શાદી મુબારક: બે મહિનામાં રાજકોટની વેડિંગ ઇન્ડસ્ટ્રીઝનો 600 કરોડનો વેપાર

વર-વધૂ સાથે લગ્ન પ્રસંગ સાથે સંકળાયેલા તમામ ધંધાર્થીઓ માટે પણ શુભઅવસર:ફ્લાવર,મંડપ ડેકોરેશન, વિડીયોગ્રાફી, સાઉન્ડ સિસ્ટમ, બ્યુટીશન ગોર મહારાજ અને કેટરિંગના ધંધાર્થીઓને ધૂમ ઓર્ડરો

અમારા આંગણિયે આવ્યો રૂડો અવસર….. તહેવારો પૂરા થતાની સાથે જ સૌથી મોટી ઈવેન્ટ એટલે કે લગ્નપ્રસંગની મોસમ પુરબહારમાં શરૂ થઈ છે, વર કન્યા ની સાથે એક પ્રસંગ 10 હજાર લોકો માટેનો પ્રસંગ બની જતો હોય છે. વેડિંગ ઇન્ડસ્ટ્રીઝમાં એક લગ્ન સાથે હજારો લોકોનો જીવનનિર્વાહ ચાલે છે. આ વર્ષે રાજકોટની વેડિંગ ઇન્ડસ્ટ્રીઝ માત્ર બે મહિનામાં 600 કરોડથી વધારેનો વેપાર કરશે, જેમાં ગોર મહારાજથી લઈને ફ્લાવર,મંડપ ડેકોરેશન, વિડીયોગ્રાફી, સાઉન્ડ સિસ્ટમ, બ્યુટીશન ગોર મહારાજ અને કેટરિંગના ધંધાર્થીઓને આ વર્ષે શાદી મુબારક બની છે.

ચાર વર્ષ બાદ વેડિંગ ઇન્ડસ્ટ્રીઝ ફુલફ્લેશમાં અનલોક થઈ ગઈ છે. રાજકોટમાં બે પ્રકારમાં લગ્ન થાય છે જેમાં સમૂહ લગ્ન અને વ્યક્તિગત રીતે જે પરિવારમાં પ્રસંગ યોજાય છે તે પણ ધામધૂમથી યોજાતા થઈ ગયા છે. કોરોના પછી લોકોની હવે પ્રસંગ અને તહેવારને લઈને ઉજવણીની માનસિકતા બદલાઈ ગઈ હોવાનું જણાવતાં રાજકોટ મંડપ ડેકોરેશન એસોસિએશનના ચેરમેન અને જાણીતા ગણેશ મંડપ ડેકોરેશનના દીપકભાઈ પટેલે “વોઇસ ઓફ ડે” સાથેની વાતચીતમાં જણાવ્યું હતું કે, રાજકોટમાં પરંપરાગત લગ્ન સાથે હવે વેસ્ટન સ્ટાઇલથી પણ મેરેજ સેલિબ્રેશન થાય છે. રિસેપ્શનની જગ્યાએ હવે આફ્ટર વેડિંગ પાર્ટી અને પ્રી વેડિંગ પાર્ટીએ સ્થાન લઈ લીધું છે.

સુખી સમૃદ્ધ પરિવાર માટે લગ્ન એટલે એક દિવસ નહીં પણ પાંચથી છ દિવસનું વેડિંગ પેકેજ હોય છે જેમાં મોટાભાગના લોકો ડેસ્ટિનેશન વેડિંગ કરતા થઈ ગયા છે અને જો એ લોકો રાજકોટમાં લગ્ન કરે છે તે લગ્ન લખવાથી લઈ હલ્દી અને મહેંદી ની રશમ,બેચલર પાર્ટી, ગરબા સાથે બોલીવુડ પાર્ટી નો પણ ટ્રેન્ડ રીતે દિવસે વધી ગયો છે. એક દિવસના પ્રસંગમાં પરિવર્તન આવ્યું છે જેમાં થીમ બેઇઝ પ્રોગ્રામ નક્કી કરવામાં આવે છે, રીત રિવાજ સાથે તેમાં અલગ થીમ,ગેઇમ્સ અને એન્ટરટેનમેન્ટ સામેલ થઈ ગયુ છે.

બ્રાઇડ-ગ્રુમ માટે સ્પેશિયલ એન્ટ્રી,રિઅલ ફલાવરથી ડેકોરેશનની ડિમાન્ડ
ગણેશ મંડપ સર્વિસના દિપકભાઈ પટેલે જણાવ્યું હતું કે હવેના મેરેજ કે આફ્ટર પાર્ટી વર અને વધુ માટે સામાન્ય નહીં પણ એક્સક્લુઝીવ એન્ટ્રી કરાવવામાં આવે છે જેના આઈડિયા માટે લાખો રૂપિયા ઇવેન્ટ કંપનીઓને આપવામાં આવતા હોય છે. લાઈટ શાવર, ફ્લાવર શાવર તો હવે રાજકોટમાં સ્પેશિયલ ક્રેન દ્વારા મંડપમાં એન્ટ્રી કરાવવામાં આવી રહી છે. પાર્ટી પ્લોટમાં પણ આર્ટિફિશિયલ ના બદલે હવે રિયલ ફ્લાવર અને ડિમાન્ડ વધી છે. મંડપમાં જે પ્રસંગ હોય તેની થીમ મુજબ ડેકોરેશન થાય છે જેમ કે મહેંદી અને હલ્દીની રસમમાં મિરર થીમ તો પછી લગ્નમાં વર વધુના ફોટા સાથે ટ્રેડિશનલ અને વેસ્ટર્ન ડેકોરેશન કરવામાં આવે છે.

આફ્ટર વેડિંગ પાર્ટી: વિદેશી ડાન્સરો ધૂમ મચાવે છે
એક સમય હતો કે લગ્ન પછી વરવધુના સત્કાર સમારોહ એટલે કે રિસેપ્શન યોજાય છે. જેમાં હવે થોડો બદલાવ આવ્યો અને પ્રિ વેડિંગ પાર્ટી યોજાય છે, જેમાં પણ હવે લોકોની પસંદગી બદલાય છે અને હવે આફ્ટર વેડિંગ પાર્ટી નું આયોજન શરૂ થયું છે જેમાં બોલીવુડ અને હોલીવુડ ફિલ્મ આધારિત ડાન્સ પાર્ટી રાખવામાં આવે છે, રશિયન ડાન્સ ગ્રુપ બોલાવાય છે અને યુક્રેઇનનું બેન્ડ પણ રાજકોટમાં ઘણાં પ્રસનગોમાં આવે છે.

હવે માસ્ટર ડીગ્રી ધરાવતાં એક નહિ પણ 11 ભૂદેવોનો આગ્રહ રાખે છે
લગ્ન પ્રસંગ ની ઉજવણીમાં જે રીતે અને પરિવર્તન આવ્યા છે તેમાં લગ્નની વિધિમાં પણ હવે ધીમે ધીમે બદલાવ આવી રહ્યો છે જેમાં અત્યાર સુધી એક ગોર મહારાજ લગ્નની સંપૂર્ણ વિધિ કરાવે છે. આ વિશે દીપકભાઈ કહે છે કે ઘણા પરિવારો એક નહીં પણ 11 જેટલા બ્રાહ્મણોને બુક કરાવે છે અને એ પણ યુનિવર્સિટીમાં માસ્ટર ડિગ્રી ધરાવતા બ્રાહ્મણો કે જે વૈદિક અને પુરા સંસ્કૃતના શ્લોક સાથે લગ્ન વિધિ કરાવવાનો આગ્રહ રાખે છે.