શેરબજારની માર્કેટ કેપ પહેલી વખત આટલા કરોડ ડોલરને પાર

માર્કેટ કેપિટલમાં અમેરિકા, ચીન, જાપાન અને હોંગકોંગ પછી પાંચમો નંબર
આગામી દિવસોમાં ભારત અમેરિકા, ચીન અને જાપાનને પણ માર્કેટ કેપિટલમાં ચેલેન્જ આપશે

ભારતનો GDP હજુ ચાર ટ્રિલિયન ડોલર એટલે કે ચાર લાખ કરોડ ડોલર સુધી નથી પહોંચ્યો પરંતુ ભારતીય શેરમાર્કેટની વેલ્યૂ એટલે કે માર્કેટ કેપ 4 ટ્રિલિયન ડોલરને પાર કરી ગઈ છે. એટલે કે ભારતના જીડીપી કરતા પણ શેરબજાર આગળ નીકળી ગયું છે. બીએસઈ પર લિસ્ટેડ તમામ કંપનીઓની માર્કેટ વેલ્યૂ આજે પહેલી વખત 4 ટ્રિલિયન ડોલર એટલે કે 333 લાખ કરોડ રૂપિયા કરતા વધી ગઈ હતી. આગામી દિવસોમાં ભારત અમેરિકા, ચીન અને જાપાનને પણ માર્કેટ કેપિટલમાં ચેલેન્જ આપી શકે છે.

ભારતની કોમ્પિટિશન કોની સાથે?
ભારતીય શેરબજાર હવે માર્કેટ કેપિટલની દૃષ્ટિએ વિશ્વમાં પાંચમા ક્રમે છે. ટોચના ચાર સ્થાન પર અમેરિકા, ચીન, જાપાન અને હોંગકોંગ છે. ચાલુ કેલેન્ડર વર્ષમાં નિફ્ટી ઈન્ડેક્સ 10 ટકા કરતા વધારે વધ્યો છે. એટલે કે વર્ષ 2023માં અત્યાર સુધીમાં ભારતની માર્કેટ કેપિટલમાં 51 લાખ કરોડ રૂપિયાનો વધારો થયો છે. તેમાં પણ સ્મોલ અને મિડકેપ કંપનીઓએ આઉટપરફોર્મન્સ કરવામાં આગેવાની લીધી છે. આ ઉપરાંત શેરમાર્કેટમાં તાજેતરમાં ઢગલાબંધ આઈપીઓ આવ્યા છે જેમાં મૂડીરોકાણના કારણે આખા માર્કેટની વેલ્યૂ વધતી જાય છે. મે 2021માં ભારત ત્રણ ટ્રિલિયન ડોલરની ક્લબમાં આવી ગયું હતું. ત્યાર બાદ વધુ એક ટ્રિલિયન ડોલરનો ઉમેરો કરવામાં અઢી વર્ષ લાગ્યા છે.

શેરમાર્કેટમાં લિસ્ટેડ કંપનીઓના શેરના ભાવ વધે તથા નવા લિસ્ટિંગ થાય ત્યારે માર્કેટ કેપ વધતી હોય છે. ફેડના ગવર્નર ક્રિસ્ટોફર વોલરે આગામી મહિનાઓમાં ફેડ દ્વારા વધુ એક વખત રેટ કાપ આવશે તેવા સંકેત આપ્યા ત્યાર પછી નિફ્ટીમાં તેજી છે. સપ્ટેમ્બર મહિનામાં ટોચ બનાવ્યા પછી આજે પહેલી વખત આ ઈન્ડેક્સ 20,000ની સપાટીને પાર કરી ગયો હતો.

વિદેશી રોકાણકારોની ધૂમ ખરીદી
ભારતીય બજારમાં સપ્ટેમ્બર અને ઓક્ટોબર મહિનામાં વિદેશી સંસ્થાકીય રોકાણકારોએ ભારે વેચવાલી કરી હતી, પરંતુ આ મહિનામાં તેમણે ફરીથી ખરીદી શરૂ કરી છે. નવેમ્બર મહિનામાં અત્યાર સુધીમાં એફઆઈઆઈ દ્વારા 2901 કરોડ રૂપિયાનું નેટ બાઈંગ થયું છે. કેલેન્ડર વર્ષ 2023માં એફઆઈઆઈએ એક લાખ કરોડ રૂપિયાના ભારતીય શેરોની નેટ ખરીદી કરી છે જ્યારે ડોમેસ્ટિક ઈન્સ્ટિટ્યૂશનલ ઈન્વેસ્ટર (ડીઆઈઆઈ) દ્વારા 177.5 લાખ કરોડ રોકવામાં આવ્યા છે.

જાપાન અને અમેરિકાને પાછળ રાખી દેશે
ભારતીય શેરમાર્કેટની સ્પર્ધા હવે જાપાન સાથે છે. વર્ષ 2027માં ભારત નોમિનલ જીડીપીની બાબતમાં જાપાન કરતા આગળ નીકળી જશે તેમ માનવામાં આવે છે. ઈકોનોમીની સાઈઝ જોવામાં આવે તો ભારત અને ચીન આ બે દેશ જ ભારત કરતા આગળ રહેશે. હાલમાં ભારતીય અર્થતંત્રનું કદ 3.4 ટ્રિલિયન ડોલર છે જે વર્ષ 2047માં 29 ટ્રિલિયન ડોલર અને 2052માં 45 ટ્રિલિયન ડોલર થાય તેવી શક્યતા છે. સીએલએસએના અંદાજ મુજબ ભારત મોટા પાયે સુધારા ચાલુ રાખે તો 30 વર્ષ પછી ભારતીય ઈકોનોમીની સાઈઝ અમેરિકન ઈકોનોમી કરતા પણ મોટી હશે.

અદાણી ફરી ટોપ 20 અબજપતિઓના લિસ્ટમાંઃ એક દિવસમાં સંપત્તિ 6.5 અબજ ડોલર વધી

અદાણી જૂથના શેરોમાં તાજેતરમાં જે તેજી આવી છે તેના કારણે ગૌતમ અદાણીની સંપત્તિ પણ કૂદકેને ભૂસકે વધતી જાય છે. મંગળવારે અદાણી જૂથના શેર ઉછળ્યા તેના કારણે ગૌતમ અદાણીની સંપત્તિમાં સીધો 6.5 અબજ ડોલરનો વધારો થયો છે અને તેઓ વિશ્વના ટોપ 20 અબજપતિઓના લિસ્ટમાં ફરીથી આવી ગયા છે. ભારતના બીજા નંબરના સૌથી ધનિક વ્યક્તિ ગૌતમ અદાણી જાન્યુઆરી 2023માં વિશ્વના ટોપ 3 અબજપતિઓમાં સ્થાન ધરાવતા હતા, પરંતુ હિન્ડનબર્ગ રિસર્ચના એક રિપોર્ટે બધું ચોપટ કરી નાખ્યું હતું. હિન્ડનબર્ગનો આંચકો સહન કર્યા પછી અદાણી જૂથે 10 મહિનામાં મોટી રિકવરી કરી છે.

ભારતમાં હાલમાં મુકેશ અંબાણી સૌથી અમીર વ્યક્તિ છે જ્યારે ગૌતમ અદાણી બીજા નંબર પર છે. મંગળવારે અદાણીની સંપત્તિમાં 6.5 અબજ ડોલરનો ઉછાળો આવતા જ તેમની નેટવર્થ 66.7 અબજ ડોલર થઈ ગઈ છે. ગૌતમ અદાણીએ એક જ દિવસમાં પોતાની નેટવર્થમાં એક લાખ કરોડનો ઉમેરો કર્યો છે. અગાઉ તેઓ 22મા નંબર પર હતા. પણ હવેથી ટોપ 20માં આવી ગયા છે.અદાણીની સામે સેબીની તપાસમાં હવે શંકા કરવા જેવું કંઈ લાગતું નથી તેવું સુપ્રીમ કોર્ટે જણાવ્યા પછી અદાણીના શેરોમાં આ તેજી આવી છે.