મહારાષ્ટ્રમાં ગર્ભવતી મહિલાને લઈ જતી એમ્બ્યુલન્સમા બ્લાસ્ટ થતાં લાગી આગ, વિસ્ફોટના દ્રશ્યો જોઈને રૂવાંડા ઊભા થઈ જશે
મહારાષ્ટ્રના ગર્ભવતી મહિલાને લઈ જઈ રહેલી એમ્બ્યુલન્સમાં આગ લાગી હતી. આગના કારણે એમ્બ્યુલન્સની અંદરનો ઓક્સિજન સિલિન્ડર ફાટી ગયો અને એમ્બ્યુલન્સ બળીને ખાખ થઈ ગઈ. વિસ્ફોટનું આ દ્રશ્ય જેણે જોયું તેઓ પણ ચોંકી ગયા. સિલિન્ડર વિસ્ફોટના કારણે દાદાવાડી વિસ્તારમાં નજીકના મકાનોની બારીઓ તૂટી ગઈ હતી.
મળતી વિગતો અનુસાર આ ઘટના મહારાષ્ટ્રના જલગાંવની છે જ્યાં એક દુર્ઘટનામાં ગર્ભવતી મહિલા અને તેમના પરિજનોનો ચમત્કારિક રીતે બચાવ થયો છે. વાસ્તવમાં જલગાંવ જિલ્લામાં ગર્ભવતી મહિલાને લઈ જતી એમ્બ્યુલન્સમાં ઓક્સિજન સિલિન્ડર ફાટતાં એક દર્દનાક અકસ્માત ટળી ગયો હતો. આ ઘટનામાં થોડી જ વારમાં એમ્બ્યુલન્સમાં આગ ભભૂકી ઉઠી હતી.
પ્રાથમિક વિગતો મુજબ અકસ્માત સમયે એમ્બ્યુલન્સમાં ગર્ભવતી મહિલા અને તેનો પરિવાર બેઠો હતો. જોકે સગર્ભા મહિલા અને તેના પરિવારજનોનો જીવ બચી ગયો હતો. આ વિસ્ફોટથી સ્થાનિક લોકોમાં ભયનો માહોલ સર્જાયો હતો. આ ઘટના જલગાંવના દાદાવાડી વિસ્તાર પાસે નેશનલ હાઈવે પર બની હતી.
પ્રાથમિક જાણકારી અનુસાર એમ્બ્યુલન્સ જલગાંવ જિલ્લા હોસ્પિટલ જઈ રહી હતી ત્યારે અચાનક ઓક્સિજન સિલિન્ડર ફાટતાં એમ્બ્યુલન્સમાં આગ લાગી હતી. ડ્રાઈવરે તરત જ એમ્બ્યુલન્સ રોકી અને તમામ મુસાફરોને બહાર નીકળવા કહ્યું. ડ્રાઈવરે નજીકના લોકોને પણ એલર્ટ કર્યા. આ તરફ બધાને સલામત સ્થળે લઈ ગયા. થોડી જ વારમાં એમ્બ્યુલન્સમાં જોરદાર આગ ફાટી નીકળી હતી અને થોડીવારમાં આખી એમ્બ્યુલન્સ આગની લપેટમાં આવી ગઈ હતી. ઘટના રોડની વચ્ચે બની હોવાથી મોટી સંખ્યામાં લોકો એકઠા થઈ ગયા હતા. પોલીસે પણ તાત્કાલિક ઘટના સ્થળે પહોંચી તપાસ શરૂ કરી હતી.
