ઈસ્કૉન મંદિરના પૂજારીએ મારી દીકરીનું બ્રેઈનવોશ કરીને ભગાડી દીધી

માતાપિતા કરતાં પણ ગુરુઓનું સ્થાન ઊંચું હોય તેવું પણ મગજમાં બેસાડવામાં આવે છે!!!

હાઇકોર્ટમાં નિવૃત આર્મીમેન પિતાની અરજી
યુવતીને હાજર કરવા હાઇકોર્ટનો આદેશ,૯મીએ સુનાવણી

અમદાવાદ સ્થિત ઈસ્કોન મંદિરમાં યુવાન દીકરીઓનું બ્રેઈન વોશ કરવામાં આવતું હોવાનો ચોંકાવનારો આક્ષેપ કરતી રિટ પિટિશન ગુજરાત હાઈકોર્ટ સમક્ષ કરવામાં આવી છે. એક રિટાયર્ડ આર્મીમેન પિતાએ હેબિયસ કોર્પસ અરજી કરીને તેમની દીકરીને મંદિરના સત્તાવાળાઓના કહેવાથી ગોંધી રાખી હોવાથી તેમને છોડાવી કોર્ટ સમક્ષ હાજર કરવાની દાદ માંગી છે. હાઈકોર્ટના જસ્ટિસ સંગીતા કે. વિશેન અને જસ્ટિસ સંજીવ ઠાકરની બેન્ચે સરકાર અને પોલીસ કમિશનરને નોટિસ પાઠવી છે. આ કેસની વધુ સુનાવણી 09 જાન્યુઆરીએ હાથ ધરવામાં આવશે.

પિતાએ આરોપ લગાવ્યો હતો કે તેમની પુત્રી ઇસ્કોન મંદિરના પૂજારીઓના કબજામાં છે. તેમણે આરોપ લગાવ્યો હતો કે તેમની દીકરીને ગાંજો અને ડ્રગ્સ આપવામાં આવી રહ્યું છે. આ અરજી બાદ હાઇકોર્ટે યુવતીને હાજર કરવાનો આદેશ આપ્યો હતો. તે સિવાય ગુજરાત હાઇકોર્ટે તમામ પક્ષકારોને નોટિસ ફટકારી હતી.

ઇસ્કોન મંદિર ઉપર લગાવેલા ગંભીર આરોપ મામલે મંદિર તરફથી નિવેદન આપવામાં આવ્યું છે. હરેશ ગોવિંદ દાસે કહ્યું હતું કે આરોપો તદ્દન પાયાવિહોણા છે. આ પિતા પુત્રી વચ્ચેનો કૌટુંબિક મામલો છે, મંદિર સાથે કોઈ લેવા દેવા નથી. યુવતી કયા છે તે અંગે મંદિર પાસે કોઈ માહિતી નથી. કોર્ટ અને પોલીસ કાર્યવાહીમાં મંદિર પ્રશાસન તરફથી પૂરો સહકાર મળશે. મંદિર પાસે માહિતી પ્રમાણે યુવતી એ લગ્ન કરી લીધા છે.

હાઈકોર્ટે કેસની ગંભીરતાને ધ્યાને લઈને લાપતા યુવતીને હાઈકોર્ટ સમક્ષ હાજર કરવાનો હુકમ કર્યો હતો. એટલુ જ નહીં, હાઈકોર્ટે રાજ્ય સરકાર, અમદાવાદ શહેર પોલીસ કમિશનર, મેઘાણીનગર પોલીસ મથકના પીઆઈ અને ઈસ્કોન મંદિર સાથે નીલેશ નરસૈંયાદ દેશવાની, સુંદર મામા પ્રભુ, મુરલી મનોહર પ્રભુ, નારદમુની ઉર્ફે નિર્મોઈ મુરલી મનોહર પ્રભુ, અંકિતા સિંધી, હરિશંકરદાસ મહારાજ, અક્ષયતિથી કુમારી, મોહિત પ્રભુજી મહારાજ વિરૂદ્ધ કારણદર્શક નોટિસ જાહેર કરી છે.

અરજદાર પિતાએ અરજીમાં અનેક ગંભીર આક્ષેપો કરવામાં આવ્યા હતા. જેમાં તેમણે આરોપ લગાવ્યો હતો કે મંદિરના પૂજારી સુંદર મામાએ એક શિષ્ય સાથે તેમની દીકરીના લગ્ન કરી દેવા હુકમ કર્યો હતો. પરંતુ તેમણે આ આદેશ માન્યો ન હતો. જે બાદ તેમને ધમકીઓ મળવા લાગી હતી. અરજીમાં તે પણ કહેવામાં આવ્યું છે કે તેમની દીકરીનું બ્રેઈનવોશ કરીને 23 તોલા સોનું અને 3.62 લાખ રૂપિયા લઈને મથુરાના એક શિષ્ય સાથે ભગાડી દેવામાં આવી છે. અહીં યુવતીઓનું બ્રેઈન વોશ કરવામાં આવે છે. માતાપિતા કરતાં પણ ગુરુઓનું સ્થાન ઊંચું હોય તેવું પણ મગજમાં બેસાડવામાં આવે છે. અરજદાર પિતાએ એવા પણ આક્ષેપ કર્યા હતા કે, ઇસ્કોન મંદિરમાં યુવતીઓનું બ્રેઇન વોશ કરાય છે અને ધર્મના નામે આડંબર ચાલી રહ્યો છે. સુંદર મામા સહિતના પૂજારીઓ મંદિરમાં આવતા શ્રદ્ધાળુઓનું એટલી હદે બ્રેઇન વોશ કરે છે કે, માતા-પિતા કરતાં પણ ગુરુ મહત્વના છે અને મંદિરમાં રહેતી 600 યુવતીઓ ગોપી છે અને તેઓ કૃષ્ણ સ્વરૂપે છે તેવું માનવા મજબૂર કરે છે.