રાજકોટ ઇન્ટરનેશનલ એરપોર્ટનાં ટર્મિનલમાં ટપકે છે પાણી : ભૂલ છુપાવવા જુઓ શું કર્યું?

રાજકોટ ઇન્ટરનેશનલ એરપોર્ટમાં 645 કરોડનાં ખર્ચે બનેલાં નવા ટર્મિનલમાં પ્રથમ વરસાદે પાણી ટપકતાં અનેક પેસેન્જરોનો સામાન પલળી ગયો હતો.ખાસ કરીને અરાઈવલ બેલ્ટ 2 પાસે રીતસર પાણીનો ધોધ વહયો હતો.આ ઉપરાંત ટર્મિનલમાં અનેક જગ્યાએ પાણી ટપકવાની ફરિયાદો ઉભી થઇ હતી.

ગઈકાલે કન્વેયર બેલ્ટ પાસે વરસાદને કારણે પાણી પડતાં સામાન લેવા આવેલા પેસેન્જરોને સાઈડમાં ઉભા રહી પોતાનો સામાન કાઢવો પડ્યો હતો,તો ભૂલ સુધારવાને બદલે ઓથોરિટીનાં બાહોશ સ્ટાફે આ ભૂલ કોઇના કેમેરામાં કેદ ન થાય એ માટે ત્યાં ટ્રી પ્લાન્ટ અને આજુબાજુ અમુક વસ્તુઓથી ડેકોરેશન કરીને બેદરકારીને છુપાવી દીધી છે.ઇન્ટરનેશનલ એરપોર્ટ પર વિદેશી ફલાઇટ શરૂ કરવાની વાતો વચ્ચે પાણી પડવું,મોબાઈલ કનેક્શન ન મળવું તો કલાકો સુધી વિજકનેક્શન ન હોવું સહિત અસુવિધાઓનો વરસાદ થાય છે તો શું ઇન્ટરનેશનલ એરપોર્ટ માટેનું ઇન્ફ્રાસ્ટ્રક્ચર કહી શકાય ખરું…..?

આ પણ વાંચો : LRDની પરીક્ષામાં નાપાસ થવાના ડરે યુવતી નીકળી આપઘાત કરવા : અભયમ્‌‍ની ટીમે સમયસર પહોંચી જીવન બચાવ્યું

થોડા દિવસો અગાઉ પણ ટર્મિનલની છતમાંથી પાણી લીક થવાનાં લીધે ચેક ઇન કાઉન્ટર અને વેઇટિંગ એરિયામાં પાણી ભરાઈ ગયું હતું.આ મુદ્દે અમુક પેસેન્જરોએ સોશ્યલ મીડિયામાં ટિપ્પણી કરતી પોસ્ટ પણ મૂકી છે જેમાં લખ્યું છે કે,આટલા મોંઘા એરપોર્ટમાં પાણી ટપકે છે,આ કેવી વિકાસની વાત છે…? તો બીજી તરફ અત્યારે ટર્મિનલમાં પાણી ટપકે છે તો ક્યારેક પાણીનાં ધાંધિયાના લીધે પીવા માટે કે વોશરૂમમાં પાણી નથી મળતું….!!!!