મોંઘેરા લગ્ન: રાજકોટમાં બોલીવુડના કલાકારોને બોલાવવાનો ક્રેઝ! સોનુ નિગમ,મલાઈકા સહિતની હસ્તીઓએ લગ્નમાં આપ્યું પરફોર્મન્સ
દેશના સેલિબ્રિટીઓ અને ખાસ કરીને બોલીવુડ અને ક્રિકેટરો માટે આજકાલ રાજકોટ મહત્વનું બની ગયુ છે. છેલ્લા એક અઠવાડિયામાં મનોરંજન અને ક્રિકેટ સાથે સંકળાયેલી અનેક સેલિબ્રિટી રાજકોટની મહેમાન બની છે અને એટલું જ નહી પરફોર્મ પણ કર્યું છે. ચાર દિવસ પહેલા એક લગ્નમાં મલાઈકા અરોરા અને સોનુ નિગમે ધમાકેદાર પરફોર્મન્સ આપ્યુ હતું તો શનિવારે અન્ય એક લગ્નમાં નુસરત ભરૂચા અને ક્રિશ્ના અભિષેક જેવા કલાકારોએ હાજરી આપીને ફેન્સનું ધ્યાન ખેંચ્યું હતું. આમ રાજકોટના મોંઘેરા લગ્નોમાં હવે બોલીવુડની સેલિબ્રિટીને બોલાવીને નવું જ આકર્ષણ ઉભુ કરવાનો ક્રેઝ ઉભો થયો છે તેવું લાગે છે.
રાજકોટ શહેર માટે આ સપ્તાહ યાદગાર રહ્યુ છે કારણ કે અહીં ફિલ્મી સિતારાઓ, જાણીતા ક્રિકેટરો અને સુપ્રસિદ્ધ સિંગરોની હાજરી રહી હતી. ક્રિષ્ના અભિષેકથી લઈને આમિર ખાન,સોનુ નિગમ અને છૈયા છૈયા ગર્લ મલાઈકા અરોરા સુધી અનેક સેલિબ્રિટીઓ રાજકોટમાં જોવા મળતા ફેન્સમાં ઉત્સાહની લહેર છવાઈ ગઈ હતી. એરપોર્ટ અને હોટેલોમાં કલાકારોની આસપાસ સેલ્ફી લેવા ફેન્સનો જબરો ઉત્સાહ જોવા મળ્યો હતો.
આ સિવાય ભેસાણ પાસે આવેલા પાટવડ ખાતે અંબાણી પરિવારના એક કાર્યક્રમમાં ફિલ્મી કલાકારો તેમજ ક્રિકેટરો અને સુપ્રસિદ્ધ સિંગરો બે દિવસ સુધી રોકાયા હતા. એના લીધે રાજકોટ કેશોદ અને જામનગર એરપોર્ટ આ સેલિબ્રિટીઓ માટે ચાર્ટર્ડ પ્લેનથી ધમધમ્યું હતુ.
રાજકોટના વૈશ્નાની અને આદ્રોજા પરિવારના યોજાયેલા જુદા જુદા લગ્ન સમારોહમાં બોલીવુડની મોટી મોટી હસ્તીએ હાજરી આપી હતી અને સ્ટેજ ગજાવ્યું હતુ. કોઈ પણ લગ્ન સમારોહ પહેલા બોલીવુડ નાઈટ યોજાય છે અને તેમાં એક સમારોહમાં મલાઈકા અરોરા અને સિંગર સોનુ નિગમે પરફોર્મન્સ આપ્યુ હતું. અન્ય એક લગ્નમાં નુસરત ભરૂચા, ક્રિશ્ના અભિષેક વગેરે હાજર રહ્યા હતા અને ચાહકોને ખુશ કરી દીધા હતા.
આમ જોવા જઈએ તો આ એક સપ્તાહમાં દીપિકા પાદુકોણ, રણવીરસિંહ, આલિયા ભટ્ટ રણબીર કપૂર, આમિરખાન, એ.આર. રહેમાન,શ્રેયા ઘોષાલ આદિત્ય નારાયણ, મોહિત ચૌહાણ, ક્રિકેટર મહેન્દ્રસિંહ ઘોની, સચિન તેંડુલકર સહિત 85 જેટલી સેલિબ્રિટી અંબાણી પરિવાર ના ફંકશનમાં આવી હતી.
રાજકોટમાં સેલિબ્રિટીઓના સતત આગમનથી શહેરમાં ફિલ્મી ચમક છવાઈ રહી હતી અને શહેરીજનો માટે આ સપ્તાહ એક યાદગાર સેલિબ્રિટી ફિએસ્ટા બની રહ્યું હતું.
