બોલિવૂડ નિર્માતા-નિર્દેશક રોહિત શેટ્ટી દ્વારા નિર્દેશિત ફિલ્મ ‘સિંઘમ અગેન’ 1 નવેમ્બરના રોજ રીલિઝ થવા જઈ રહી છે. થોડા દિવસો પહેલા જ મેકર્સે આ ફિલ્મનું ટ્રેલર લોકોની વચ્ચે રજૂ કર્યું હતું. લોકોને ‘સિંઘમ અગેઇન’નું ટ્રેલર પણ ખૂબ પસંદ આવ્યું. આ ટ્રેલરમાં આખી સ્ટાર કાસ્ટની ઝલક જોવા મળી હતી. ઘણા દિવસોથી એવા સમાચાર હતા કે આ ફિલ્મમાં બોલિવૂડ સુપરસ્ટાર સલમાન ખાન પણ શાનદાર રોલ હશે. જોકે, લેટેસ્ટ રિપોર્ટ્સે સલમાન ખાનના ફેન્સને નિરાશ કર્યા છે.

ચુલબુલ પાંડે ‘સિંઘમ અગેન‘ માંથી ‘આઉટ’ !!

બોલિવૂડ હંગામાના અહેવાલ મુજબ, એક દિવસનું શૂટિંગ ગોલ્ડન ટોબેકો, મુંબઈમાં થવાનું હતું પરંતુ બાબા સિદ્દીકીની હત્યા બાદ તે તરત જ રદ કરવામાં આવ્યું હતું. રોહિત શેટ્ટી અને અજય  દેવગણે એકબીજા સાથે વાત કરી અને નક્કી કર્યું કે આ બધા વિવાદો વચ્ચે સલમાન ખાનને શૂટિંગ કરવાનું કહેવું યોગ્ય નથી. આવી સ્થિતિમાં મેકર્સે પણ સલમાન ખાનના કેમિયો વિના ફિલ્મને સેન્સર બોર્ડમાં સબમિટ કરવાનો નિર્ણય લીધો છે.

જો કે, ચાહકો માટે હજુ પણ આશા બાકી છે. ખરેખર, ચુલબુલ પાંડેનો બેકશોટ પોસ્ટ ક્રેડિટ સીનમાં રાખી શકાય છે. પરંતુ મેકર્સ દ્વારા હજુ સુધી આ અંગે કોઈ માહિતી આપવામાં આવી નથી. આવી સ્થિતિમાં સલમાન ખાન ફિલ્મમાં કેમિયો કરશે કે નહીં અને પોસ્ટ ક્રેડિટ સીનને લઈને શું પ્લાનિંગ છે તે તો પછી જ ખબર પડશે. વાસ્તવમાં, રોહિત શેટ્ટી અને અજય દેવગનના કારણે સલમાન ખાન કેમિયો કરવા માટે રાજી થયો હતો. પરંતુ આ યુ-ટર્ન પછી મેકર્સ શૂટનું પ્લાનિંગ કેવી રીતે કરશે? આ હજુ સુધી જાણવા મળ્યું નથી.

આ સમાચાર અનુસાર, હવે તે રોહિત શેટ્ટીની ફિલ્મ ‘સિંઘમ અગેન’માં કેમિયો નહીં કરે. રોહિત શેટ્ટી અને ફિલ્મના નિર્માતાએ હવે સલમાન ખાનની ગોપનીયતાને માન આપીને આ નિર્ણય લીધો છે. આ ફિલ્મમાં અજય દેવગન ઉપરાંત દીપિકા પાદુકોણ, ટાઈગર શ્રોફ, રણવીર સિંહ, અર્જુન કપૂર, કરીના કપૂર અને અક્ષય કુમાર સહિતના ઘણા કલાકારો મહત્વની ભૂમિકામાં જોવા મળશે. આ ફિલ્મ 1લી નવેમ્બરે કાર્તિક આર્યન અને વિદ્યા બાલનની હોરર કોમેડી ફિલ્મ ‘ભૂલ ભુલૈયા 3’ સાથે ટકરાશે.