15 વર્ષના ટાબરીયાએ બાઇકની ચોરી કરી બાદ મહિલાનો સોનાનો ચેન ઝૂંટવ્યો
સંત કબીર રોડ પર પતિ સાથે સ્કૂટર પર જતી મહિલાને નિશાન બનાવી હતી : એલસીબી ઝોન-1એ દૂધસાગર રોડ પરથી પકડી પાડી 96 હજારનો મુદામાલ જપ્ત કર્યો
રાજકોટમાં સંત કબીર રોડ પર ત્રિવેણી ગેઇટ પાસે મહિલાના ગળા પર ઝોટ મારી એક બાઇક સવાર રૂપિયા ૪૬ હજારનો સવા તોલાના ચેઇનની ચીલ ઝડપ કરી હતી. આ ચિલઝડપનો ગુનો એલસીબી ઝોન-૧ ટીમે ઉકેલી એક પંદર વર્ષના ટાબરીયાને દૂધ સાગર રોડ પરથી દબોચી લઇ ચેઇન કબ્જે કર્યો છે. આ ઉપરાંત તેણે ચિલઝડપ કરવા માટે જે બાઇકનો ઉપયોગ કર્યો હતો તે પણ દસેક દિવસ પહેલા ચોરી કર્યાનું ખુલ્યું છે. ચેઈન અને બાઇક મળી ૯૬ હજારનો મુદ્દામાલ કબ્જે લેવાયો છે.
માહિતી મુજબ પેડક રોડની ગુજરાત સોસાયટીમાં રહેતાં મધુબેન સાવલિયા (ઉ.વ.૪૩) તેમના પતિ સુભાષભાઈ સાવલિયાના સ્કૂટર પર બેસી ગુંદાવાડીથી ખરીદી કરીને પોતાના ઘર તરફ જવા નીકળ્યા ત્યારે સંત કબીર રોડ પર ત્રિવેણીના ગેટ પાસે પહોંચતા એક બાઇક સવાર શખ્સ મધુબેનની ડોક પર ઝોટ મારી રૂ.૪૬ હજારની કિંમતનો સવા તોલા સોનાનો ચેઇન ખેંચી ભાગી ગયો હતો. અને બી ડિવિઝન પોલીસમાં ગુનો નોંધાયો હતો. દરમિયાન આ ગુનાને ઉકેલવા બી-ડિવીઝન પોલીસની ટીમની સાથે એલીસીબી ઝોન-૧ની ટીમના પીએસઆઇ બી. વી. બોરીસાગરની ટીમ પણ કામે લાગી હતી દરમિયાન કોન્સ. હિતેષભાઈ પરમાર, સત્યજીતસિંહ જાડેજા અને રવિરાજભાઇ પટગીરની બાતમી પરથી આ ગુનામાં સગીરને દૂધસાગર રોડ પરથી પકડી લેવાયો છે. તેની પાસેથી ચિલઝડપ કરાયેલો ચેઇન રૂા.૪૬ હજારનો અને એક નંબર પ્લેટ વગરનું બાઇક રૂા. ૫૦ હજારનું કબ્જે કરાયું છે. પુછતાછમાં તેણે કબુલ્યું હતું કે દસ પંદર દિવસ પહેલા તેણે થોરાળા વિસ્તારમાંથી આ બાઇકની પણ ચોરી કરી હતી. મોજશોખ માટે તે નંબર પ્લેટ કાઢીને ફેરવતો હતો.અને આ બાઇક લઇને જ તેને ચીલ ઝડપ કરી હતી.
