દિલ્હીથી મોસ્કો જઈ રહેલું પ્લેન અફઘાનિસ્તાનમાં ક્રેશ
દિલ્હીથી મોસ્કો જઈ રહેલું એક વિમાન અફઘાનિસ્તાનના બદખ્શાનના વાખાન વિસ્તારમાં ક્રેશ થયું હતું. એક અફઘાન મીડિયા એજન્સીએ આ ક્રેશ અંગે જાણકારી આપી છે. અફઘાનિસ્તાનની સ્થાનિક ટેલિવિઝન ચેનલે જણાવ્યું હતું કે ઉત્તરી અફઘાનિસ્તાનના બદખ્શાન પ્રાંતમાં એક પેસેન્જર પ્લેન ક્રેશ થયું છે.અહેવાલ મુજબ આ પ્લેન ભારતથી ઉઝબેકિસ્તાન થઈને મોસ્કો જતી ચાર્ટર ફ્લાઇટ હતી.
અહેવાલ મુજબ અધિકારીએ જણાવ્યું કે ક્રેશ થયેલા વિમાન માટે કુરાન-વા-મુંજન જિલ્લાના તોપખાના વિસ્તારમાં એક ટીમ મોકલવામાં આવી છે. સ્થાનિક મીડિયાના અહેવાલ મુજબ બદખ્શાન પ્રાંતના પોલીસ કમાન્ડે જણાવ્યું કે વિમાન ગઈકાલે રાત્રે રડારમાંથી ગાયબ થઈ ગયું હતું. આ પછી તે જીબક જિલ્લાના પર્વતીય વિસ્તારમાં ક્રેશ થયું હતું.
કેન્દ્રીય નાગરિક ઉડ્ડયન મંત્રાલયે સ્પષ્ટતા કરી છે કે અફઘાનિસ્તાનના પર્વતોમાં જે વિમાન ક્રેશ થયું તે ભારતીય-શિડ્યુલ્ડ એરક્રાફ્ટ નહોતું અને ન તો નોન-શિડ્યુલ્ડ (NSOP)/ચાર્ટર એરક્રાફ્ટ હતું.
ડિરેક્ટોરેટ જનરલ ઓફ સિવિલ એવિએશન (ડીજીસીએ)ના એક વરિષ્ઠ અધિકારીના જણાવ્યા અનુસાર, પ્લેન મોરોક્કન-રજિસ્ટર્ડ ડીસી 10 એરક્રાફ્ટ હતું જે બદખ્શાન પ્રાંતના કુરાન-મુંજન અને ઝિબાક જિલ્લાના તોપખાના પર્વતોમાં ક્રેશ થયું હતું.
