પતિ જ નીકળ્યો હત્યારો! રાજકોટના ભગવતીપરામાં થયેલી હત્યાનો ભેદ ઉકેલાયો,ઘરકાંકાસથી કંટાળેલા પતિએ પત્નીને પતાવી દીધી
રાજકોટના ભગવતીપરામાં કોપર ગ્રીન સોસાયટીમાં રહેતી પરિણીતાની ઘરથી અંદાજે એક કિલોમીટર દૂર આવેલી અવાવરું જગ્યામાંથી હત્યા કરાયેલી હાલતમાં લાશ મળી આવતાં પોલીસમાં દોડધામ થઈ પડી હતી. બીજી બાજુ આ પ્રકારે નિર્દયી રીતે હત્યાને અંજામ કોણે આપ્યો હશે તેને લઈને તરેહ તરેહના દાવાઓ થઈ રહ્યા પરંતુ કલાકો સુધી તપાસ કર્યા બાદ આખરે પોલીસ હત્યારા સુધી પહોંચી ગઈ હતી. આ હત્યાને અન્ય કોઈએ નહીં પરંતુ મહિલાના પતિએ જ કરી હોવાનું ખુલતાં પોલીસ પણ આશ્ચર્યચકિત થઈ ગઈ હતી. જો કે સવારથી જ પતિ પોલીસના કબજામાં હોય તેણે હત્યા કર્યાની કબૂલાત આપતા જ ધરપકડ કરી લેવામાં આવી હતી.
ડીસીપી ક્રાઈમ જગદીશ બાંગરવા, એસીપી ક્રાઈમ બી.બી.બસીયા, પીઆઈ એમ.આર.ગોંડલિયા, સી.એચ.જાદવ, એમ.એલ.ડામોર, પીએસઆઈ એ.એન.પરમાર, એમ.કે.મોવલિયા સહિતની ટીમે બનાવ બન્યા બાદ એક બાદ એક શંકાસ્પદોને ઉઠાવીને તપાસ શરૂ કરી હતી. બીજી બાજુ મૃતક સ્નેહા ઉર્ફે સેવુ આસોડિયા (ઉ.વ.33)નો પતિ હિતેશ આસોડિયા સવારથી જ પોલીસને ગોળ ગોળ જવાબ આપી રહ્યો હોય તેના ઉપર શંકા વધુ ઘેરી બની હતી.
હિતેશે પોલીસને કહ્યું હતું કે સ્નેહાનો સાંજે 7ઃ30 વાગ્યે ફોન આવ્યા બાદ તે રાત્રે 9ઃ40 વાગ્યે ઘેર પહોંચ્યો હતો. જો કે હિતેશનું ગ્રીનલેન્ડ ચોકડી પાસે આવેલું કારખાનું અને તેના ઘરનું અંતર બહુ ઓછું હોય છતાં તેને પહોંચવામાં આટલો સમય શા માટે લાગ્યો તેવું પૂછતાં એવો જવાબ આપ્યો હતો કે તે તેના પુત્ર પ્રિયાંશને લેવા માટે માતા-પિતાને ત્યાં ગયો હોવાથી આવવામાં વાર લાગી હતી. જો કે તેની આ વાતમાં પોલીસને બિલકુલ તથ્ય ન લાગતા આખરે ઉલટ તપાસ શરૂ કરાતા આવું કશું જ ન મળતાં આખરે આગવી ઢબે પૂછપરછ શરૂ કરાતાં જ હિતેશ ભાંગી પડ્યો હતો અને `પોપટ’ બની પોતે જ હત્યા કરી હોવાની કબૂલાત આપી હતી.
પૂછપરછમાં હિતેશે જણાવ્યું કે તેની પત્ની સ્નેહા આસોડિયા છેલ્લા બે વર્ષથી તેના ઉપર શંકા કરતી હોય, પોતે બહાર હોય ત્યારે ધરાર વીડિયોકોલ કરાવતી હોય, મ્હેણા-ટોણા મારતી હોય અને ઝઘડા કરતી હોવાથી આખરે કંટાળીને તેણે જ હત્યા કરવાનું પ્લાનિંગ કરી લીધું હતું.
આ પછી બનાવના દિવસે તે જ સ્નેહાને ફોન કરીને બહાર લઈ ગયો હતો અને ઘરથી થોડે દૂર પહોંચતાં નેહાને સ્કૂટર બગડી ગયું છે તેમ કહી નીચે ઉતારી હતી જેવું નેહાએ આજુબાજુ જોયું કે અગાઉથી જ તેણે ત્યાં ટોમી (પાઈપ) છૂપાવી રાખ્યો હતો તેના વડે નેહાને માથામાં એક બાદ એક ઘા ફટકારી ત્યાં જ પતાવી દીધી હતી. આ પછી કશું જ ન બન્યું હોય તેવી રીતે હત્યાના સ્થળ પરથી રવાના થઈ ગયો હતો અને પત્નીની શોધખોળ શરૂ કરી દીધી હતી.
જમવા લઈ જાવ છું, તૈયાર રહેજે કહીને પત્નીને બહાર લઈ ગયો’તો
પોલીસ તપાસમાં ખુલ્યા પ્રમાણે હિતેશે જ સ્નેહાને ફોન કરીને `આપણે બહાર જમવા જવાનું છે એટલે તું તૈયાર રહેજે, હું તને તેડવા માટે આવું છું’ કહ્યું હતું. આ પછી સ્નેહાના ફોનની બેટરી લો હોવાથી તેણે ફોન ચાર્જિંગમાં મુક્યો હતો. થોડી જ વારમાં હિતેશ પોતાના ઘેર આવી ગયો હતો અને સ્નેહા તૈયાર હોય તે હિતેશ સાથે સ્કૂટર પર બેસી ગઈ હતી. અંદાજે 8ઃ30 વાગ્યા આસપાસ બન્ને બનાવસ્થળે પહોંચ્યા ત્યારે જ હિતેશે અગાઉથી નક્કી કર્યા પ્રમાણે પાઈપથી સ્નેહા પર હુમલો કરી તેને ત્યાં જ પાડી દીધી હતી અને થોડે દૂર સુધી ઢસડી પણ હતી.
