નીતીશ કુમાર જ મુખ્યમંત્રી! બિહારમાં આ તારીખે થશે શપથવિધિ:ગાંધી મેદાનમાં તડામાર તૈયારી,PM મોદી રહેશે ઉપસ્થિત
બિહાર એનડીએ સરકારનો શપથગ્રહણ સમારોહ બુધવાર અથવા ગુરુવારે યોજાવાની ધારણા છે. વડાપ્રધાન નરેન્દ્ર મોદીના અન્ય કાર્યક્રમના આધારે તારીખ નક્કી કરવામાં આવશે. વિશ્વસનીય સૂત્રોના જણાવ્યા અનુસાર શનિવારે દિલ્હીમાં કેન્દ્રીય ગૃહ મંત્રી અમિત શાહના નિવાસ્થાને મળેલી બેઠકમાં પ્રધાનમંત્રીની રચના અંગે ફોર્મ્યુલા નક્કી થઈ ગઈ હતી. સૂત્રોએ સ્પષ્ટ કર્યું છે કે નીતીશકુમાર જ મુખ્યમંત્રી બનશે. આ ફોર્મ્યુલા અનુસાર દરેક પક્ષને છ ધારાસભ્યો દીઠ એક પ્રધાનપદ આપવામાં આવશે.
નીતિશ કુમારે સોમવારે કેબિનેટની બેઠક બોલાવી છે. આ બેઠકમાં આઉટગોઇંગ 17મી વિધાનસભાના વિસર્જનને મંજૂરીનો ઠરાવ પસાર થયા પછી, કુમાર રાજ્યપાલ ખાનને પોતાનું રાજીનામું સુપરત કરશે, જેનાથી સરકાર રચનાના આગામી તબક્કાનો માર્ગ મોકળો થશે.
ત્યારબાદ NDAના ઘટક પક્ષો ગઠબંધનના નેતાની પસંદગી કરવા માટે તેમના વિધાનસભા પક્ષની બેઠકો યોજશે અને પછી નવી સરકાર બનાવવાનો દાવો રજૂ કરશે.
ભાજપ કરશે ભવ્ય શક્તિ પ્રદર્શન
શપથવિધિ સમારવા માટે પટનાના ગાંધી મેદાનમાં તૈયારીઓ શરૂ થઈ ગઈ છે. તેમાં બંગાળની ચૂંટણી પહેલા ભાજપ ભવ્ય શક્તિ પ્રદર્શન કરશે. વડાપ્રધાન મોદી, ગૃહ મંત્રી અમિત શાહ, કેન્દ્રીય પ્રધાન મંડળના સભ્યો NDA શાસ્ત્રીત રાજ્યના મુખ્યમંત્રીઓ અને ઉપમુખ્યમંત્રીઓ તેમજ ભાજપના વરિષ્ઠ નેતાઓ ઉપસ્થિત રહેશે.
સૌથી વધારે મંત્રી ભાજપના
મંત્રીમંડળમાં ભાજપનો હિસ્સો સૌથી મોટો હોવાની શક્યતા છે, ત્યારબાદ જેડીયુનો સમાવેશ થાય છે, જેમાં નાના સાથી પક્ષોને પણ મંત્રીમંડળ યોજનામાં સ્થાન આપવામાં આવશે. ‘દરેક છ ધારાસભ્યો દીઠ એક મંત્રી’ ફોર્મ્યુલા મુજબ ભાજપને 15 કે 16 અને જેડીયુને 14 મંત્રી પદ મળે તેવી શક્યતા છે. કેન્દ્રીય મંત્રી ચિરાગ પાસવાનના નેતૃત્વ હેઠળની લોક જનશક્તિ પાર્ટી (રામ વિલાસ) ને ત્રણ મંત્રી પદ મળે તેવી શક્યતા છે. કેન્દ્રીય મંત્રી જીતન રામ માંઝીના હિન્દુસ્તાની અવમ મોરચા અને રાજ્યસભા સાંસદ ઉપેન્દ્ર કુશવાહાની રાષ્ટ્રીય લોક સમતા પાર્ટી (આરએલએસપી) ને એક-એક પદ મળી શકે છે.
