રાજકોટ પોલીસ પર હુમલો કરનારી ગેંગે બૂટલેગરના પુત્ર પર ફિલ્મી સ્ટાઈલે સોડા બોટલના ઘા કર્યા, વાંચો શું છે સમગ્ર મામલો

થોડા સમય પહેલાં પ્ર.નગર પોલીસ મથકના સ્ટાફ ઉપર હુમલો કરી નાસી ગયા બાદ યુનિવર્સિટી રોડ પરથી વેપારીના અપહરણ જેવા ગંભીર ગુનાના આરોપમાં પકડાઈ ચૂકેલા આરોપીઓ જેવા છૂટ્યા કે સુધરવાને બદલે વધુ બગડી ગયા હોય તેવી રીતે બૂટલેગરના પુત્ર ઉપર ફિલ્મી સ્ટાઈલે સોડા બોટલના ઘા કરતાં ગાંધીગ્રામ પોલીસે 13 શખસો સામે ગુનો નોંધ્યો હતો.

આ અંગે અનેક વખત પોલીસ ચોપડે ચડી ચૂકેલા યાકુબ મોટાણીના પુત્ર કોનેન મોટાણીએ નોંધાવેલી ફરિયાદમાં જણાવ્યું કે શુક્રવારે 5ઃ30 વાગ્યા આસપાસ તે ઘેર હતો ત્યારે તેના ઉપર રાજા ઉર્ફે શાહરૂખ જુણેજાનો ફોન આવ્યો હતો અને તેણે કહ્યું કે તે મને કાર કે રૂપિયા આપ્યા નથી એટલે મારા માણસો તારા ઘરે આવે છે, તું તૈયારીમાં રહેજે કહીને ફોન કાપી નાખ્યો હતો. આ પછી 6ઃ30 વાગ્યા આસપાસ કોનેન ઉપર આબીદ જુણેજાનો ફોન આવ્યો હતો. ફોન પર આબીદે બેફામ ગાળો ભાંડી હું તારા ઘરે આવું છું કહીને ફોન કાપી નાખ્યો હતો.

આ પણ વાંચો : સ્માર્ટ મીટર બદલવાનો કોન્ટ્રાક્ટ ખાનગી કંપનીને અપાયો છતાં PGVCLના કર્મચારીઓ પાસે કામ કરાવતા વિરોધ!

આ પ્રકારનો ફોન આવ્યા બાદ કોનેન તેના મિત્ર સુલતાન ફિરોજભાઈ જુણેજા અને તોકીર ફિરોજભાઈ જુણેજા સાથે ઘરની સામે બેઠા હતા ત્યારે અલગ-અલગ બાઈક પર આબીદ જુણેજા, મીરખાન રહીશ દલ, ઈસોભા રિઝવાન દલ, મહેબૂબ અઘામ, સમીર ઉર્ફે ધમો બસીર શેખ તેમજ અન્ય આઠેક જેટલા શખસોએ ધસી આવી સોડા બોટલના ઘા ફેંકવા લાગતાં અફડાતફડીનો માહોલ સર્જાઈ ગયો હતો.

ઉલ્લેખનીય છે કે ઈસોભા દલ, સમીર ઉર્ફે ધમો સહિતના શખસો પ્ર.નગર પોલીસ મથક પર હુમલો કરવામાં તો મીરખાન રહીશ દલ વેપારીનું અપહરણ કરવાના ગુનામાં પોલીસ ચોપડે ચડી ચૂક્યો છે.