ઈઝરાયલે 26/11 માટે જવાબદાર લશ્કર-એ-તોયબા પર પ્રતિબંધ મુક્યો

-26 નવેમ્બરે મુંબઈ પર ત્રાસવાદી હુમલાની 15મી વર્ષગાંઠ છે
-ઈઝરાયલ ઈચ્છે છે કે ભારત હમાસને ત્રાસવાદી સંગઠન જાહેર કરે

ઈઝરાયલે પાકિસ્તાન સ્થિત ત્રાસવાદી સંગઠન લશ્કર-એ-તોયબા (LeT) પર પ્રતિબંધ મૂકવાની જાહેરાત કરી છે. ઈઝરાયલે કહ્યું કે આ સંગઠને સેંકડો ભારતીયોની હત્યા કરી છે. 26 નવેમ્બરે મુંબઈ પર ત્રાસવાદી હુમલાની 15મી વર્ષગાંઠ છે તે અગાઉ ઈઝરાયલે ઉગ્રવાદીઓના સંગઠન પર પ્રતિબંધ મૂક્યો છે. ભારત સરકારે આ પ્રતિબંધ માટે માગણી કરી ન હતી, પરંતુ ઈઝરાયલે આ માટે બધી જરૂરી કાર્યવાહી કરી છે.

તાજેતરમાં 7 ઓક્ટોબરે હમાસ દ્વારા ઈઝરાયલ પર હુમલો કરવામાં આવ્યો હતો જેમાં ઈઝરાયલના 1400 લોકોના મોત નિપજ્યા હતા. ત્યાર પછી ઈઝરાયલે ગાઝા પટ્ટી પર ભારે બોમ્બમારો કર્યો છે જેમાં 11,000થી વધુ લોકોના મોત થયા છે. ઈઝરાયલે હવે લશ્કર-એ-તોયબા પર પ્રતિબંધ મૂક્યો છે અને તેની માંગણી છે કે ભારત પણ હમાસ પર પ્રતિબંધ મૂકે. હમાસના 7 ઓક્ટોબરના હુમલાને ભારતે ત્રાસવાદી એટેક ગણાવ્યો હતો.

વર્ષ 2008માં મુંબઈમાં લશ્કર-એ-તોયબાની તાલીમ પામેલા ત્રાસવાદીઓએ હુમલો કર્યો હતો જેમાં રેલવે સ્ટેશન અને તાજ હોટેલ ઉપરાંત એક યહુદી ધર્મસ્થાનને પણ નિશાન બનાવવામાં આવ્યું હતું. ભારતે અગાઉ ચિંતા વ્યક્ત કરી હતી કે ઈઝરાયલ ઈરાનથી ઉદભવતા ત્રાસવાદ પર વધુ ફોકસ ધરાવે છે જ્યારે પાકિસ્તાનમાંથી પેદા થયેલા ત્રાસવાદ પર ઓછું ધ્યાન આપવામાં આવે છે. ઈઝરાયલ માને છે કે ઈરાન એ વૈશ્વિક ત્રાસવાદનું કેન્દ્ર છે જ્યારે ભારત માત્ર પાકિસ્તાનને ત્રાસવાદીઓના હબ તરીકે ઓળખાવે છે.

ઈઝરાયલે જણાવ્યું કે લશ્કર એ તોયબા એ એક ખતરનાક ત્રાસવાદી સંગઠન છે જેણે ભારતીયો તથા બીજા દેશના લોકોની હત્યાઓ કરી છે. તેણે 26 નવેમ્બર 2008ના રોજ મુંબઈ પર હુમલો કર્યો હતો.

ઇઝરાયલ સામાન્ય રીતે તેની સરહદની અંદર અથવા સરહદની આસપાસ કામ કરતા ત્રાસવાદી સંગઠનો પર જ પ્રતિબંધ મૂકે છે. પરંતુ આ વખતે તેણે ભારતને પરેશાન કરતા ત્રાસવાદી સંગઠન પર પ્રતિબંધ મૂક્યો છે. તેના કારણે પાકિસ્તાન માટે લશ્કર એ તોયબાની તરફેણમાં જાહેરમાં કંઈ પણ બોલવું મુશ્કેલ થઈ જશે અને તેમને પોતાની જમીન પર શરણ આપવામાં પણ તકલીફ પડશે.

શું ભારત હવે હમાસ પર પ્રતિબંધ મૂકશે?
ઇઝરાયલનું માનવું છે કે હમાસને ભારત દ્વારા ત્રાસવાદી સંગઠન જાહેર કરવું જોઈએ અને તેના પર પ્રતિબંધની જાહેરાત કરવી જોઈએ. ભારત ખાતે ઈઝરાયલના રાજદૂત નાઓર ગિલોને કહ્યું કે હવે ભારતે પણ હમાસને સત્તાવાર રીતે ત્રાસવાદી સંગઠન જાહેર કરવું જોઈએ તે સમય આવી ગયો છે. અમેરિકા, યુકે, કેનેડા અને ઓસ્ટ્રેલિયા જેવા દેશોએ હમાસને ટેરરિસ્ટ સંગઠન જાહેર કર્યું છે.

ભારતે અગાઉ હમાસને ત્રાસવાદી જૂથ જાહેર કરવાનું ટાળ્યું છે અને કહ્યું છે કે આ એક કાનૂની મેટર છે અને યોગ્ય ઓથોરિટી સમક્ષ આ બાબત ઉઠાવવામાં આવશે. જોકે, ભારતે 7 ઓક્ટોબરના હુમલાને ત્રાસવાદી એટેક જ ગણાવ્યો છે. ભારતે કહ્યું હતું કે કોઈને ત્રાસવાદી સંગઠન જાહેર કરવું એ લીગલ મેટર છે. અમે એ બાબતમાં સ્પષ્ટ છીએ કે 7 ઓક્ટોબરનો હુમલો એ ત્રાસવાદી એટેક હતો. પરંતુ કોઈને ત્રાસવાદી જૂથ તરીકે જાહેર કરવું કે નહીં તે યોગ્ય સત્તાવાળાઓ દ્વારા નિર્ણય લેવાશે.