રાજકોટ એરપોર્ટમાં(તંત્રમાં) પાણી નથી! ટર્મિનલમાં 326 કરોડ ખર્ચ્યા છતાંય પેસેન્જરોએ કરે છે પાણીનો પોકાર
રાજકોટનાં નવા આલીશાન એરપોર્ટને આંતરરાષ્ટ્રીય સ્ટાન્ડર્ડમાં ગણાવવામાં આવે છે, પરંતુ પેસેન્જર્સના અનુભવ તો બિલકુલ વિપરીત છે. ઇન્ટરનેશનલ ફ્લાઈટ ઓપરેશન શરૂ થાય તે પહેલાં જ બેઝિક સુવિધાઓની ખામીઓ અવારનવાર બહાર આવી રહી છે. પરિસ્થિતિ એવી છે કે તંત્રને જાણે ઇન્ટરનેશનલ ઓપરેશન શરૂ કરવામાં રસ ન હોય તેવી પેસેન્જરોને પ્રતીતિ થઈ રહી છે કારણ કે જે સુવિધા બસસ્ટેન્ડમાં સહેલાઇથી મળે છે, તે અહીં 326 કરોડના ટર્મિનલમાં પણ મળતી નથી.
સોમવારે ઓપરેશનલ કારણોસર ત્રણ ફ્લાઈટોમાં વિલંબ થતા મુસાફરોને કલાકો સુધી ટર્મિનલમાં રોકાવું પડ્યું. આ દરમિયાન પેસેન્જર્સને મોબાઇલ નેટવર્ક ન મળતાં તેઓ પરિવાર, ઓફિસ કે ટ્રાવેલ એજન્ટ સાથે કનેક્ટ થઈ શક્યા નહોતાં.ટર્મિનલમાં સ્થાપિત કરેલી વાઈફાઈ સેવા ઓગસ્ટમાં ચાર દિવસના “દેખાડા” બાદ બંધ થઈ ગઈ છે.
તંત્રની ઉદાસીનતા એટલી વધી ગઈ છે કે ટર્મિનલમાં એકપણ મોબાઇલ કંપનીનું નેટવર્ક યોગ્ય રીતે કૅચ થતું નથી. પેસેન્જરોને કૉલ, મેસેજ કે ઓનલાઈન બોર્ડિંગ પાસ ડાઉનલોડ કરવા માટે પણ બહાર જવું પડે છે. એ સ્થિતિમાં ઇન્ટરનેશનલ ટ્રાફિક કેવી રીતે હેન્ડલ થશે તેવો સવાલ પેસેન્જર્સ જ નહીં, એરલાઇન્સ પણ ઉઠાવી રહી છે.
નેટવર્ક તો ઠીક ટર્મિનલમાં પાણીની વ્યવસ્થા નથી,સવારે તો પાણી હોતું જ નથી તેવી બુમરાડ ઉઠી છે.એરપોર્ટનાં વોશરૂમની સ્થિતિ જોઈ ને મુસાફરોને ધક્કો લાગ્યો છે. ગંદકી, મેન્ટેનન્સનો અભાવ બધા મુદ્દાઓને કારણે મુસાફરોમાં રોષ છવાયો હતો.
એરલાઇન્સનું કહેવું છે કે તેઓ સતત રજૂઆત કરે છે, પરંતુ તંત્રના કાન સુધી પહોંચતી નથી,આંતરરાષ્ટ્રીય કનેક્ટિવિટી માટે કરોડોનો ખર્ચ કરીને આ ભવ્ય ટર્મિનલ ઊભું કરવામાં આવ્યું છે, લોકોનો સવાલ હવે એ છે કે જ્યારે 326 કરોડ ખર્ચ્યા બાદ પણ પેસેન્જરને નેટવર્ક, વાઈફાઈ, પાણી અને સફાઈ જેવી મૂળભૂત સુવિધા મળી રહી નથી, ત્યારે ઇન્ટરનેશનલ ઓપરેશનનું સંચાલન કઈ રીતે કરશે.
