રાજકોટમાં નિવૃત્ત ડેપ્યુટી કલેક્ટર બન્યા છેતરપિંડીનો શિકાર : શેરમાં પ્રોફિટ કમાવવા જતાં રૂ.64 લાખ ગુમાવ્યા

રાજકોટના જામનગર રોડ પર લોટસ કોમ્પલેક્સમાં રહેતાં અને પાટણ ખાતે ડેપ્યુટી કલેક્ટર તરીકે ફરજ બજાવી નિવૃત્ત થયેલા અધિકારી સાથે સાયબર ગઠિયાઓએ 64 લાખની છેતરપિંડી આચરતાં ખળભળાટ મચી જવા પામ્યો હતો.

આ અંગે નિવૃત્ત ડેપ્યુટી કલેક્ટર દિનેશકુમાર સળિયાજી નિનામાએ સાયબર ક્રાઈમ પોલીસ મથકમાં નોંધાવેલી ફરિયાદમાં જણાવ્યું કે ગત તા.6 જાન્યુઆરીએ તેમના વૉટસએપ નંબર ઉપર શેરબજારમાં રોકાણ કરી નફો કમાવવા માટેનો મેસેજ આવ્યો હતો. આ પછી તેમણે મેસેજ મોકલનાર સાથે વાતચીત કરતાં રોકાણ કરવામાં તેમને રસ પડ્યો હતો. ત્યારબાદ દિનેશકુમાર નીનામા નામનું એકાઉન્ટ બનાવવામાં આવ્યું હતું, તેમને ગ્રુપમાં એડ કરવામાં આવ્યા હતા અને પ્લે સ્ટોર પરથી એક એપ્લીકેશન ડાઉનલોડ કરાવવામાં આવી હતી.

આટલી પ્રક્રિયા બાદ દિનેશકુમારે શરૂઆતમાં 50,000 રૂપિયા જમા કરાવ્યા હતા જે રકમ તેમને નફા સાથે એપ્લીકેશનના વોલેટમાં બતાવી રહી હતી. ત્યારપછી ગઠિયાઓએ આઈપીઓ ખરીદવાની ઓફરના નામે 15 લાખ રૂપિયા મેળવી લીધા હતા જેના બદલામાં આઈપીઓ થકી દિનેશકુમારને 15,000 શેર લાગ્યા હોવાનું વોલેટમાં દર્શાવાયું હતું. જે પછી ફરીથી તેમને એક આઈપીઓ લેવા માટેનું સુચન કરવામાં આવ્યું હતું જેના બદલામાં ચાર લાખ શેર લાગ્યા હોવાનું અને તેનું પેમેન્ટ 1.64 કરોડ રૂપિયા થતું હોવાનું કહેતાં દિનેશકુમાર નીનામાએ આટલા પૈસા પોતાની પાસે ન હોવાનું કહેતાં ગઠિયાઓએ કહ્યું હતું કે અમારા પોર્ટફોલિયો (વોલેટ)માં જે પ્રોફિટ બતાવે છે તે બાદ કરીને રૂા.82 લાખ જેટલી રકમ ભરવાની થશે. જો કે આટલી રકમ ભરવાનો ઈનકાર કરતાં તેમને લોનની ઓફર કરી હતી જે અંગે દિનેશકુમાર સહમત થયા હતા. આ પછી દિનેશકુમારના વોલેટમાં 10 કરોડની રકમ પ્રોફિટ તરીકે દર્શાવાઈ રહી હતી.

જો કે જેવી આ રકમ ઉપાડવાનો પ્રયત્ન કરાયો કે તુરંત જ 82 લાખની લોન ભરપાઈ કરવી પડશે તેવું કહેતાં દિનેશકુમારે પોતાની બચત, એસઆઈપી, વીમા ભેગા કરીને 49 લાખ રૂપિયા અલગ-અલગ બેન્ક એકાઉન્ટમાં ટ્રાન્સફર કરી દીધા હતા. એકંદરે તેમણે કુલ 64.50 લાખ રૂપિયા ગઠિયાઓને આપ્યા હતા. આ પછી પણ પૈસાની માંગણી સતત યથાવત રહેતાં પોતેને છેતરાયા હોવાનું ભાન થયું હતું અને આખરે પોલીસ ફરિયાદ નોંધાવી હતી.

આ પણ વાંચો : અમદાવાદ વિમાન દુર્ઘટના કાવતરું તો નથી ને? એજન્સીઓએ નવા એંગલથી તપાસ કરી

પોલીસે ગુનો નોંધી તપાસ કરતાં નિવૃત્ત ડેપ્યુટી કલેક્ટરે જે પૈસા જે-જે એકાઉન્ટમાં જમા કરાવ્યા તે એકાઉન્ટસ મહારાષ્ટ્ર સહિતના રાજ્યોમાં હોવાનું ખુલતાં આરોપીઓ સુધી પહોંચવા ટીમ રવાના થઈ હોવાનું જાણવા મળ્યું હતું.