રાજ્યમાં વરસાદને લઈને હવામાન વિભાગની આગાહી : 16 જૂને વરસાદનું આગમન, રાજકોટ માટે યલો એલર્ટ

રાજ્યમાં ફેબ્રુઆરી માસથી સતત પડી રહેલી આકરી ગરમીમાંથી રાહતના સંકેત હવામાન વિભાગે આપ્યા છે. કેરળમાં ચોમાસાના આગમન બાદ સામાન્ય સંજોગોમાં 15થી 20 દિવસે ગુજરાતમાં ચોમાસુ બેસતું હોય છે ત્યારે હવામાન વિભાગે આગામી 15 જૂનથી રાજ્યમાં સાર્વત્રિક હળવાથી મધ્યમ વરસાદની આગાહી કરી છે જેમાં રાજકોટ સહિત સૌરાષ્ટ્રમાં 16 જૂને વરસાદનું યલો એલર્ટ આપવામાં આવ્યું છે.

ઓણસાલ ગરમીએ રેકોર્ડ તોડ્યો છે અને જૂન માસમાં પણ ગરમીનો પારો 40 ડિગ્રીને વટાવી ગયો છે ત્યારે ગરમીમાંથી રાહત મળે તેવા સંકેતો આપી રાજ્યના હવામાન વિભાગે આગામી તા.15જૂનથી રાજ્યમાં છુટાછવાયા સ્થળોએ વરસાદ વરસવાની આગાહી કરી છે જેમાં 16 જૂન બાદ 40થી 50 કિલોમીટરની ઝડપે પવન ફૂંકાશે અને ગાજવીજ સાથે રાજ્યમાં સાર્વત્રિક હળવોથી મધ્યમ વરસાદ વરસવાની શક્યતા વ્યક્ત કરી છે.

વધુમાં હવામાન વિભાગે 16 જૂને રાજકોટ માટે વરસાદનું યલો એલર્ટ આપી ઉત્તર ગુજરાતના સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ અને મહિસાગર દક્ષિણ ગુજરાતમાં વડોદરા, છોટા ઉદેપુર,નર્મદા, ભરૂચ, સુરત, ડાંગ, નવસારી, વલસાડ, તાપી અને દમણ, દાદરા નગર હવેલી તેમજ સૌરાષ્ટ્રમાં રાજકોટ, જૂનાગઢ, અમરેલી, ભાવનગર, બોટાદ, ગીર સોમનાથ અને દીવમાં મીની વાવાઝોડા સાથે વરસાદ પડવાની શક્યતા વ્યક્ત કરી છે.

આ પણ વાંચો : ચોમાસામાં હવામાન વિભાગ દ્વારા રંગ મુજબ આપવામાં આવતા એલર્ટનો મતલબ શું થાય?

ગાંધીનગરમાં 41, રાજકોટમાં પારો 40.5 ડિગ્રી

વરસાદના દિવસો જેમ જેમ નજીક આવી રહ્યા છે તેમ-તેમ રાજ્યમાં ફરી ગરમીનો પારો ઉંચે ચડી રહ્યો છે. બુધવારે રાજ્યમાં સૌથી વધુ ગરમી ગાંધીનગર અને કંડલા એરપોર્ટ ઉપર 41 ડિગ્રી, ડીસા અને અમદાવાદમાં 40.8, રાજકોટ અને અમરેલીમાં 40.5, સુરેન્દ્રનગરમાં 40.3, ભુજમાં 40, ભાવનગરમાં 39.9, વડોદરામાં 39.4, કેશોદમાં 37.5, સુરતમાં 37, નલિયામાં 35.8, ઓખામાં 35.4 અને પોરબંદરમાં 35.2 ડિગ્રી મહત્તમ તાપમાન નોંધાયું હતું.