મધ્ય પૂર્વમાં ચાલી રહેલા ઈરાન સંકટ દરમિયાન સોશિયલ મીડિયા પર ભ્રામક અને બનાવટી વિડિયો ફેલાવવાના આરોપમાં યુનાઈટેડ અરબ અમીરાત (યુએઈ)એ 19 ભારતીયો સહિત કુલ 35 લોકોને ધરપકડ કરવાનો આદેશ આપ્યો છે. યુએઈના એટર્ની જનરલ ડૉ. હમદ સૈફ અલ શમ્સે જણાવ્યું કે ડિજિટલ પ્લેટફોર્મ પર કડક મોનીટરીંગ દરમિયાન આ લોકો દ્વારા ભ્રામક માહિતી અને કૃત્રિમ સામગ્રી ફેલાવાતી હોવાનો પર્દાફાશ થયો હતો.

સત્તાવાળાઓ મુજબ આરોપીઓને ઝડપી કાર્યવાહી હેઠળ ટ્રાયલ માટે રજૂ કરવામાં આવશે. તપાસમાં જાણવા મળ્યું કે આરોપીઓએ યુદ્ધ અને પ્રાદેશિક તણાવ સંબંધિત ફેરફાર કરેલા વિડિયો અને ગેરમાર્ગે દોરતી વાતો સોશિયલ મીડિયા પર પ્રસારિત કરી હતી. યુએઈના કાયદા મુજબ આવા કૃત્યો બદલ ઓછામાં ઓછા એક વર્ષની જેલ અને AED 1 લાખથી વધુ દંડની સજા થઈ શકે છે.

યુએઈ સત્તાવાળાઓએ એ સાથે જ,રાષ્ટ્રીય સુરક્ષા, જાહેર વ્યવસ્થા અને સ્થિરતાને નુકસાન પહોંચાડે તેવી ભ્રામક માહિતી ફેલાવનારાઓ સામે કડક કાનૂની કાર્યવાહી કરવાની કડક ચેતવણી આપી છે.

આ પણ વાંચો:લાપસીના આંધણ મૂકો…હોર્મુઝ સ્ટ્રેટ પાર કરીને સુરક્ષિત રીતે LPG લઇને ‘શિવાલિક’ જહાજ મુન્દ્રા પોર્ટ પર આવી પહોંચ્યું

ત્રણ પ્રકારના વીડિયો વાયરલ કર્યા:

અધિકારીઓએ જણાવ્યું કે આરોપીઓએ ફેલાવેલા વિડિયો ત્રણ અલગ-અલગ પ્રકારના હતા.

વાસ્તવિક દૃશ્યો સાથે ભય ફેલાવવાનો પ્રયાસ

એક જૂથે મિસાઈલ અવરજવર અથવા અવરોધન સંબંધિત સાચા દૃશ્યો શેર કર્યા, પરંતુ તેમાં ટિપ્પણીઓ અને સાઉન્ડ ઇફેક્ટ્સ ઉમેરીને દેશમાં હુમલા જેવી સ્થિતિ બતાવી લોકોમાં ભય અને ગભરાટ ફેલાવવાનો પ્રયાસ કર્યો.

AI વડે બનાવટી દૃશ્યો

બીજા જૂથે AI દ્વારા બનાવેલા અથવા અન્ય દેશોના જૂના વિડિયો ફરીથી શેર કરીને તેમને યુએઈમાં થયેલા હુમલા તરીકે રજૂ કર્યા. આ ક્લિપ્સમાં વિસ્ફોટ, મિસાઈલ હુમલા અને ધુમાડાના દૃશ્યો બતાવી ગેરમાર્ગે દોરવાનો પ્રયાસ કરવામાં આવ્યો.

શત્રુ દેશનું મહિમામંડન

ત્રીજા જૂથે ઈરાન અને તેની સૈન્ય કાર્યવાહીનું મહિમામંડન કરતી સામગ્રી પોસ્ટ કરી, જે યુએઈના રાષ્ટ્રીય હિત અને સુરક્ષાને નુકસાન પહોંચાડે તેવી ગણવામાં આવી.