સાઉથ કોરિયન યુવતી પ્રેમીને પામવા છેક ભારત આવી પહોંચી
સરહદ પારની વધુ એક દિલખુશ પ્રેમ કહાની
પ્રેમને સરહદ સીમાડા નડતા નથી. પાકિસ્તાનની સીમા હૈદર પ્રેમીને પામવા માટે ભારત આવી અને રાજસ્થાનની અંજુ નામની મહિલા મનના માણીગરને મેળવવા માટે પાકિસ્તાન પહોંચી એ ઘટનાઓ તાજી છે ત્યાં એવી જ વધુ એક ઘટના પ્રકાશમાં આવી છે.
કિસ્સો સાઉથ કોરિયામાં પાંગરેલા પ્રેમનો છે. ઉત્તર પ્રદેશના શાહજહાનપુર નો ફાંકડો શીખ યુવાન સુખજીત સિંઘ છેલ્લા આઠ વર્ષથી સાઉથ કોરિયામાં એક કોફી શોપ માં કામ કરતો હતો. બે વર્ષ પહેલા એ જ કોફી શોપ માં રૂપકડી યુવતી કીમ બોહનીની રૂમઝુમ પગલે શાનદાર એન્ટ્રી થઈ. બંનેની આંખો મળી અને યુવા દિલો પ્રેમના બંધને બંધાઈ ગયા.
દરમિયાનમાં સુખજીત સિંઘ છ મહિનાની રજા લઈને વતન આવ્યો. તેના વગર કીમને ચેન નહોતું પડતું. કોફી શોપ વેરાન લાગતી હતી. અંતે વિરહનું દુઃખ સહન ન થતાં તે બિસ્તરા પોટલા બાંધીને દિલ્હી અને બાદમાં ત્યાંથી એક મિત્રની મદદથી લઈને શાહજહાનપુર સુખજીત ના ઘરે પહોંચી ગઈ. બંનેનું પુનઃમિલન થયું. સુખજીતના પરિવારજનોએ અંતરના ઉમળકાથી કીમને પુત્રવધુ તરીકે સ્વીકારી. શીખ ધાર્મિક વિધિથી બંનેના ગુરુદ્વારામાં રંગેચ અંગે લગ્ન થયા.
શાહજહાનપુરમાં આ યુગલ આકર્ષણનું કેન્દ્ર બની ગયું છે. તેઓ જ્યાં જાય ત્યાં લોકો તેમને પ્રેમથી આવકારે છે. કીમ કહે છે કે આવો પ્રેમ મળશે એવી મને કલ્પના પણ નહોતી. સુખજીત ના પરિવારજનોએ આપેલ હુંફ અને ઉષ્માને કીમ પોતાનું સદભાગ્ય અને ઈશ્વરની કૃપા માને છે. તેને શાહજહાનપુર ફાવી ગયું છે. જોકે તેના વિઝા ત્રણ મહિનાના જ હોવાથી તેણે સાઉથ કોરિયા પરત જવું પડશે. સુખજીત પણ પોતાની રજા ટૂંકાવીને સાઉથ કોરિયા જવા માટે તૈયારી કરી રહ્યો છે. અને હા, સાઉથ કોરિયામાં કીમના પરિવારજનોએ પણ નવદંપતિને વધારવા માટે ફૂલો સજાવી રાખ્યા છે.
