રાજકોટમાં આવારા તત્વો બેફામ : રૂ.100નું પેટ્રોલ પૂરાવી પૈસા આપવાને બદલે આતંક મચાવ્યો
રાજકોટમાં ગાઠિયાદાદાઓ, લુખ્ખાઓ, ટપોરીઓ, નશેડીઓ જાણે કે ઘટવાનું નામ જ લઈ રહ્યા ન હોય તેવી રીતે દરરોજ કોઈને કોઈ વિસ્તારમાં માથું ઉંચકી રહ્યા છે. આવા તત્ત્વો પર પોલીસની બિલકુલ પકડ રહી ન હોવાને કારણે હિંમત વધી રહી છે. આવી જ એક લુખ્ખાગીરી જંગલેશ્વરના ટપોરીએ 150 ફૂટ રિંગરોડ પર આવેલા ઓમનગર પેટ્રોલપંપ ઉપર કરી હતી. અકરમ દાઉદાણી અને તેની સાથે રહેલા શખસે સ્કૂટરમાં રૂા.100નું પેટ્રોલ પૂરાવી પૈસા આપવાને બદલે આતંક મચાવતાં બન્ને વિરુદ્ધ ગુનો નોંધાયો હતો.
આ પણ વાંચો : બોલબાલા બન્યું વડીલો માટે ‘શ્રવણ’: અયોધ્યાથી ગોરખપુરની જાત્રા કરાવી
આ અંગે પેટ્રોલપંપના ફિલરમેન મનોજ ભીખાભાઈ તન્નાએ નોંધાવેલી ફરિયાદમાં જણાવ્યું કે બે મહિના પહેલાં રાત્રે 11 વાગ્યે પેટ્રોલપંપ ઉપર હાજર હતો ત્યારે રાત્રે 2ઃ17 વાગ્યે બે શખસો બે સ્કૂટર પર આવ્યા હતા જેમાંથી એક સ્કૂટરનું પેટ્રોલ ખાલી થઈ ગયું હોય અકરમ દાઉદાણીએ ફિલરમેન શુભમ ત્રિવેદીને 100 રૂપિયાનું પેટ્રોલ પૂરી દેવા કહ્યું હતું. પેટ્રોલ પૂરાઈ ગયા બાદ પૈસા આપવાને બદલે શુભમને બેફામ ગાળો આપતાં અન્ય ફિલરમેન વિવેક રાઠોડે અકરમને ગાળો બોલવાની ના કહેતાં જ અકરમ અને તેની સાથે રહેલો શખસ વિવેકને માર મારવા લાગ્યા હતા.
આ પછી ફરિયાદી મનોજે ઝઘડો નહીં કરવા માટે કહેતાં અકરમે `મારા ઉપર 25 ગુના નોંધાયા છે, વધુ એક નોંધાશે તો ફેર નહીં પડે’ કહી પેટ્રોલ પંપ સળગાવી મારી નાખવાની ધમકી આપી ફરાર થઈ ગયો હતો. ફિલરમેન વિવેકને ઈજા પહોંચી હોય તેને એમ્બ્યુલન્સ મારફતે હોસ્પિટલે ખસેડાયો હતો.
અકરમ દાઉદાણી કોર્પોરેટરનો ભત્રીજોઃ બે દિ’ પહેલાં જ સંબંધ તોડ્યો…!
પેટ્રોલપંપ ઉપર આતંક મચાવતાર અકરમ રફીકભાઈ દાઉદાણી વોર્ડ નં.15ના કોર્પોરેટર મકબુલ દાઉદાણીનો ભત્રીજો થતો હોવાનું સામે આવ્યું છે. જો કે ભત્રીજો વારંવાર લખણ ઝળકાવી રહ્યો હોય બે દિવસ પહેલાં જ તેની સાથે સંબંધ તોડી નાખ્યો હતો. ઉલ્લેખનીય છે કે અકરમ દાઉદાણીએ અગાઉ હોટેલમાં તોડફોડ કરી હતી જે ગુનામાં ભક્તિનગર પોલીસ મથકની બે મહિલા કર્મીએ તેને પકડી પાડી કાયદાનું બરાબરનું ભાન કરાવ્યું હતું.
