આજીડેમ પોલીસે ફિલ્મી સ્ટાઈલમાં વાંકાનેરના 3 શખ્સોની ધરપકડ કરી પશુઓને મુક્ત કરાવ્યા
શહેરની ભાગોળે ભાવનગર હાઇવે પર કાળીપાટ પાસેથી મોડીરાત્રે આજીડેમ પોલીસે બાતમીના આધારે બોલેરોનો પીછો કરી ઠેબચડા ચોકડી પાસેથી બોલેરોને પકડી લઇ કતલખાને ધકેલાતા 4 પશુઓના જીવ બચાવી લીધા હતા. જયારે વાંકાનેરના 3 શખ્સોની ધરપકડ કરી તેમના વિરુધ્ધ ગુનો નોંધી વધુ તપાસ હાથ ધરી છે.
વિગત મુજબ આજીડેમ પોલીસ મથકના પીએસઆઇ એ.આર.રાઠોડના માર્ગદર્શન હેઠળ કોન્સ્ટેબલ દેવાભાઇ ધરજીયા, સંજય બારોટ સહીતનો સ્ટાફ પેટ્રોલીંગમા હતો દરમ્યાન નવા 150 ફુટ રીંગ રોડ પરથી બોલેરો પીકઅપ વાહનમા પશુ ભરી આવી રહી છે જે બાતમીના આધારે પોલીસે કાળીપાટ ચોકડી પાસે વોચ ગોઠવી ત્યાથી પસાર થતી શંકાસ્પદ બોલેરોને અટકાવવાની કોશિશ કરતા ચાલકે બોલેરો ભગાવી મુકી હતી. જેથી પોલીસે તેનો પીછો કરી ઠેબચડા ચોકડી નજીક બોલેરોને આંતરી ઉભી રખાવી હતી અને બોલેરોની તલાસી લેતા તેમા ચાર બળદને ગીચોગીચ દોરડાથી બાંધેલા હોય અને ઘાસચારાની વ્યવસ્થા પણ કરેલી ન હોય જેથી પોલીસે ચારેય બળદને મુકત કરાવી બોલેરોમા સવાર ભુપત પોપટભાઇ પરમાર, ગેલા મારાજભાઇ પરમાર અને મુકેશ મારાજભાઇ પરમાર (રહે. ત્રણેય વાંકાનેર)ને ઝડપી લઇ તેમના વિરુધ્ધ ગુનો નોંધી ધરપકડ કરી હતી. પોલીસે કતલખાને ધકેલાતા ચારેય પશુઓના જીવ બચાવી લઇ તેમને રાજકોટ પાંજરાપોળ ખાતે ખસેડવામા આવ્યા હતા.
