પુત્રીને ભગાડી જનારા યુવકના પિતાનું અપહરણ : રાજકોટની ભાગોળે વિચિત્ર બનાવ આવ્યો સામે : પોલીસે 4 લોકોને દબોચ્યા
રાજકોટની ભાગોળે કૂવાડવાના ખેરડી ગામે એક વિચિત્ર બનાવ પ્રકાશમાં આવ્યો હતો. વાડીમાં ખેતમજૂરી કરતા પરિવારનો પુત્ર બાજુના જ ખેતરમાં ખેતમજૂરી કરનારની પુત્રીને ભગાડીને લઈ જતા યુવકની ભાળ મેળવવા તેના પિતાનું અપહરણ કરવામાં આવ્યું હતું. આ અંગેની ફરિયાદ નોંધાતા જ ક્રાઈમ બ્રાન્ચે અમરેલીના મોટા આંકડીયા ગામેથી અપહરણ કરનાર બે મહિલા સહિત ચાર લોકોને દબોચી લીધા હતા સાથે સાથે ભાગી ગયેલા યુવક અને સગીરાને પણ શોધી કાઢ્યા હતા.
આ અંગે અમલાબેન થોમસભાઈ માવીએ નોંધાવેલી ફરિયાદમાં જણાવ્યું કે તેનો પુત્ર કાંતુ બાજુના જ ખેતરમાં ખેતમજૂરી કરતા ગોરધન કિશનભાઈ ભુરિયાની પુત્રીને ભગાડી ગયો હોય ગોરધન સહિતના ચાર લોકો ધસી આવ્યા હતા અને અબલાના પતિ થોમસને ટુ-વ્હીલરમાં બેસાડી લઈ ગયા હતા.
ગુનો નોંધાતા જ ક્રાઈમ બ્રાન્ચની ટીમે લોકેશનના આધારે મોટા આંકડીયાથી ગોરધન કિશનભાઈ ભુરિયા, તેની પત્ની પરમ ભુરિયા, સુરેશ ધનરાજભાઈ ભુરિયા અને સોનલ અરજણભાઈ ભુરિયાને પકડી પાડ્યા હતા. જ્યારે ગોરધનની પુત્રીને લઈને ભાગી જનારો કાંતુ અને સગીરા પણ હાથમાં આવી જતા તમામને રાજકોટ લાવવામાં આવ્યા હતા.
