જો જો તમે આવી ભૂલ ન કરતાં! ફોરેન ટ્રીપમાં ડ્યુટી ફ્રી વાઇન બોટલ લાવતા પ્રવાસીઓ ગુજરાત પોલીસ માટે સોફટ ટાર્ગેટ
આપણે ફોરેન ટુરમાં ગયા છીએ તો ત્યાંથી વાઇનની એક-બે બોટલ તો ગુજરાતમાં લઇ જઇ શકીએ. આવી વાત કે અણસમજ ભુલ ભરેલી છે. કોઇપણ ભારતીય નાગરિક ડ્રાય સ્ટેટ ગુજરાતમાં એક બોટલ પણ વિદેશથી સાથે લાવી ન શકે. એરપોર્ટ પર તો કોઇ રોકટોક ન હોય કે ન થાય પરંતુ આવી વ્યક્તિ કે ટુરીસ્ટ જેવા એરપોર્ટ એરીયાની બહાર નીકળી એટલે જો પોલીસનો પંજો ન પડે તો સાંગોપાંગ બચી શકે નહીં તો પોલીસના હાથે ચેકીંગમાં પકડાયા તો કાં તો `કપાવુ’ પડે નિવૈદ્ય ધરવા પડે અને જો સેટીંગ ન થાય કે સમુસુતરૂ ન ઉતરે તો પ્રોહીબીશન એકટ હેઠળ ગુનો દાખલ થાય અને ધરપકડ થાય. વિદેશથી ઘરે પહોંચતા પૂર્વે તો પોલીસના મહેમાન બનવું પડે.
ખાસ તો ગુજરાતીઓમાં એક એવી ધારણા છે કે, આપણે વિદેશ ટુરમાં જઇએ અને પરત ફરીએ ત્યારે ત્યાંથી બે બોટલ સુધી સાથે લાવી શકીએ. નિયમથી અજાણ અનેક વ્યક્તિઓ ફોરેન ટુરમાંથી સ્વેદશગમન ગુજરાતમાં ઘરે આવવા નીકળે એટલે ત્યાંથી લગેજમાં બે બોટલ નાખતા પણ આવતા હોય છે. હવે તો બિહાર અને મિઝોરમમાં પણ દારૂબંધી હોવાથી ત્યાં પણ દારૂ ન લઇ જઇ શકે. ગુજરાતીઓ અમદાવાદ કે કોઇપણ ઇન્ટરનેશનલ એરપોર્ટ ઉપર ઉતરે ત્યાંથી કનેકટીંગ ફલાઇટમાં ગુજરાતના જે તે શહેર જેમ કે રાજકોટ એરપોર્ટ પર ઉતરે, અથવા તો અમદાવાદ એરપોર્ટથી બાય કાર પોતાના ઘરે આવવા નીકળતા હોય છે.
એરપોર્ટના એરીયામાંતો કોઇપણ એજન્સી રોકે નહીં પરંતુ જેવા એરપોર્ટ હદની બહાર નીકળે એટલી સીધા પોલીસના રડારમાં આવતા હોય છે. આવા ફોરેન ટુરના પેસેન્જર્સની કાર્સ કે વાહનોને ચેકીંગમાં રહેલી પોલીસ અટકાવતી હોય છે. લગેજ ચેક કરે અંદર દારૂની બોટલો નીકળે એટલે પોલીસનું કામ બની જતું હોય છે. પોલીસ માટે પણ એરપોર્ટ નજીક કે હાઇવે પર આવા ટુરીસ્ટ સોફટ ટાર્ગેટ બને છે.
નિયમથી અજાણ લોકો આરંભે તો પોલીસ સાથે ધડ (માથાકુટ) કર કે બે બોટલ તો લાવવાની છુટ છે. અમે ફલાણા દેશ ગયા હતા ત્યાંથી લાવ્યા છીએ. આ રહ્યો પાસપોર્ટ, ટિકીટ અને બીલ. જો કે ગુજરાતમાં દારૂ લાવવો જ ગેરકાયદે હોવાથી પોલીસ નિયમ સમજાવે એટલે ટુરીસ્ટના હાથ હેઠા પડી જાય. ત્યારબાદ પોલીસ ફ્રન્ટફુટ પર (બેટીંગ) આવતી હોય છે. આરંભે તો આમ થશે, તેમ થશે, ગુનો દાખલ થશે. પોલીસની ભાષામાં પ્રેસર ટેકનીક અપાય છે. અંતે બોટલ લાવનારે બોટલ આપી દેવી પડે અને ઉપરથી જેવા વ્યક્તિ એવા તાલ વજન સાથે પાંચ, છ કે સાત આંકમાં ગોઠવણ થાય અને ફસાયેલા પ્રવાસીને મુક્તિ મળતી હોય છે.
રાજકોટ હીરાસર એરપોર્ટ નજીક કે બામણબોર વિસ્તારની હદમાં હાઇવે પર ચેકીંગમાં રહેતી પોલીસ ચોક્કસ ટીપ મળતી હોય અથવા તો રોજીંદી કામગીરી થતા નજર પારખુ બની ગયા હોવાથી અનેક પ્રવાસીઓને રોકીને નાના-મોટા આંકમાં ખંખેરી લેતા હોય છે. ફસાયેલા આવા વ્યક્તિ પણ વિદેશથી આવતા હોવાથી ક્યાં ઝંઝટમાં પડવું એવું માનીને માંગે તે આપીને છુટકારો મેળવી લેવાતો હોય છે.
વિદેશી વ્યક્તિ જ લાવી શકે અને પોલીસને જાણ પણ કરવી પડે
પ્રોહીબીશન ડિપાર્ટમેન્ટના ઉચ્ચસ્તરીય સુત્રોના જણાવ્યા મુજબ વિદેશ પ્રવાસે ગયેલા કોઇપણ ગુજરાતી નહીં પરંતુ ભારતીય નાગરિક પણ ગુજરાતમાં આવે એટલે સાથે એક બોટલ પણ લાવી ન શકે. પ્રોહીબીશન એકટ હેઠળ ગુનો નોંધાઇ શકે. માત્ર વિદેશી નાગરિક હોય એ વ્યક્તિ જ સાથે એક બોટલ લાવી શકે. ગુજરાતમાં જે-તે શહેર-સ્થળે જવાના હોય ત્યાં પહોંચી ત્યાંના નજીકના પોલીસ મથકમાં 24 કલાકના સમયગાળામાં પોતે વાઇન લાવ્યાની જાણ કરવી પડે અને 48 કલાકની અંદર પરમિટ મેળવી લેવી પડે.
એરપોર્ટ પર ડ્યુટી ફ્રી ના નામે વાઇન શોપ પરથી વેચાણ
એરપોર્ટ પરના વાઇન શોપમાં ડ્યુટી ફ્રીના નામે બોટલો વેચાતી હોય છે. નિયમ ન જાણતા પેસેન્જર્સ બે બોટલ ખરીદીને બોગમાં મુકે અથવા તો વધુ બોટલ લે તો ડ્યુટી ભરી આપે એટલે પેસેન્જર એવું માને કે હવે લીગલ થઇ ગયુ લઇ જઇ શકીએ. ખરેખર જો ગુજરાતમાં લઇ જઈ ન શકાય તો એરપોર્ટ વાઇન શોપ પરથી જ આવા પેસેન્જર્સને વેચાણ ન થાય તો તેઓ કાયદામાં ફસાતા બચી શકે.
