દેશના કયા ભાગમાં પડી રહી છે તીવ્ર ઠંડી ? તાપમાનનો પારો ક્યાં પહોંચ્યો ? વાંચો

દેશમાં એક તરફ વરસાદથી લોકો હેરાન છે તો બીજી બાજુ ઉત્તર ભારતના અનેક વિસ્તારોમાં આકરી શિતલહેર શરૂ થઈ ગઈ છે. હરિયાણા અને રાજસ્થાનમાં કેટલાક ભાગોમાં તાપમાન 4.5 ડિગ્રી સુધી પહોંચી ગયો હતો. જ્યારે ઉત્તર-પશ્ચિમ ભારતમાં ન્યૂનતમ તાપમાનમાં 2-4 ડિગ્રી સુધીની પછડાટ જોવા મળી છે. આમ હવે દેશભરમાં ઠંડી અસલ રંગ બતાવી રહી છે. આગામી દિવસોમાં પણ ઠંડી વધુ કાતિલ બની શકે છે. અનેક રાજ્યોમાં બર્ફીલા પવન શરૂ થયા છે.

હિમાલયના ઉપરના વિસ્તારોમાં શરૂ થયેલી હિમવર્ષાની અસર મેદાની રાજ્યો સુધી પહોંચી છે. જમ્મુ-કાશ્મીર, લદ્દાખ, ઉત્તરાખંડ અને હિમાચલ પ્રદેશમાં છેલ્લા 4 દિવસથી હિમવર્ષા બાદ ઠંડીમાં વધારો થયો છે.

મંગળવારે બર્ફીલા પવનોની અસરને કારણે હરિયાણા, દિલ્હી, ચંદીગઢ, રાજસ્થાન, ઉત્તર પ્રદેશ, પંજાબ, જમ્મુ-કાશ્મીર, લદ્દાખ, ઉત્તરાખંડમાં ઠંડીનું મોજું ચાલી રહ્યું છે.
હિમાચલ પ્રદેશ, ઉત્તર પ્રદેશ, બિહાર, ઝારખંડ, બંગાળ, સિક્કિમ, આસામ, મેઘાલય, નાગાલેન્ડ, મણિપુર, મિઝોરમ, ત્રિપુરામાં ગાઢ ધુમ્મસ છે. વાહન વ્યવહારને અસર થઈ રહી છે.
કાશ્મીર માઇન્સમાં થથરે છે
સોમવારે, શ્રીનગરમાં સિઝનનું સૌથી નીચું તાપમાન -5.4 નોંધાયું હતું, જ્યારે સોનમર્ગમાં સૌથી ઠંડું -9.7 હતું. ગુલમર્ગમાં પારો -9.0 ડિગ્રી સેલ્સિયસ નોંધાયો હતો.
ઉત્તરાખંડના કેદારનાથ અને બદ્રીનાથ ધામમાં સોમવારે સિઝનની પ્રથમ હિમવર્ષા થઈ હતી. આ પછી રાજ્ય સરકારે બંને જગ્યાએ ચાલી રહેલા વિકાસ કામો અટકાવી દીધા છે.