પાકિસ્તાનના ખૈબર પખ્તૂનખ્વામાં આત્મઘાતી હુમલો, 17 જવાનોના મોત
પાકિસ્તાનમાં એક સુરક્ષા ચોકી પર આત્મઘાતી હુમલાખોરોએ વિસ્ફોટકથી ભરેલા વાહનમાં બ્લાસ્ટ કર્યો હતો. આ હુમલામાં લગભગ 17 સુરક્ષાકર્મીઓનાં મોત થઈ ગયા છે, જ્યારે કેટલાય ઘાયલ થઈ ગયા છે. આ હુમલો ખૈબર પખ્તુનખ્વા પ્રાંતના બન્નુ જિલ્લામાં થયો છે. પાકિસ્તાની તાલિબાનથી અલગ થયેલા જૂથ હાફિઝ ગુલ બહાદુર જૂથે આ હુમલાની જવાબદારી લીધી છે. જોકે, સરકારે આ ઘટના પર કોઈ ટિપ્પણી કરી નથી, પણ સુરક્ષા અને ગુપ્તચર અધિકારીઓએ તેની પુષ્ટિ કરી છે કે હુમલા માટે જવાબદાર લોકો વિરુદ્ધ અભિયાન ચલાવવામાં આવી રહ્યું છે.
સુરક્ષા અને ગુપ્તચર અધિકારીઓએ જણાવ્યું છે કે સુરક્ષા દળ હુમલાને અંજામ આપનારા વિરુદ્ધ એક ઓપરેશન ચલાવી રહ્યા છે.પાકિસ્તાનમાં નવેમ્બર 2022થી હિંસા સતત વધી રહી છે. જ્યારે પાકિસ્તાની તાલિબાને ઈસ્લામાબાદ સરકાર સાથે મહિનાઓ સુધી ચાલેલા સંઘર્ષવિરામને સમાપ્ત કરી દીધું હતું. પાકિસ્તાની તાલિબાન, જેને તહરીકે તાલિબાન પાકિસ્તાનના નામથી ઓળખવામાં આવે છે. એક અલગ જૂથ છે, પણ તે અફઘાનિસ્તાન તાલિબાનના સહયોગી છે, જેણે 2021માં અફઘાનિસ્તાનમાં સત્તા સંભાળી હતી. અફઘાનિસ્તાનમાં તાલિબાનનો કબજો ટીટીપી માટે ઉત્સાહવર્ધક સાબિત થયો, જેના મુખ્ય નેતા અને જવાનો અફઘાનિસ્તાનમાં છુપાયેલા છે.
