તારી ચણિયાચોળીએ જોબનીયા ધેલા કીધાં…ચણિયાચોળીમાં અજરખ પ્રિન્ટ અને લેસનો ટ્રેન્ડ : ખેલૈયાઓ ટ્રેડિશનલ ચશ્મા સાથે ગરબે ઘુમશે

નવલાં નોરતાને આડે હવે 11 દિવસ જેવો સમય બાકી છે,રાસોત્સવની રંગત માટે રાસરસિયાઓ તડામાર તૈયારીઓ કરી રહ્યા છે.નવરાત્રિ પૂર્વે રાજકોટમાં વેલકમ ગરબા માટેની તૈયારીઓ ખેલૈયાઓએ શરૂ કરી દઈ ગણેશ ઉત્સવની પૂર્ણાહુતિ સાથે ટ્રેડિશનલ ચણીયાચોળી ,ધોતી,કેડીયાનાં બુકીંગ શરૂ કરી દીધા છે.દર વર્ષની જેમ ટ્રેડિશનલ ડ્રેસીસના બુકિંગ માટે પડાપડી નથી કારણકે વરસાદની આગાહી વચ્ચે ખેલૈયાઓ પણ અવઢવમાં મુકાયા છે જેના કારણે અત્યારે ઇન્કવાયરી સાથે બે ચાર દિવસ કે વેલકમ ગરબા માટે બુકીંગ કરાવી રહ્યા હોવાનું વેપારીઓએ જણાવ્યું હતુઁ.

નોરતાનું કાઉન્ટ ડાઉન શરૂ થઈ ગયું છે,જ્યારે સોશિયલ મીડિયામાં નોખી-અનોખી ભાત, ડિઝાઇન અને વર્ક સાથેનાં ચણિયાચોળીની રીલ ટ્રેન્ડિંગમાં છે.યુવતીઓ ખાસ કરીને એક બે જોડી ચણિયાચોળીની ખરીદી કરી બાકી આખી નવરાત્રિ ભાડે મળતાં ચણીયાચોળીનાં પેકેજ બુકીંગ કરાવે છે.વર્ષો આ ટ્રેન્ડ ચાલતો આવ્યો છે જે આજે પણ હજુ યથાવત રહેતા રાજકોટમાં અનેક જગ્યાએ ભાડે મળતા ચણીયાચોળી અને ટ્રેડિશનલ ડ્રેસિસનો વેપાર થવા લાગ્યો છે.

ઝૂમે ગોરી….ઘૂમે ગોરી….આ ગીત પણ ગરબે રમતી યુવતીઓનાં 6 મીટર થી લઈ 14 મીટરનાં ઘેરદાર ચણીયાની ચમક પર લખાયું છે તેવી રીતે આ વર્ષે પણ ઘેરદાર અને 32 થી 60 કલીવાળા ચણીયાચોળી ઇન ટ્રેન્ડ છે.ડિઝાઈનર રૂપલબેન કહે છે કે,બે વર્ષથી કલમકારી,પ્લેન અને હેન્ડવર્ક તેમજ અજરખની પ્રિન્ટવાળા ચણીયાચોળીની ડિઝાઇન ચાલતી હતી.જ્યારે આ વર્ષે પ્લેન સાથે પ્રિન્ટેડ,અજરખ પ્રિન્ટ, રોમન લેસ,લેસપટ્ટા,બાંધણીની ડિઝાઇનનાં ચણીયાચોળી આવ્યા છે.બે વર્ષથી ચણીયાચોળીમાં “પટોળા” ની ડિઝાઇનએ ધૂમ મચાવી હતી.

વધુમાં જણાવ્યું કે ઘેરદાર ચણીયાની સાથે બ્લાઉઝમાં કેડીયા,રેગ્યુલર, રાજસ્થાની, બેકલેસ ઉપરાંત લાંબા શ્રગ જેવા ડિઝાઈનર બ્લાઉઝ યુવતીઓ પસંદ કરે છે.આ નવરાત્રિએ ટ્રેડિશનલ ચણીયાચોળીની સાથે વેસ્ટર્ન સ્ટાઇલમાં પણ જેમાં લોંગ કટ અને શર્ટ તેમજ ટોપ દ્વારા ચણિયાચોળીનો ટ્રેન્ડ આવ્યો છે. બાળકો માટે પણ અલગ અલગ ડિઝાઇનવાળા ચણીયા ચોળી અને યુવકો માટે પરંપરાગત ધોતી,કુર્તા સાથે આ વખતે શર્ટ આવ્યા હોવાનું અરુણા ચણિયાચોળીનાં મોનિકભાઈ ગોકાણીએ જણાવ્યું હતું. ઘણા ખેલૈયાઓ કપલ ડ્રેસ સિલેક્ટ કરે છે.જેની ફેશન થોડા વર્ષોથી ચાલી છે. આ વર્ષે વરસાદની આગાહી હોવાના લીધે ખેલૈયાઓ હજુ દસ દિવસના નોરતા માટેના પેકેજ બુકિંગ કરતા પહેલા વિચારી રહ્યા છે. આ વર્ષે યુવકો માટે 2000થી લઇ 2500 સુધીના પેકેજ અને યુવતીઓ માટે 3000 થી લઈને 3500 સુધીના ચણિયાચોળીના પેકેજ ની રેન્જ ઉપલબ્ધ છે જ્યારે ડિઝાઇનર ચણિયાચોળીમાં 10,000 થી શરૂ થાય છે.

તેનું કાલા ચશ્મા જચદા હૈ… ખેલૈયાઓ આ વખતે ટ્રેડિશનલ ચશ્મા સાથે ગરબે ઘુમશે

દર વર્ષે ગરબામાં અવનવી ફેશન આવતી હોય છે,તરણેતર કે પછી મોર અને પોપટીયા સાથેની ફેન્સી છત્રી,પાઘડી પહેરી ખેલૈયાઓ ગરબે ઘૂમી આકર્ષણ જગાવે છે,આ વર્ષે જેમાં નવી સ્ટાઇલ આવી છે જે ગ્રાઉન્ડ પર સ્વેગ જમાવી દેશે..!! મોનિકભાઈ ગોકાણીએ કહ્યું કે,આ વર્ષે ટ્રેડિશનલ વર્કવાળા ચશ્મા જેમાં કોડી, સિતારા અને લેસ લગાવી છે,જે જોતા જ ખેલૈયાઓને ગમી જાય છે ને ડ્રેસનું બુકીંગ કરાવે કે ન કરાવે..પણ આ સ્ટાઈલ આપતાં ચશ્માનું બુકીંગ જોરદાર છે. આ ચશ્મા હોટફેવરિટ બન્યા છે.

આ પણ વાંચો : આજીએ કર્યા રાજી: 4 મહિના સુધી RMCએ સરકાર પાસેથી વેચાતું પાણી નહીં લેવું પડે, રાજકોટ જિલ્લાના 14 ડેમ 100 ટકા ભરાયા

જો વરસાદ વિઘ્ન નહિ બને તો ટ્રેડિશનલ ડ્રેસીસનો વેપાર 60 કરોડને આંબી જશે

ચણિયાચોળી અને ટ્રેડિશનલ ડ્રેસનાં વેપારીઓને ભીતિ છે કે,જો નવરાત્રિ સમયે જ વરસાદ વિઘ્ન બનશે તો ખરીદી અને બુકીંગ બંનેમાં અસર દેખાશે.બે વર્ષથી દર વર્ષે નવરાત્રિ પર વરસાદની આગાહી હોય છે જેને કારણે એડવાન્સ બુકીંગ પર અસર રહે છે,પણ વરસાદ ન હોય એટલે છેલ્લે છેલ્લે ખરીદી અને ઓર્ડરો આવતાં હોય છે.આ વખતે પણ ખેલૈયાઓએ થોભો અને રાહ જોવોની નીતિ પકડી છે.હાલનાં સંજોગોમાં વિન્ડો શોપિંગ છે પણ ખરીદી હજુ નવરાત્રિનાં એક બે દિવસ પહેલા થશે ને વરસાદ નહિ આવે તો આ વખતે 60 કરોડને પાર આ વેપાર થઈ જશે.આ વખતે 10 દિવસ નોરતા છે.