રાજકોટના પૂર્વ મેયરના વોર્ડમાં ગાબડુંઃ કોર્પોરેટરના પતિ ‘આપ’ના થયા! ભાજપ છાવણી ચિંતામાં
રાજકોટ મહાપાલિકાની ચૂંટણી આડે હવે બે મહિના જેટલો સમય બાકી રહ્યો છે. બીજી બાજુ રાજ્ય ચૂંટણી પંચ દ્વારા આવનારી ચૂંટણી માટે અનામત બેઠકનું રોટેશન પણ જાહેર કરી દેવાયાના ત્રીજા જ દિવસે વોર્ડ નં.12 કે જે ભાજપના પૂર્વ મેયર ડૉ.પ્રદીપ ડવનો વોર્ડ છે ત્યાં મોટું ગાબડું પડ્યું હતું. આ વોર્ડમાંથી ચૂંટાયેલા મહિલા નગરસેવિકા અસ્મિતાબેનના પતિ મૌલિક દેલવાડિયા 100થી વધુ કાર્યકરો સાથે આમ આદમી પાર્ટીમાં જોડાઈ જતાં આ વોર્ડમાં આગામી સમયમાં હજુ વધુ ઉથલ-પાથલ થવાની શક્યતા રાજકીય નિષ્ણાતો વ્યક્ત કરી રહ્યા છે.
આ વખતની ચૂંટણીમાં આમ આદમી પાર્ટી જબદરસ્ત તાકાત લગાવી દેવામાં આવી છે અને વહેલાસર તૈયારી કરી સોગઠા પણ ગોઠવી દેવાનું શરૂ કરી દેવામાં આવ્યું હોય તે સિલસિલામાં જ વોર્ડ નં.12માંથી મોટી વિકેટ ખેડવવામાં સફળતા મળી હતી. આમ આદમી પાર્ટીના પ્રદેશ પ્રમુખ ઈસુદાન ગઢવીની ઉપસ્થિતિમાં મૌલિક દેલવાડિયા તેમના 100થી વધુ સમર્થકો તેમજ વોર્ડના કાર્યકરો સાથે આમ આદમી પાર્ટીમાં જોડાઈ ગયા છે. એક બાજુ આ વોર્ડમાં બન્ને પક્ષ વચ્ચે કસોકસનો જંગ જામવાનું નિશ્ચિત જ હતું બરાબર ત્યારે જ મોટું ગાબડું પડતા ભાજપ છાવણી પણ ચિંતામાં આવી ગયાનું સૌ કોઈ જણાવી રહ્યા છે.
અત્રે ઉલ્લેખનીય છે કે થોડા સમય પહેલાં જ આમ આદમી પાર્ટીના ધારાસભ્ય ગોપાલ ઈટાલિયાએ આ વિસ્તારમાં સભાને સંબોધન કર્યું હતું જેમાં વોર્ડ નં.12 પણ સમાવિષ્ટ હોય ત્યારે જ નક્કી થઈ ગયું હતું કે અહીં કશીક નવાજૂની થશે ! હવે આવનારા દિવસોમાં અહીં શુું સમીકરણ રચાય છે તે જોવું પણ રસપ્રદ બની રહેશે.
છેલ્લા દોઢ વર્ષથી મને સાઈડલાઈન કરી દેવાયો હતોઃ મૌલિક દેલવાડિયા
આ અંગે મહિલા નગરસેવિકા અસ્મિતાબેન દેલવાડિયાના પતિ મૌલિક દેલવાડિયાએ `વોઈસ ઓફ ડે’ સાથેની વાતચીતમાં જણાવ્યું હતું કે તેમને દોઢ વર્ષથી સાઈડલાઈન કરી દેવામાં આવ્યા હતા અને કોઈ પણ કાર્યક્રમમાં અપેક્ષિત તરીકે નામ લખવામાં આવતું ન્હોતું. તેમના પત્ની કે જેઓ હાલ ભાજપના કોર્પોરેટર છે તેમની નાદૂરસ્ત તબિયત હોવાથી તેઓની આ છેલ્લી ટર્મ છે. આ પછી તેઓ ચૂંટણી લડવાના નથી. શું આમ આદમી પાર્ટી પાસે ટિકિટ મુદ્દે ક્નફર્મેશન મળ્યું છે ? આ સવાલનો જવાબ આપતા તેમણે કહ્યું કે હું કોઈ પણ પ્રકારની શરત મુક્યા વગર કે અપેક્ષા વગર જ આમ આદમી પાર્ટીમાં જોડાયો છું.
