“હું ટેલિકોમ કંપનીમાંથી બોલું છું…રાજકોટમાં એરપોર્ટ રોડ પર રહેતા નિવૃત્ત શિક્ષકને ડિજિટલ અરેસ્ટ કરી રૂ.1.14 કરોડ પડાવી લેવાયા
દેશમાં ડિજિટલ એરેસ્ટના અસંખ્ય બનાવો બની રહ્યા છે. રાજકોટમાં આવો વધુ એક ચોથા બનાવમાં નિવૃત્ત શિક્ષકને ડિજિટલ એરેસ્ટ કરીને માફિયા ગેંગ દ્વારા 12 દિવસના સમયગાળા દરમિયાન 1.14 કરોડ રૂપિયા બળજબરીથી પડાવ્યા હોવાનો બનાવ રાજકોટ સાયબર ક્રાઈમ પોલીસ મથકમાં નોંધાયો છે.
ફરિયાદની વિગતો મુજબ એરપોર્ટ રોડ ઉપર પત્રકાર સોસાયટી નજીક એક્ઝાનનગર સોસાયટીમાં રહેતા 76 વર્ષીય નિવૃત્ત શિક્ષક કુરબાન વલીજી બદામી ગત મહિને તા.29ના રોજ તેમના મોબાઈલ ફોન ઉપર બપોરે એકાદ વાગ્યાના સુમારે અજાણ્યા નંબર ઉપરથી કોલ આવ્યો હતો અને પોતે જીઓ ટેલિકોમ કંપનીમાંથી બોલે છે, તમારો ફોન બે કલાકમાં બંધ થઈ જશે કારણ કે તમારા ફોનનો ઉપયોગ ચાઈલ્ડ પોર્નોગ્રાફી, ઓનલાઈન ગેમ્બલિંગ તેમજ સાયબર આતંકવાદમાં થયો છે. વૃદ્ધે પોતે આ બાબતે અજાણ છે. આવી કોઈ પ્રવૃત્તિ કરી નથી તેવું કહેતાં સામેપક્ષેથી મુંબઈ ક્રાઈમ બ્રાન્ચમાંથી બોલે છે અને તમારે અહીં ક્રાઈમ બ્રાન્ચમાં મુંબઈ ખુલાસો કરવા માટે આવવું પડશે. વૃદ્ધે પોતે ઉંમરલાયક હોવાથી આવી શકે તેમ ન હોવાથી સામે છેડેથી વીડિયો કોલમાં વાત કરાવી દેશે. ફોનમાં ખુલાસો કરી આપજો કહીને થોડીવાર બાદ વૃદ્ધને વૉટસએપમાં અન્ય એક નંબર મારફતે વીડિયો કોલ આવ્યો હતો.
વૃદ્ધે આ કોલ ઉપાડ્યો હતો જેમાં સામે છેડેથી પોલીસની વર્ધી પહેરેલી વ્યક્તિએ પોતે પોલીસ સબ ઈન્સ્પેક્ટર શંકર સુરેશ પાટિલ હોવાની ઓળખ આપી હતી અને પૂરું નામ તેમજ પરિવારની તમામ ડિટેઈલ માંગીને આધારકાર્ડ નંબર મેળવી લીધા હતા સાથે એવું કહ્યું હતું કે તમારા આ આધાર કાર્ડ પરથી અલગ-અલગ રાજ્યમાં ખાતા ખુલ્યા છે અને મની લોન્ડરિંગ તેમજ સાયબર ક્રાઈમના ઉપયોગમાં લેવાયા છે. સાયબર આતંકવાદમાં તમારું આધારકાર્ડ વપરાયું છે અને તમને દસ વર્ષની આજીવન કેદ થઈ શકે છે સાથે એવું પણ કહ્યું હતું કે તમને અત્યારે ફિઝિકલ એરેસ્ટ કરતા નથી પરંતુ ડિઝિટલ એરેસ્ટ કરવામાં આવે છે. અમે જણાવીએ તેમ કરશો તો તમને સાયબર આતંકવાદના કેસમાંથી રાહત અપાવશું.
આ ઉપરાંત વારંવાર વીડિયો કોલ આવતા હતા અને ડરી ગયેલા વૃદ્ધને પોલીસના રોલમાં ધમકાવવામાં આવ્યા હતા કે તમારી સંપત્તિ શંકાના દાયરામાં છે. તમારી તમામ પ્રોપર્ટી લિક્વિટાઈઝ કરીને આરબીઆઈમાં રોકડા રૂપિયા જમા કરાવવા પડશે અને આ કેસ પૂર્ણ થયે તમને વ્યાજ સાથે પરત મળી જશે. સાયબર માફિયા ગેંગે વૃદ્ધને વૉટસએપમાં જ સુપ્રીમ કોર્ટ ઓફ ઈન્ડિયા અને રિઝર્વ બેન્ક ઓફ ઈન્ડિયાના ડેપ્યુટી ગવર્નર ટી.રબીશંકરની સહી તથા સિક્કો મારેલા દસ્તાવેજો મોકલ્યા હતા અને જે એકાઉન્ટમાં રૂપિયા જમા કરાવવાના હતા તેની વિગત પણ આપી હતી.
ડરી ગયેલા વૃદ્ધે પોતાના બેન્કના પેન્શન એકાઉન્ટમાંથી તેમજ પત્નીના એકાઉન્ટમાંથી તા.3ના રોજ 65 લાખ, બીજા દિવસે તા.4ના રોજ 25 લાખ, પત્નીના ત્રણ એકાઉન્ટમાંથી 24.55 લાખ તા.10-11-2025 સુધીમાં ટ્રાન્સફર કર્યા હતા.
આવડી મોટી રકમ ટ્રાન્સફર કર્યા બાદ પણ ફોનથી ધમકાવાઈ રહ્યા હતા કે હજુ દસ લાખ રૂપિયા નહીં ભરો તો ફિઝિકલ એરેસ્ટ કરવામાં આવશે અને ઑસ્ટ્રેલિયામાં રહેતી તમારી મોટી પુત્રી શબનમ અને કેનેડામાં રહેતી નાની પુત્રી ઈશરતને વિદેશથી ડિપોર્ટ કરીને ભારત લાવવામાં આવશે. ડરેલા વૃદ્ધે પોતાની નાની પુત્રી ઈશરતનો સંપર્ક સાધીને નાણાં માંગ્યા હતા. ઈશરતને સમગ્ર ઘટનાની વાત કરી જેથી પુત્રી ઈશરતે આ એક ફ્રોડ છે અને ફરિયાદ કરવા કહ્યું હતું જેને લઈને બે દિવસ પહેલાં તા.18-11-2025ના રોજ નિવૃત્ત શિક્ષક કુરબાનભાઈ બદામીએ ટોલ ફ્રી નં.1930માં ફોન કરીને ફરિયાદ નોંધાવી હતી.
ફરિયાદના આધારે રાજકોટ સાયબર ક્રાઈમ પોલીસ સ્ટેશનમાં મુંબઈ પોલીસની વર્ધીની ઓળખ આપી 1,14,55,000 રૂપિયાનું સાયબર ફ્રોડ કરનાર સાયબર માફિયા ગેંગમાં અલગ-અલગ બે મોબાઈલ પરથી આવેલા ફોન નંબર અને ત્રણ બેન્ક એકાઉન્ટધારક તેમજ તપાસમાં ખુલે તે ઈસમો સામે ગુનો નોંધાવ્યો છે.
