એર માર્શલ અમર પ્રીત સિંહ વાયુસેનાના આગામી પ્રમુખ હશે. અમર પ્રીત સિંહ હાલમાં વાયુસેનાના ઉપ-પ્રમુખ તરીકે ફરજ બજાવી રહ્યા છે. તેઓ 30 સપ્ટેમ્બરના બપોરથી આગામી વાયુસેના પ્રમુખ તરીકે એર ચીફ માર્શલનો પદભાર સંભાળશે. વર્તમાન વાયુસેના પ્રમુખ એર ચીફ માર્શલ વિવેક રામ ચૌધરી 30 સપ્ટેમ્બરએ પદમુક્ત થઈ રહ્યા છે. એમની અમૂલ્ય સેવા રહી છે અને એમને સેવાનો બહોળો અનુભવ છે.
એર માર્શલ અમર પ્રીત સિંહનો જન્મ 27 ઓક્ટોબર 1964ના રોજ થયો હતો. તેમને ડિસેમ્બર 1984માં ભારતીય વાયુસેનાના લડાકૂ પાયલટ સ્ટ્રીમમાં સામેલ કરાયા હતા. લગભગ 40 વર્ષની પોતાની લાંબી અને પ્રતિષ્ઠિત સેવા દરમિયાન તેમણે અનેક કમાન્ડ, સ્ટાફ, ઇન્સ્ટ્રક્શનલ પદો પર કામ કર્યું છે. તેમણે વિદેશમાં વાયુસેના માટે મહત્વની જવાબદારી સંભાળી છે.
બહોળો અનુભવ
ભારતીય એર ફોર્સના નવા ચીફ બનનારા એર માર્શલ અમર પ્રીત સિંહે હાલમાં જ ઇન્ડિયન ફાઇટર જેટ તેજસને ઉડાવીને ન માત્ર સૌને ચોંકાવ્યા હતા, પરંતુ પોતાની ઉંમરના કારણે સૌનું ધ્યાન પણ ખેંચ્યું હતું. જ્યારે તેમણે તેજસ વિમાન ઉડાવ્યું હતું ત્યારે તેમની ઉંમર 59 વર્ષ હતી. પોતાની સેવા માટે પરમ વિશિષ્ઠ સેવા પદક અને અતિ વિશિષ્ટ સેવા પદકથી સન્માનિત કરાઈ ચૂક્યા છે.
