ચેમ્પિયન્સ ટ્રોફી સેમી ફાઈનલમાં ભારત સામે હાર્યા બાદ ઓસ્ટ્રેલિયાના કેપ્ટન સ્ટીવ સ્મિથે ODI માંથી નિવૃતિ જાહેર કરી

ટીમ ઈન્ડિયા સામે આઈસીસી ચેમ્પિયન્સ ટ્રોફી 2025 ની સેમિફાઇનલમાં હાર્યા બાદ, ઓસ્ટ્રેલિયા ટીમના કેપ્ટન સ્ટીવ સ્મિથે નિવૃત્તિની જાહેરાત કરી છે. પેટ કમિન્સની ગેરહાજરીમાં, સ્ટીવ સ્મિથ ટીમના કેપ્ટન હતા, પરંતુ તેમના કેપ્ટનશીપ હેઠળ ટીમ ફક્ત સેમિફાઇનલ સુધી જ પહોંચી શકી. આવી સ્થિતિમાં, હવે તેણે વન ડે આંતરરાષ્ટ્રીય ક્રિકેટમાંથી નિવૃત્તિની જાહેરાત કરી છે. જોકે, તે ઓસ્ટ્રેલિયા માટે ટેસ્ટ અને ટી20 આંતરરાષ્ટ્રીય ક્રિકેટ રમવાનું ચાલુ રાખશે. તેની ઈચ્છા 2028ના ઓલિમ્પિકમાં પણ દેશ માટે રમવાની છે.

ક્રિકેટ ઓસ્ટ્રેલિયા અનુસાર, સ્મિથ ટેસ્ટ અને ટી20 આંતરરાષ્ટ્રીય ક્રિકેટમાં પસંદગી માટે ઉપલબ્ધ રહેશે. તેમનો નિર્ણય કદાચ લોસ એન્જલસમાં 2028 માં યોજાનારી ઓલિમ્પિક રમતોનો ભાગ બનવાની તેમની ઇચ્છાને પ્રતિબિંબિત કરે છે. દુબઈમાં ચેમ્પિયન્સ ટ્રોફીની સેમિફાઇનલમાં હાર બાદ સ્ટીવ સ્મિથે પોતાના સાથી ખેલાડીઓને પોતાના નિર્ણયની જાણ કરતા કહ્યું કે, રમતમાંથી નિવૃત્તિ લેવાનો આ યોગ્ય સમય છે.

સ્મિથે એક પ્રેસ રિલીઝમાં કહ્યું, “આ એક શાનદાર સફર રહી છે અને મેં તેનો દરેક મિનિટનો આનંદ માણ્યો છે. ઘણી બધી અદ્ભુત ક્ષણો અને મહાન યાદો રહી છે. બે વર્લ્ડ કપ જીતવું એ એક શાનદાર સિદ્ધિ હતી, સાથે સાથે આ સફર શેર કરવા માટે ઘણા મહાન સાથી ખેલાડીઓ પણ હતા. હવે લોકો માટે 2027 ODI વર્લ્ડ કપ માટે તૈયારી શરૂ કરવાની એક શ્રેષ્ઠ તક છે, તેથી એવું લાગે છે કે હવે રમત છોડી દેવાનો યોગ્ય સમય છે. ટેસ્ટ ક્રિકેટ હજુ પણ પ્રાથમિકતા છે અને હું વર્લ્ડ ટેસ્ટ ચેમ્પિયનશિપ ફાઇનલ, શિયાળામાં વેસ્ટ ઇન્ડીઝ અને પછી ઘરેલુ ઇંગ્લેન્ડ સામે રમવા માટે આતુર છું. મને લાગે છે કે મારી પાસે હજુ પણ તે તબક્કે ઘણું યોગદાન આપવાનું બાકી છે.”

સ્ટીવ સ્મિથ, જે 2 જૂને 36 વર્ષના થશે, તેમણે 19 ફેબ્રુઆરી, 2010 ના રોજ મેલબોર્ન ક્રિકેટ ગ્રાઉન્ડ ખાતે વેસ્ટ ઈન્ડિઝ સામે પોતાનો ODI ડેબ્યૂ કર્યો હતો અને 4 માર્ચ, 2025 ના રોજ ભારત સામે પોતાનો છેલ્લો ODI મેચ રમ્યો હતો. આ 15 વર્ષોમાં તેમણે ઘણી સિદ્ધિઓ હાંસલ કરી. તેણે પોતાની ડેબ્યૂ મેચમાં બેટિંગ કરી ન હતી કારણ કે તે સમયે તેને સ્પિનર તરીકે વધુ પસંદ કરવામાં આવતો હતો. તે મેચમાં તેણે બે વિકેટ લીધી હતી. જ્યારે ભારત સામેની છેલ્લી મેચમાં તેણે ૯૬ બોલમાં ૭૩ રનની ઇનિંગ રમી હતી.

ડાબોડી બેટ્સમેન સ્ટીવ સ્મિથે ઓસ્ટ્રેલિયા માટે ૧૬૯ વનડે મેચ રમી છે. આ મેચોની ૧૫૩ ઇનિંગ્સમાં તે કુલ ૫૭૨૭ રન બનાવવામાં સફળ રહ્યો. તેનો સર્વોચ્ચ સ્કોર ૧૬૪ છે. આ ફોર્મેટમાં તેની સરેરાશ 43.06 છે, જ્યારે સ્ટીવ સ્મિથે ઓસ્ટ્રેલિયા માટે ODI ક્રિકેટમાં 87.13 ના સ્ટ્રાઇક રેટથી રન બનાવ્યા છે, જેમાં 12 સદી અને 34 અડધી સદીનો સમાવેશ થાય છે. તે 20 વખત અણનમ પણ પાછો ફર્યો છે. તેણે વનડે આંતરરાષ્ટ્રીય ક્રિકેટમાં 517 ચોગ્ગા અને 57 છગ્ગા ફટકાર્યા છે.