રાજકોટ સિવાયના મહાનગરના કલેક્ટરોની ધૂળ કાઢી નાખતું ચૂંટણીપંચ : અમદાવાદ, વડોદરા સહિતના જિલ્લામાં SIRની નબળી કામગીરી
રાજકોટ સહિત રાજ્યમાં ભારતના ચૂંટણી પંચ દ્વારા 4 નવેમ્બરથી 4 ડિસેમ્બર દરમિયાન SIR એટલે કે, સ્પેશિયલ ઈન્સેન્ટિવ રીવીઝન કામગીરી શરૂ કરી તમામ મતદારો પાસેથી એન્યુમરેશન ફોર્મ લઈ ડિજિટાઇઝેશન કરવામાં આવી રહ્યું છે. જો કે, રાજ્યના 5,08,43,436 મતદારોને ફોર્મ વિતરણ થઇ ચુક્યા છે પરંતુ ફોર્મ પરત મેળવી ડિજિટાઇઝેશનની કામગીરીમાં અમદાવાદ, વડોદરા, સુરત, ગાંધીનગર સહિતના મહાનગરોમાં અત્યંત નબળી કામગીરી થઇ રહી છે. સુરતમાં તો 14 દિવસમાં માત્ર ને માત્ર 5.06 ટકા જ કામગીરી થઇ હોય ગઈકાલે ચૂંટણીપંચની બેઠકમાં રાજકોટ સિવાય ના મહાનગરના જિલ્લા કલેકટર અને જિલ્લા ચૂંટણી અધિકારીની ઝાટકણી કાઢવામાં આવી હતી. નોંધનીય છે કે, રાજ્યમાં સરેરાશ 13.75 ટકા ગણતરી ફોર્મનું ડિજિટાઇઝેશન થયું છે જેમાં રાજકોટમાં 22.05 ટકા કામગીરી સાથે રાજ્યમાં 5માં ક્રમે છે.
ભારતના ચૂંટણીપંચ દ્વારા ગુજરાત સહિત 12 રાજ્યોમાં SIRની કામગીરી શરૂ કરવામાં આવી છે જેમાં રાજકોટ સહિત રાજ્યમાં 4 નવેમ્બરથી 4 ડિસેમ્બર દરમિયાન એસઆઈઆરની કામગીરી પૂર્ણ કરવા લક્ષ્યાંક સાથે હાલમાં જોરશોરથી કામ ચાલી રહ્યું છે. દરમિયાન ચૂંટણીપંચ દ્વારા દરરોજ SIR કામગીરીની સમીક્ષા કરવામાં આવી રહી છે. જેમાં ગઈકાલે તમામ જિલ્લા કલેકટર સાથેની રીવ્યુ બેઠકમાં અમદાવાદ, વડોદરા, સુરત, ગાંધીનગર, જૂનાગઢ, જામનગર સહિતના તમામ મહાનગરોમાં અત્યંત નબળી કામગીરી હોવાનું સામે આવતા ચૂંટણીપંચ દ્વારા લગત જિલ્લા કલેકટરોની નબળી કામગીરી સબબ ઝાટકણી કાઢી નાખી હતી, સાથે જ કામગીરી નહીં સુધરે તો બદલી કરવાની અને સીઆર બગડી જશે તેવી સ્પષ્ટ ચેતવણી પણ આપવામાં આવી હતી. રાજ્યમાં સૌથી નબળી કામગીરીમાં 19 જિલ્લાનો સમાવેશ કરાયો છે. સૌથી નબળી કામગીરી સાથે સુરત 33માં ક્રમે છે. જયારે અમદાવાદ 30માં અને ગાંધીનગર 28માં ક્રમે હોવાનું સામે આવ્યું છે.
22.05 ટકા ડિજિટાઇઝેશન સાથે રાજકોટ રાજ્યમાં પાંચમા ક્રમે
રાજકોટ શહેર અને જિલ્લામાં SIRની કામગીરી જોરશોરથી ચાલી રહી છે. જિલ્લામાં કુલ 23,91,027 મતદારો નોંધાયેલ છે જે પૈકી 23,84,423 મતદારોને એન્યુમરેશન ફોર્મનું વિતરણ કરી રાજકોટ જિલ્લા ચૂંટણી તંત્ર દ્વારા ફોર્મ વિતરણમાં 99.72 ટકા કામગીરી કરી છે. સાથે જ તા.15 અને 16ના રોજ બુથ લેવલે તેમજ ડોર ટુ ડોર કામગીરીના અંતે આજદિન સુધીમાં બીએલઓ દ્વારા 5,27,329 મતદારો પાસેથી એન્યુમરેશન ફોર્મ પરત મેળવી 22.05 ટકા મતદાર ગણતરી ફોર્મનું ડિજિટાઇઝેશન પણ પૂર્ણ કરી લેવામાં આવ્યું છે. નોંધનીય છે કે, રાજ્યમાં રાજકોટની જસદણ વિધાનસભા બેઠક SIR કામગીરીમાં ટોપ પર છે.
1,42,930 મતદારોના મૃત્યુ થયાના આંકડા સામે આવ્યા
રાજ્યમાં હાથ ધરવામાં આવેલ મતદાર યાદીની ઘનિષ્ઠ સુધારણા ઝુંબેશના ફોર્મ વિતરણ અને ફોર્મ પરત કરવાની કામગીરીમાં અત્યાર સુધીમાં રાજ્યના 5,08,43,436 મતદારોને ફોર્મ વિતરણ પૂર્ણ કરી 69,92,879 મતદારોના ફોર્મ પરત લઇ ડિજિટાઇઝેશનની 13.75 ટકા કામગીરી પૂર્ણ કરવામાં આવી છે જેમાં પ્રથમ તબક્કે જ 1,42,930 મતદારોના મૃત્યુ થયા હોવાના આંકડા સામે આવ્યા છે. સાથે જ 14,252 મતદારોએ રજૂ કરેલા ફોર્મ ચેક કરતા અન્યત્ર નોંધાયેલ હોવાથી આવા મતદારોના ફોર્મ સ્વીકારવામાં આવ્યા ન હોવાનું સામે આવ્યું છે.
