મોબાઇલના ગ્રાહકોને બખ્ખા; હવે નેટવર્ક ઠપ થાય તો વળતર મળશે
ટ્રાઇ નવા નિયમો બનાવી રહી છે, બિલમાં પણ છૂટછાટ મળશે
મોબાઈલ અથવા તો બ્રોડબેન્ડ સર્વિસનો ઉપયોગ કરનારા ગ્રાહકો માટે શનિવારે સારા સમાચાર આવ્યા હતા. હવે ટેલિકોમ સર્વિસ (મોબાઈલ અને બ્રોડબેન્ડ) ઠપ થવા બદલ કંપનીએ ગ્રાહકોને વળતર ચૂકવવું પડશે. ટેલિકોમ રેગ્યુલેટરી ઓથોરિટી ઓફ ઈન્ડિયા (ટ્રાઈ) ગ્રાહકોના હિતમાં એક નવો નિયમ લાગુ કરવા જઈ રહી છે. નવા નિયમથી બિલમાં પણ છૂટછાટ મળશે. 6 માસ બાદ નિયમો લાગુ થશે.
ટ્રાઈ દ્વારા શુક્રવારે બહાર પાડવામાં આવેલા નવા સર્વિસ ક્વોલિટી નિયમ હેઠળ જિલ્લા સ્તર પર 24 કલાકથી વધુ સમય સુધી સર્વિસ ઠપ રહેવાની સ્થિતિમાં ટેલિકોમ ઓપરેટરોએ ગ્રાહકોને વળતર આપવું પડશે. ટ્રાઈના નવા નિયમો હેઠળ દરેક ક્વોલિટી બેન્ચમાર્કને પૂર્ણ કરવામાં નિષ્ફળ રહેવા બદલ દંડની રકમ 50,000 થી વધારીને 1 લાખ રૂપિયા કરી દેવામાં આવી છે. નવા નિયમોને છ મહિના પછી લાગુ કરી દેવામાં આવશે.
રેગ્યુલેટર અને રિવાઈઝ્ડ રેગ્યુલેશન: ધ સ્ટેન્ડર્ડ ઓફ ક્વોલિટી ઓફ સર્વિસ ઓફ એક્સેસ (વાયરલાઈન અને વાયરલેસ) એન્ડ બ્રોડબોન્ડ (વાયરલાઈન અને વાયરલેસ) સર્વિસ રેગ્યુલેશન 2024 હેઠળ નિયમોના ઉલ્લંઘનના વિવિધ ધોરણો માટે 1 લાખ રૂપિયા, 2 લાખ રૂપિયા, 5 લાખ અને 10 લાખ રૂપિયાની ગ્રેડ પેનલ્ટી સિસ્ટમ શરૂ કરવામાં આવી છે.
નવા નિયમોમાં ત્રણ અલગ-અલગ રેગ્યુલેશન: બેઝિક અને સેલ્યુલર મોબાઈલ સર્વિસ, બ્રોડબેન્ડ સર્વિસ અને બ્રોડબેન્ડ વાયરલેસ સર્વિસ માટે ક્વોલિટી ઓફ ક્વોલિટીનું સ્થાન લે છે. કોઈ જિલ્લામાં નેટવર્ક ઠપ થવાની સ્થિતિમાં ટેલિકોમ ઓપરેટરોએ નવા નિયમો પ્રમાણે પોસ્ટપેડ ગ્રાહકો માટે ભાડામાં રાહત આપવી પડશે અને પ્રીપેડ ગ્રાહકો માટે વેલિડિટી વધારવી પડશે.
ટ્રાઈએ કહ્યું કે, જો કોઈ નેટવર્ક આઉટેજ 24 કલાકથી વધુ સમય સુધી ચાલુ રહે છે તો સર્વિસ પ્રોવાઈડરને આગલા બિલિંગ સાઈકલમાં અસરગ્રસ્ત જિલ્લામાં રજિસ્ટર્ડ પોસ્ટપેડ ગ્રાહકોને સર્વિસ આઉટેજના વાસ્તવિક દિવસોની સંખ્યા માટે સબસ્ક્રાઈબડ ટેરિફ પ્લાન પ્રમાણે પ્રપોશનલ ભાડામાં છૂટ આપવી પડશે.
રેગ્યુલેટર એક કેલેન્ડર દિવસમાં 12 કલાકથી વધુ નેટવર્ક આઉટેજ સમયગાળાને ભાડામાં છૂટ અથવા વેલિડિટી વધારવા માટે એક સંપૂર્ણ દિવસ તરીકે ગણશે. નવા નિયમોમાં કહેવામાં આવ્યું છે કે, ટોલિકોમ ઓપરેટરોને સર્વિસ ઠીક કરવા માટે એક અઠવાડિયાનો સમય આપવામાં આવશે. જો કે, કુદરતી આફતોના કારણે થતા વિક્ષેપોને વેલિડિટી એક્સ્ટેંશન માટે માનવામાં નહીં આવશે.
