રાજકોટમાં ફરી જામશે ક્રિકેટ ફીવર : સયાજી હોટલ ખાતે ટીમ ઈન્ડિયાનું ટ્રેડિશનલ અંદાજમાં કરાશે સ્વાગત, કાઠિયાવાડી ભોજન પિરસાશે

આગામી 28મી જાન્યુઆરીએ ભારત અને ઈંગલેન્ડ વચ્ચે ટી-20 મુકાબલો રાજકોટના નીરંજન શાહ સ્ટેડિયમ ખાતે થશે જેને લઈને રાજકોટ સહિત સમગ્ર સૌરાષ્ટ્રના ક્રિકેટ રસિકોમાં ઉત્સાહનો માહોલ જોવા મળી રહ્યો છે. રાજકોટની રંગીલી પ્રજા ક્રિકેટપ્રેમી છે ત્યારે ક્રિકેટરોના આવ્યા પહેલા જ રાજકોટમાં ક્રિકેટ ફિવર છવાયો હોય તેવુ લાગી રહ્યું છે.આવુ એટલા માટે કારણ કે પહેલા ભારતીય મહિલા ખેલાડીઓ ત્રણ વનડે મેચની શ્રેણીમાં ભાગ લઇ રેકોર્ડ સાથે ચેમ્પિયન બની, જે બાદ 23 જાન્યુઆરીથી રણજી ટ્રોફીની મેચ દિલ્લી અને સૌરાષ્ટ્ર વચ્ચે યોજાઈ અને હવે 28 જાન્યુઆરીના રોજ ભારત અને ઇંગ્લેન્ડ વચ્ચે ત્રીજી ટી-20 મેચ રાજકોટમાં યોજાનાર છે. રાજકોટમાં ટીમ ઈન્ડિયાનું શ્રેષ્ઠ પ્રદર્શન જોવા મળી રહ્યું છે. ત્યારે ભારતીય ક્રિકેટ ટીમના આગમન માટેની તૈયારીઓ પણ ધામધૂમથી કરવામાં આવી રહી છે. આવતીકાલે સયાજી હોટલમાં ખેલાડીઓનું ભવ્ય સ્વાગત કરવામાં આવશે.

રાજકોટ સયાજી હોટલના મેનેજર શક્તિસિંહે કહ્યું કે જ્યારે પણ ઈન્ડિયન ક્રિકેટ ટીમ રાજકોટમાં આવે છે ત્યારે તેઓનું રોકાણ સયાજી હોટલમાં કરવામાં આવે છે.જ્યારે ઈન્ડિયન ટીમ સયાજી હોટલમાં આવે છે ત્યારે રેડ કાર્પેટ પાથરીને તમનું ભવ્ય સ્વાગત કરવામાં આવે છે.જ્યારે આ વખતે ક્રિકેટ ટીમનું સ્વાગત રેડ કાર્પેટ અને ઢોલ નગારા સાથે કરવામાં આવશે.

સયાજી હોટલમાં ઈન્ડિયન ક્રિકેટ ટીમને દેશી કાઠિયાવાળી સ્પેશિયલ ડિશ, ગાંઠિયા, જલેબી, થેપલા સહિતની ભાવતી વસ્તુઓ પીરસવામાં આવશે.ટીમને સવારના નાસ્તામાં ગાંઠિયા જલેબી અને થેપલા પીરસવામાં આવશે.જ્યારે લન્ચમાં ટીમને ગુજરાતની ફેમસ કાઠિયાવાળી થાળી પીરસવામાં આવશે. જેમાં ત્રણ ગુજરાતી શાક, પંજાબી શાક, પુરણપોળી, દાળ-ભાત, પુરી, વઘારેલો રોટલો, ફરસાણ અને સ્વીટ પીરસવામાં આવશે.

રાત્રે બુફે ડિનર રાખવામાં આવ્યું છે.શિયાળો હોવાથી ઈન્ડિયન ટીમને બાજરાના રોટલા, ઓળો, ચણાનું શાક સહિતની વાનગીઓ પીરસવામાં આવશે.દર વખતે ક્રિકેટર્સને કાઠિયાવાળી ડિશની નવી નવી વાનગીઓ ટેસ્ટ કરવાની ઈચ્છા હોય છે.જેથી ક્રિકેટર્સને ભાવતી વસ્તુ પીરસવામાં આવશે.

સયાજી હોટલમાં કેપ્ટન અને કોચ માટે સ્વીટ રૂમ આપવામાં આવશે.જ્યારે અન્ય ક્રિકેટર્સને સ્પેશિયલ રૂમ આપવામાં આવશે.આમ રાજકોટની સયાજી હોટલમાં ક્રિકેટર્સના આગમન પહેલા જ તડામાર તૈયારીઓ કરવામાં આવી રહી છે.આ સાથે જ ક્રિકેટ ટીમના ખેલાડીઓના ફોટા અને નામ સાથેના પોસ્ટર હોટલની બહાર અને અંદર લગાવવામાં આવ્યાં છે.