ફુલ ગુલાબી ઠંડીની શરૂઆત થતાં જ ‘દાદીમાનાં દેશી ઓસડીયા’ની માંગમાં વધારો: શિયાળામાં 2000 કિલો ‘ચ્યવનપ્રાશ’ખાઈ જાય છે રાજકોટિયન્સ

રાજકોટમાં ફુલગુલાબી ઠંડીની શરૂઆત સાથે દાદીમાનાં ઘરેલુ પ્રયોગો ફરી જીવંત થયા છે. મહિલાઓ પરિવારના આરોગ્યની ચિંતા સાથે સ્વાસ્થ્યવર્ધક આહાર, પરંપરાગત પાક અને ઘરેલું દવાઓ બનાવી સભ્યોને સીઝનલ બીમારીથી દૂર રાખે છે.

આયુર્વેદ સ્ટોરનાં વેપારીઓનાં જણાવ્યા અનુસાર,શિયાળાનાં 4 મહિનામાં આખા વર્ષનું સ્વાસ્થ્ય સારું રાખવાની સિઝન,આ મોસમમાં ખાસ કરીને રોગપ્રતિકારક શક્તિને મજબૂત બનાવવા અને સીઝનલ બીમારીથી બચવા સૌથી વધુ “ચ્યવનપ્રાશ”રાજકોટવાસીઓ ખાઈ જાય છે.અલગ અલગ બ્રાન્ડનો ચ્યવનપ્રાશ 250 ગ્રામથી લઈ 2 કિલોનાં પેકિંગમાં માર્કેટમાં આવે છે તો ઘણી ગૃહિણીઓ ઘરે પણ બનાવે છે.એક અંદાજ મુજબ 2000 કિલોથી વધુ ચ્યવનપ્રાશ રાજકોટવાસીઓ ખાઈ જાય છે.

આ પણ વાંચો :રાજકોટની SNK સ્કૂલમાં વોલીબોલ રમતાં-રમતાં ધોરણ 12 ના વિધાર્થીનું હૃદય ધબકારા ચૂકી ગયું : પરિવારમાં ગમગીની  

આ ઉપરાંત શિયાળાની કડકડતી ઠંડીમાં ગરમાવા માટે તુલસી,હળદર, આદુ,સુંઠ,કાળા મરી,તજની માંગ રહે છે.જેનો ગરમ ગરમ કાવો બને છે ને ઠંડી વચ્ચે કડકડતા કાવાની ચૂસકી લગાવે છે.આમળા રસ,મોરીનગા રસ,અશ્વગંધા, શતાવરી,સફેદ મુસળી,અરડૂસી,પીપળીમૂળ,કાળીજીરી આ શક્તિવર્ધક ઔષધિ લાવ..લાવ..થાય છે.આ ઓસડીયા અમદાવાદ, દિલ્હી,છોટા ઉદેપુર,અમૃતસરથી આવે છે

આ પણ વાંચો :રાજકોટની ચોક્કસ હોટેલોમાં પોલીસનું બેઠુ ભાગીદારી કવચ! બંધ બારણે જલ્સા પાર્ટીઓ?

વિક્રેતાઓનાં જણાવ્યા મુજબ વર્ષભરની સરખામણીએ આ ચાર મહિનામાં દેશી ઔષધીઓનો વેચાણ અનેક ગણો વધી જાય છે. રાજકોટના લોકો સ્વાસ્થ્ય માટે જાગૃત હોવાથી દવાખાનાની સાથે સાથે ઘરેલું નુસ્ખાઓ પર પણ વિશેષ ભરોસો મૂકે છે.ઘણી મહિલાઓ કહે છે કે, ઠંડી આવે એટલે પરિવારની સ્વાસ્થ્યની તાકાત વધારવાના પાક ઘરે જ તૈયાર કરી લઈએ. દાદીમાની વાનગીઓ આજે પણ સૌથી અસરકારક છે.