પારકા ઝઘડામાં વચ્ચે પડેલા યુવાનની હત્યા
વીંછિયાના સોમલપર ગામની ઘટના: ભડલીના રાજેશ બારૈયા સહિત ૧૦ શખ્સોએ હત્યાને આપ્યો અંજામ: પ્રેમસંબંધનો ડખ્ખો કારણભૂત
જસદણના વીંછિયા ગામે પારકા ઝઘડામાં વચ્ચે પડેલાં યુવાનની હત્યા કરી નખાતાં સનસનાટી મચી જવા પામી છે. બે પરિવારના યુવકો મારામારી કરી રહ્યા હોય તેમાં વચ્ચે પડેલાં ૪૦ વર્ષીય યુવકને છરીઓના ઘાથી રહેંસી નખાતાં સારવાર દરમિયાન તેનું મોત નિપજ્યું હતું.
આ ઘટના અંગે જાણવા મળેલી વિગતો પ્રમાણે વીંછિયા તાલુકાના સોમલપર ગામે સંપમાં વાલ્વમેનનું કામ કરતાં વલ્લભ તળશીભાઈ ડાભી (ઉ.વ.૪૦)ની સંપમાં જ ઢીમ ઢાળી દેવાયું હતું. આ હત્યા પાછળનું ચોક્ક્સ કારણ પોલીસ દ્વારા જાહેર કરાયું નથી પરંતુ પ્રારંભીક તપાસમાં ખુલ્યા પ્રમાણે બે પરિવારના છોકરાઓ વચ્ચે પ્રેમસંબંધને લઈને મારામારી થઈ રહી હોય તેમાં વલ્લભ વચ્ચે પડ્યો હતો જેના કારણે તેના પર છરીથી દસેક શખ્સો તૂટી પડ્યા હતા. વલ્લભને પેટના ભાગે છરીના ઘા વાગી જતાં સારવાર માટે આટકોટની ખાનગી હોસ્પિટલમાં ખસેડાયો હતો જ્યાં સારવાર દરમિયાન તેનું મોત નિપજ્યું હતું.
વધુમાં એવું પણ જાણવા મળ્યું છે કે પ્રેમસંબંધને લઈને રાજેશ બારૈયા તેમજ અન્ય એક પરિવાર વચ્ચે ફોન ઉપર માથાકૂટ થયા બાદ તમામ સોમલપર ગામના સંપ પાસે એકઠા થયા હતા જ્યાં વાત વણસી જતાં મારામારી સુધી પહોંચી હતી. આ ઝઘડામાં વલ્લભ વચ્ચે પડતાં રાજેશ બારૈયા તેમજ તેની સાથે રહેલા નવેસ શખ્સોએ વલ્લભને ઉપરાછાપરી છરીના ઘા ઝીંકી દેતાં તેને ગંભીર હાલતમાં હોસ્પિટલે ખસેડાયો હતો. હત્યાનો ચકચારી બનાવ બનતાં જ જસદણ પોલીસે આરોપીઓને પકડી લઈ હત્યાની સાચું કારણ બહાર લાવવા તજવીજ શરૂ કરી છે.
