રાજકોટની ગવરીદડ દૂધ મંડળીમાં તસ્કરો ત્રાટકયા : રોકડા 1.65 લાખ અને DVRની ચોરી, જાણભેદુ જ ચોર હોવાની આશંકા
રાજકોટ શહેરના છેવાડે આવેલ ગવરીદડ ગામે મહિલા દૂધ સહકારી મંડળીમાં ચોરીની ઘટના સામે આવી છે. મંડળીની પાછળ લોક ન મારતા શટરમાંથી પ્રવેશ કરીને તસ્કરોએ અહીં પડેલ રોકડ 1.65 લાખની સાથે ડીવીઆર પણ ઉસેડી ગયા હતા બનાવ અંગે કુવાડવા રોડ પોલીસે ગુનો નોંધી વધુ તપાસ હાથ ધરી છે.
મળતી માહિતી મુજબ, ગવરીદડ ગામના પટેલ પાર્ક પાસે મારુતી ડેરી વાળી શેરીમાં રહેતા અને ગામની સહકારી દૂધ મંડળીના પ્રમુખ સોનલબેનના પતિ હસમુખભાઈ હરજીભાઈ અજાણીએ ફરિયાદ નોંધાવતા જણાવ્યું હતું કે, મંડળીના મંત્રી દીપક રણછોડભાઈ અજાણી સંપૂર્ણ વહીવટ સંભાળે છે, જ્યારે દૂધનું ફેટ કાઢવાનું કામ સુરેશ ભરવાડ અને વેચાણનું કામ વિપુલ પ્રવીણભાઈ હીરાણી કરે છે. મંડળીનું કામકાજ સવારે સાડા છ વાગ્યાથી રાત્રે દસ વાગ્યા સુધી ચાલે છે.
શનિવારે રાત્રે 10 વાગ્યે સુરેશ મંડળી બંધ કરીને જતા રહ્યા હતો બીજા દિવસે સવારે સાડા છ વાગ્યાની આસપાસ સુરેશ મંડળી પર પહોંચતા પાછળના દરવાજાનું શટર ખુલ્લું જોવા મળ્યું હતું. તેણે તુરંત મંત્રી દીપકને જાણ કરતાં અંદર જઈને તપાસ કરતાં ટેબલના ડ્રોવરમાંથી પરચુરણ ખર્ચ માટે રાખેલા ૨૫ હજાર તેમજ રોજિંદા વેચાણના અલગથી રાખેલા 1.40 હજાર જોવા મળ્યા ન હતા.
ફરિયાદી હસમુખભાઈના જણાવ્યા પ્રમાણે 1.40 લાખ તે છેલ્લા અઠવાડિયાનો હિસાબ હતો કામ કરતો માણસ પહેલી વાર જ આટલા રૂપિયા ભૂલી ગયો હતો. બનાવ અંગે જાણ થતાં કુવાડવા પોલીસ મથકનો સ્ટાફ સ્થળ પર પહોચી ગયો ત્યારે આ ચોરીમાં કોઈ જાણ ભેદુ છે કે નહીં તે અંગે પણ પોલીસે તપાસનો ધમધમાટ શરૂ કર્યો છે.
