પૂર્વ ક્રિકેટર વીરેન્દ્ર સેહવાગના ભાગેડુ ભાઈની પોલીસે કરી ધરપકડ : જાણો શું છે સમગ્ર મામલો  

ટીમ ઈન્ડિયાના ભૂતપૂર્વ ખેલાડી વીરેન્દ્ર સેહવાગનો પરિવાર મુશ્કેલીમાં મુકાઈ ગયો છે. સેહવાગના ભાઈ વિનોદ સેહવાગની પોલીસે ધરપકડ કરી છે. એક અહેવાલ મુજબ, વિનોદ સેહવાગનો ચેક બાઉન્સનો કેસ કોર્ટમાં ચાલી રહ્યો છે. મહત્વની વાત એ છે કે આ મામલો 7 કરોડ રૂપિયા સાથે સંબંધિત છે. કોર્ટમાં હાજર ન રહેવા બદલ તેને ભાગેડુ પણ જાહેર કરવામાં આવ્યો છે.

ચંદીગઢના મણિમજરા પોલીસ સ્ટેશનની પોલીસે વિરેન્દ્ર સેહવાગના ભાઈ વિનોદની ધરપકડ કરી છે. તેમનો 7 કરોડ રૂપિયાનો ચેક બાઉન્સ કેસ કોર્ટમાં ચાલી રહ્યો છે. આ મામલે તેમને કોર્ટમાં હાજર રહેવું પડ્યું. પણ તે ત્યાં દેખાયો નહીં. આ કારણે તેને ભાગેડુ જાહેર કરવામાં આવ્યો હતો. હિન્દુસ્તાન ટાઈમ્સના અહેવાલ મુજબ, ધરપકડ બાદ તેમને કોર્ટમાં રજૂ કરવામાં આવ્યા હતા. અહીં કોર્ટે તેને ન્યાયિક કસ્ટડીમાં મોકલી દીધો છે.

શું છે સમગ્ર મામલો ?

આ મામલો 2018નો હતો જ્યારે હિમાચલ પ્રદેશના બદ્દીમાં શ્રી નૈના પ્લાસ્ટિક નામની કંપનીએ જાલ્ટા કંપની પાસેથી સામાન મગાવ્યું હતું. આ ડીલ હેઠળ જાલ્ટા કંપનીએ કુલ 7 કરોડ રૂપિયાના 7 ચેક ઈશ્યૂ કર્યા હતા. પણ આ ચેક બેન્કમાં જમા કર્યા તો પૂરતું બેલેન્સ ન હોવાને કારણે ચેક બાઉન્સ થયો હતો.

કંપનીએ મજબૂર થઈ ફરિયાદ કરી…

આરોપ છે કે નૈના પ્લાસ્ટિક કંપનીએ જ્યારે જાલ્ટા કંપનીનો સંપર્ક સાધ્યો તો પણ પેમેન્ટ ન ચૂકવાયું. તેના પછી કાનૂની નોટિસ મોકલી 15 દિવસમાં પૈસાની માગ કરવામાં આવી તેમ છતાં પેમેન્ટ ન મળ્યું. મજબૂર થઇને નૈના પ્લાસ્ટિકે 2018માં જાલ્ટા કંપની અને ત્રણ ડિરેક્ટર વિષ્ણુ મિત્તલ, સુધીર મલ્હોત્રા અને વિનોદ સેહવાગ સામે કેસ દાખલ કરાવ્યો હતો.

વીરેન્દ્ર સેહવાગના ભાઈનો ચોંકાવનારો દાવો

2018-2019 દરમિયાન આ મામલે નીચલી અદાલતોમાં સુનાવણી કરાઈ અને જામીનપાત્ર તથા પછીથી બિનજામીનપાત્ર વોરન્ટ ઈશ્યૂ થયા. 22 જુલાઈ 2019ના રોજ વીરેન્દ્ર સેહવાગનો ભાઈ વિનોદ સેહવાગે કોર્ટમાં અપીલ કરી અને 2 લાખ રૂપિયાના બોન્ડ પર જામીન મેળવી લીધા. ત્યારબાદ ઓક્ટોબર 2019માં સેશન કોર્ટના સમન્સને પડકાર્યો અને કોર્ટમાં દાવો કર્યો કે હું ન તો કંપનીનો ડિરેક્ટર છું અને ન તો કર્મચારી.