગીરના માતા-પિતા આ બાબતથી અજાણ જ રહી ગયા હોય બાળકે આટલી નાની ઉંમરે ગંભીર ગુનાને અંજામ આપી દીધો હતો.

અમારું માથું શરમથી ઝૂકી ગયું છે, ક્યારેય ન ભૂંસાય તેવો ડાઘ લાગ્યો: પિતાનો વલોપાત

પુત્રએ ૧૪ વર્ષની બાળકી ઉપર દુષ્કર્મ ગુજાર્યું હોવાની ફરિયાદ નોંધાતાં જ ૧૭ વર્ષ ૬ મહિનાની ઉંમર ધરાવતાં સગીરના એડવોકેટ પિતા પોલીસ મથકે હાંફળાફાંફળા દોડી આવ્યા હતા અને પોલીસ સમક્ષ રીતસરના ભાંગી પડ્યા હતા. પિતાએ ભારે હૈયે કેફિયત આપી હતી કે અમારું માથું શરમથી ઝૂકી ગયું છે કેમ કે આટલી નાની ઉંમરે બાળક તેમજ પરિવાર ઉપર ક્યારેય ન ભૂંસાય તેવો ડાઘ લાગ્યો છે !