1 ઑક્ટોબરથી રાજકોટના 18 વોર્ડના રસ્તા કરાશે રિપેર : ગરબી આયોજિત થતી હોય તે ચોકમાં તાત્કાલિક પેવિંગ બ્લોક, સિમેન્ટ બ્લોક ફિટ કરવા આદેશ
રાજકોટમાં ભલે એકધારો વરસાદ પડ્યો ન હોય પરંતુ જેટલો પણ પડ્યો તેના કારણે રસ્તાની હાલત `હાડપિંજર’ જેવી થઈ જવા પામી હોય બે-ત્રણ વખત થીગડા મારીને કામ ચલાવાયું હતું પરંતુ તેમાં કશો ભલીવાર ન વળતા આખરે નવેસરથી મજબૂત કામ કરવા માટે નિર્ણય લેવામાં આવ્યો છે. સ્ટેન્ડિંગ કમિટીની બેઠક દરમિયાન રસ્તા મુદ્દે લાંબી ચર્ચા કર્યા બાદ આખરે 1 ઑક્ટોબરથી 18 વોર્ડના રસ્તાનું કામ હાથ પર લઈ ઝડપથી પૂર્ણ કરવા અધિકારીઓને આદેશ આપવામાં આવ્યો હોવાનું ચેરમેન જયમીન ઠાકરે જણાવ્યું હતું.
સ્ટેન્ડિંગ કમિટી ચેરમેને જણાવ્યું કે વોર્ડ નં.4,5,6,15,16 અને 18માં 74.03 કરોડના ખર્ચે, વોર્ડ નં.1,8,9,10,11 અને 12માં 31.15 કરોડ અને વોર્ડ નં.2,3,7,13,16 અને 17માં 31.31 કરોડના ખર્ચે રસ્તા રિપેરિંગ કરાશે. જ્યાં જરૂર પડશે ત્યાં નવેસરથી રસ્તો બનાવાશે તો જ્યાં પેચવર્કની જરૂર પડશે તો ત્યાં એ કામ કરવામાં આવશે. આ કામ માત્ર રાજમાર્ગો કે મુખ્ય માર્ગો ઉપર જ નહીં બલ્કે શેરી-ગલીઓમાં પણ કરવામાં આવશે.
જો વરસાદ વિઘ્ન નહીં બને તો નવરાત્રિ સુધીમાં મોટાભાગનું કામ પૂર્ણ કરવાની તૈયારી છે અને દિવાળી સુધીમાં તમામ રસ્તા રિપેર થઈ જાય તે માટે આદેશ આપવામાં આવ્યો છે. એકંદરે ત્રણેય ઝોનમાં કુલ 136 કરોડના ખર્ચે રસ્તાની હાલત સુધારવામાં આવશે. વળી, નવરાત્રિ દરમિયાન શહેરના અલગ-અલગ ચોકમાં પ્રાચીન ગરબીનું આયોજન થઈ રહ્યું હોય ત્યાં પેવિંગ બ્લોક, સિમેન્ટ બ્લોક સહિતને ફિટ કરવા માટે આદેશ આપવામાં આવ્યો હોવાનું જણાવ્યું હતું.
