હાર્દિક પંડ્યા ફરી વિવાદમાં ફસાયા: રાષ્ટ્રીય ધ્વજ પહેરી ગર્લફ્રેન્ડ મહિકા સાથે કરેલી હરકત બદલ નોંધાઈ વધુ એક ફરિયાદ, જાણો શું છે મામલો
ટી-20 વર્લ્ડકપ-2026ની જીતમાં ચમકેલા હાર્દિક પંડ્યા વિરુદ્ધ વધુ એક પોલીસ ફરિયાદ નોંધાઈ છે. હાર્દિક ઉપર આરોપ છે કે તેણે રાષ્ટ્રીય ધ્વજ ત્રિરંગો પહેરીને અશ્લિલ હરકત કરી છે જેના કારણે ધ્વજની ગરિમા ઘવાઈ છે. મહારાષ્ટ્રના પૂનામાં રહેતા એડવોકેટ વાજિદ ખાને ફરિયાદ નોંધાવ્યા બાદ હવે હાથરસ ગેટ પોલીસ સ્ટેશનના અધિકારક્ષેત્રમાં આવેલા નાગલા નંદુ ગામના રહેવાસી એડવોકેટ વિશ્વપ્રતાપ સિંહ રાણાએ પોલીસ અધિક્ષક અને કેન્દ્રીય ગૃહમંત્રીને અરજી મોકલીને હાર્દિક પંડ્યા સામે કડક કાર્યવાહીની માંગ કરી છે.
પ્રથમ ફરિયાદ પૂનામાં નોંધાઈ
અમદાવાદના નરેન્દ્ર મોદી સ્ટેડિયમ પર ન્યુઝીલેન્ડને ફાઈનલમાં હરાવ્યા બાદ ખેલાડીઓ અને તેમનો પરિવાર પણ ગ્રાઉન્ડ ઉપર આવ્યો હતો. એવોર્ડ સેરેમની પહેલાં મેદાન ઉપર ઉજવણી કરી હતી. ખેલાડીઓ ડાન્સ કરી રહ્યા હતા અને એકબીજા સાથે તસવીર લેવડાવી રહ્યા હતા. અમુક ખેલાડીઓ પ્રસારણકર્તાઓને ઈન્ટરવ્યુ પણ આપી રહ્યા હતા. આ દરમિયાન આખી દુનિયાને હાર્દિક પંડ્યા અને તેની ગર્લફ્રેન્ડ મહિકા શર્માની હરકતને ટીવી ઉપર લાઈવ જોઈ હતી. ફરિયાદી વાજિદ ખાન હાર્દિકની આ જ હરકતથી નારાજ છે. હાર્દિકની પીઠ ઉપર રાષ્ટ્રીય ધ્વજ હતો. 1971માં રાષ્ટ્રીય ધ્વજ અધિનિયમની કલમ-2 પ્રમાણે આપણે રાષ્ટ્રીય ધ્વજની ગરિમા જાળવવી ફરજિયાત છે.
જો કે હાર્દિક પોતાની જીતની ઉજવણીમાં એટલો મગ્ન હતો કે તે પોતાની ગર્લફ્રેન્ડ સાથે રાષ્ટ્રીય ધ્વજ પહેરીને સૂઈ ગયો હતો. ફરિયાદીનું માનવું છે કે આ રાષ્ટ્રીય ધ્વજનું અપમાન છે. ફરિયાદીએ પૂનાના શિવાજીનગર પોલીસ મથકમાં હાર્દિક વિરુદ્ધ ફરિયાદ નોંધાવી છે. જ્યારે ફરિયાદી ફરિયાદ નોંધાવવા માટે પોલીસ મથકે ગયા તો આ ઘટના અમદાવાદમાં બની હોવાનો જવાબ આપ્યો હતો પરંતુ ફરિયાદીએ કહ્યું કે રાષ્ટ્રીય ધ્વજ આખા દેશનું પ્રતિક છે એટલા માટે ગમે તે પોલીસ મથકમાં ફરિયાદ નોંધાવી શકાય છે. આ પછી તેમની ફરિયાદ નોંધવામાં આવી હતી.
હાર્દિક પંડયા વિરુદ્ધ બીજી ફરિયાદ નોંધાઈ
ભારતીય ક્રિકેટ ટીમના સ્ટાર ખેલાડી હાર્દિક પંડ્યા ફરી એકવાર વિવાદમાં ફસાયા છે. 2026ના T20 વર્લ્ડ કપમાં ભારતની જીત બાદ ઉજવણી દરમિયાન રાષ્ટ્રધ્વજ – ત્રિરંગા – પ્રત્યે અપમાનનો આરોપ લગાવતી તેમની સામે ફરિયાદ દાખલ કરવામાં આવી છે. એવો આરોપ લગાવવામાં આવી રહ્યો છે કે આ ઘટનાથી દેશભરના લાખો નાગરિકોની લાગણીઓને ઊંડી ઠેસ પહોંચી છે.
હાથરસ ગેટ પોલીસ સ્ટેશનના અધિકારક્ષેત્રમાં આવેલા નાગલા નંદુ ગામના રહેવાસી એડવોકેટ વિશ્વપ્રતાપ સિંહ રાણાએ પોલીસ અધિક્ષક અને કેન્દ્રીય ગૃહમંત્રીને અરજી મોકલીને હાર્દિક પંડ્યા સામે કડક કાર્યવાહીની માંગ કરી છે. ફરિયાદમાં જણાવાયું છે કે 2026ના T20 વર્લ્ડ કપની ફાઇનલ મેચમાં ભારતની જીત બાદ હાર્દિક પંડ્યાનો એક વીડિયો સોશિયલ મીડિયા પર ઝડપથી વાયરલ થયો છે.
આ ગંભીર આરોપના સંદર્ભમાં, એસપી ચિરંજીવનાથ સિંહાએ જણાવ્યું છે કે ફરિયાદ મળ્યા પછી, આ મામલાની સંપૂર્ણ તપાસ કરવામાં આવશે, અને નિયમો અનુસાર કાયદાકીય કાર્યવાહી સુનિશ્ચિત કરવામાં આવશે. પોલીસ વહીવટીતંત્ર આ મામલાને સંવેદનશીલતાથી સંભાળી રહ્યું છે, અને કોઈપણ પ્રકારની બેદરકારી સહન કરવામાં આવશે નહીં.
