પૂર્વ ધારાસભ્ય લલિત કગથરાને ફટાકડીની જરૂર પડી
લાંબા સમય બાદ જિલ્લા ક્લેક્ટરમાં હથિયાર પરવાના અંગે સુનાવણી : 12 અસામીઓએ પરવાના માંગ્યા
રાજકોટ : રાજકોટ જિલ્લામાં લાંબા સમયગાળા બાદ જિલ્લા કલેકટર દ્વારા હથિયાર પરવાનાં આપવાની કાર્યવાહી અંતર્ગત બુધવારે 12 આસામીઓ દ્વારા હથિયાર પરવાના મેળવવા કરેલી અરજી અન્વયે સુનાવણી યોજી હતી, હથિયાર પરવાના મેળવવા અરજી કરનાર અસામીઓમાં કોંગ્રેસના આખા બોલા નેતા અને ટંકારા -પડધરી મતવિસ્તારના પૂર્વ ધારાસભ્ય લલિતભાઈ કગથરાનો પણ સમાવેશ થતો હોવાનું જાણવા મળે છે.
સુરેન્દ્રનગર જિલ્લાના તત્કાલીન જિલ્લા કલેકટર કે.રાજેશ દ્વારા હથિયાર પરવાના આપવામાં રીતસરની લ્હાણી કરી હોવાથી સરકારની કડક સૂચના બાદ રાજ્યના તમામ જિલ્લાઓમાં સ્વરક્ષણ માટે નવા હથિયાર પરવાના આપવાની કામગીરીને સજ્જડ બ્રેક લાગી ગઈ હોય તેવી સ્થિતિ વચ્ચે રાજકોટમાં પણ હથિયાર પરવાના માટે એકલ-દોકલ અરજીઓને બાદ કરતા ફટકડી શોખીનો ઠંડા પડી ગયા હોય તેવી સ્થિતિ જોવા મળતી હતી. દરમિયાન બુધવારે રાજકોટ જિલ્લા કલેકટર કચેરીમાં ટંકારા -પડધરી મતવિસ્તારના પૂર્વ ધારાસભ્ય લલિતભાઈ કગથરા સહિત 12 આસામીઓ દ્વારા હથિયાર પર્વના મેળવવા માટે અરજી કરી હોય તમામ અરજદારોને સુનાવણી માટે બોલાવવામા આવ્યા હતા.
