સી.આર.પાટીલ પ્રદેશ પ્રમુખપદેથી હવે આપશે રાજીનામુ : આ મહિનાના અંત સુધીમાં કેબિનેટ વિસ્તરણની ચર્ચા

ભાજપના પ્રદેશ પ્રમુખ સી.આર.પાટીલ ગુરુવારે પક્ષના હેડક્વાર્ટર કમલમની મુલાકાતે આવી રહ્યા છે અને અંદરખાને થઇ રહેલી ચર્ચા ઉપર વિશ્વાસ મુકવામાં આવે તો તેઓ પ્રમુખપદેથી રાજીનામુ આપશે. પાટીલના રાજીનામા પછી નવા પ્રમુખની જાહેરાતનો માર્ગ સરળ થઇ જશે તેવું ટોચના સુત્રોએ જણાવ્યું છે. આ સુત્રોએ એવું પણ કહ્યુ છે કે, મુખ્યમંત્રી ભુપેન્દ્રભાઈ પટેલના પ્રધાનમંડળનું વિસ્તરણ પણ ચાલુ માસના અંત સુધીમાં કરવામાં આવી શકે છે.

સી.આર.પાટીલ કેન્દ્રીય મંત્રી બન્યા ત્યારથી નવા પ્રમુખની નિમણુંકનો મુદ્દો પેન્ડીંગ છે. પાર્ટીના બંધારણ મુજબ એક વ્યક્તિ બે હોદ્દા ધારણ કરી શકે નહી તેથી પાટીલે પ્રમુખ પદ છોડવું પડે તેમ છે. પરંતુ નવા પ્રમુખની પસંદગીમાં વિલંબ થયો છે અને ખુદ પાટીલે એક થીવધુ વખત કહ્યું છે કે, મારે રાજીનામુ આપવું છે પણ હું પાર્ટી હાઈ કમાન્ડની સુચનાની રાહ જોઉં છુ.

આ પણ વાંચો : ‘મને ખબર છે કે મારે મોટી કિંમત ચૂકવવી પડશે, પણ…’ ટ્રમ્પના ટેરિફ હુમલા પર વડાપ્રધાન નરેન્દ્ર મોદીનું મોટું નિવેદન

બીજી તરફ ઘણા સમયથી પ્રધાનમંડળનાં વિસ્તરણની વાતો પણ થઇ રહી છે અને હવે એવુ કહેવાઈ રહ્યુ છે કે, નવા પ્રમુખની જાહેરાત બાદ તુરંત વિસ્તરણ કરવામાં આવશે. જો બધું યોજના પ્રમાણે ચાલ્યુ તો ચાલુ માસના અંતે આ વિસ્તરણ હાથ ધરવામાં આવશે.

આ પણ વાંચો : ટ્રમ્પનું ફરી ગયું! ભારત પર ટેરિફ બમણો કર્યો : આજથી 25% ટેરિફ લાગુ, એક્સ્ટ્રા 25% ટેરિફ 27 ઓગસ્ટથી થશે લાગુ

પક્ષના પ્રભારી રત્નાકરની ગુજરાતની મુલાકાત વધી ગઈ છે અને તેઓ મુખ્યમંત્રી તથા પક્ષના અન્ય હોદેદારો સાથે શ્રેણીબદ્ધ મીટીંગ કરી રહ્યા છે. મુખ્યમંત્રી ભુપેન્દ્રભાઈ પટેલ પણ તાજેતરમાં દિલ્હીની મુલાકાતે ગયા હતા અને વડાપ્રધાન નરેન્દ્ર મોદી સાથે મુલાકાત કરી હતી. આ બેઠકમાં નવા પ્રમુખની પસંદગી અને પ્રધાનમંડળનાં વિસ્તરણ અંગે ચર્ચા થઇ હતી તેવુ સુત્રો જણાવી રહ્યા છે.