અમદાવાદમાં ભગવાન જગન્નાથની 147મી રથયાત્રા પહેલા યોજાઇ જળયાત્રા

અમદાવાદમાં ભગવાન જગન્નાથ ની 147મી રથયાત્રાની ભવ્ય તૈયારી ચાલી રહી છે. ભવ્ય રથયાત્રા પહેલા આજે જળયાત્રાનું આયોજન કરાયું હતું. સવારે 8.30 વાગે નિજ મંદિરથી જળયાત્રાનો પ્રારંભ થયો હતો અને સોમનાથ ભૂદરના આરા સુધી જળયાત્રા યોજાઈ હતી.

ભગવાન જગન્નાથની રથયાત્રા પહેલા જળયાત્રાનું અનેરું મહત્વ છે. જળયાત્રામાં સાબરમતીના જળથી ભગવાન જગન્નાથનો જળાભિષેક કરવામાં આવે છે. જળયાત્રામાં હજારોની સંખ્યામાં ભક્તો ઉમટી પડે છે. ભક્તોની સાથે ભગવાનના મોસાળિયા પણ જળયાત્રામાં જોડાયા હતા. ગજરાજ, બળદગાડા અને બેન્ડબાજા સાથે જળયાત્રાનું આયોજન કરાયું હતું. જળયાત્રામાં ધ્વજ પતાકા, કાવડ યાત્રિકો અને ભજન મંડળીઓ સામેલ થઈ હતી.અમદાવાદ ભગવાન જગન્નાથનો આજે અભિષેક કરાયો હતો. દર વર્ષે આ જળયાત્રા જેઠ સુદ પૂનમના રોજ યોજાય છે. આજે સવારે 8:00 કલાકે નિજ મંદિરથી ગજરાજ, ભજન મંડળી સાથે જળયાત્રાનો પ્રારંભ થયો હતો. સોમનાથ ભુદરના આરે ગંગા પૂજન કરવામાં આવ્યું . ગંગા પૂજન કરેલું વિશેષ જળ 108 કળશ ભરી મંદિરમાં લવાયું હતું અને મંદિરમાં ભગવાનનો અભિષેક કરવામાં આવ્યો હતો.

મહત્વની વાત એ છે કે ભગવાન જગન્નાથજી આજનાં દિવસે ગણપતિ સ્વરૂપે દર્શન આપે છે . વર્ષમાં એક જ દિવસ ભગવાન ગણપતિ સ્વરૂપના દર્શન આપે છે બપોર બાદ ભગવાન નિજ મંદિરથી મોસાળ સરસપુર પહોંચ્યા હતા. જળયાત્રામાં વિશેષ અતિથિ તરીકે ગૃહરાજ્યમંત્રી હર્ષ સંઘવી પણ ઉપસ્થિત રહ્યા હતા. ઉપરાંત અમદાવાદના મેયર પ્રતિભાબેન જૈન તેમજ અન્ય ધારાસભ્ય પણ હાજર રહ્યા હતા.